Ẹnam Se Ifọnde Ẹnyụn̄ Ẹbọ Itoro!
1 “Mmọ ẹnyene ifụre oro akananam mmen̄kwe mbon efen ekededi ẹnyenede.” “Edi n̄kpọ inemesịt ndinyene otu emi.” Mmọ emi ẹdi ndusụk ke otu nti ikọ oro ẹkopde ẹto mme andida nse ke mbono district eke isua oko ama okokụre, owụtde nti etop oro nnyịn inyenede nte esop. (N̄ke 27:2; 1 Cor. 4:9) Ke akpatre, utọ itoro oro ẹka ẹbịne Jehovah. (Matt. 5:16) Nnyịn imenyene ata eti ifet efen nditoro Abasi idahaemi ke Mbono District “Mme Andikpep Ikọ Abasi” eke isua emi.
2 Ke isua kiet kiet nnyịn imesibọ nti n̄kpọ editi ẹban̄ade nti edu uwem ke mbono. Ntak-a? Koro nte ido, edisịnen̄kpọ, ye edu uwem ererimbot ẹkade-ka iso ndibiara, nnyịn imaha ndikpebe mmọ. Nnyịn iyomke ẹbiat eti ido nnyịn. (Eph. 2:2; 4:17) Ẹyak nnyịn inyene mme item ẹtienede mi ke ekikere.
3 Ẹnam Se Ifọnde—Ke Mme Itieidụn̄ ye ke Mme Ufọkisen: Ẹdiọn̄ọ nnyịn nte mme anam-akpanikọ. (Heb. 13:18) Ntem, inaha nnyịn item udia ke esịt ubet nnyịn edieke ẹkpande emi. Etubom utom kiet ama etịn̄ ete ke imọ ima ikeme ndisụhọde urua ufọk nnọ Mme Ntiense Jehovah sia imọ ikọfiọkde ite ke ẹyetịm ẹse ẹban̄a n̄kpoduoho ufọk oro. Ke akpanikọ, nnyịn idimenke mme n̄kpọ oro mîdịghe eke nnyịn ke itieidụn̄ m̀mê ufọkisen oro. Utu ke oro, wụt esịtekọm ke mme utom oro ẹnamde. Wụt mfọnido ye ime ke nte anamde n̄kpọ ye mbon efen ke itieidụn̄ mbufo.
4 Esitụk mme andida nse ke ini mmọ ẹkụtde n̄kpri owo nnyịn ẹwụtde eti ido ye edu nsụkibuot. (Eph. 6:1, 2) Mme ete ye eka, mbọk ẹse ẹban̄a nditọ mbufo mbak mmọ ẹdifịna mbon efen. Kpukpru owo ẹkpenyene ndifep editọ usụn̄ufọk m̀mê ndinam ọkpọsọn̄ uyom, akpan akpan ke ata mbubịteyo.
5 Ẹnam Se Ifọnde—Ke Itie Mbono: Ẹmekụt ẹte ke ndusụk mme andidụk mbono imaha ndibere ye mme adaidaha, idem ẹtịn̄de ikọ ye mmọ ke edu oro mîdịghe eke Christian. Ke ntak oro mme owo mîmaha nditiene mme item nditọete ẹnyụn̄ ẹbonde n̄kpọisan̄ ke ebiet oro owo mînọhọ unyịme, ediwak n̄kpọisan̄ ẹsisịri usụn̄. Ke akpanikọ, edu ami-ndi-akpa inamke ẹdiọn̄ọ owo nte anam eti n̄kpọ, inyụn̄ idaha itoro isọk Jehovah Abasi. Ẹyak nnyịn ke ntre itie ima ima, inyene ime, inyụn̄ idiana kiet.—Gal. 5:22, 23, 25.
6 Ke adan̄aemi ẹnọde ekikere ẹte nnyịn ida mfefere udia oro ididiade ke uwemeyo idi, idotke ndidia ndodobi udia oro ekemede ndinam owo ede idap ke adan̄aemi ikpehe edinam uwemeyo osụk akade iso. Emi ediwụt unana esịtekọm ke utọ akpan edinam oro.
7 Ẹnam Se Ifọnde—Ke Ọfọn̄ ye Ukamaidem Nnyịn: Ke kiet ke otu mbono district isua oko asuanade, andiwet akamba n̄wedmbụk n̄kpọntịbe akwa obio kiet ekewet ete: “Akande n̄kpọ ekededi, edu uwem Mme Ntiense ekenen̄ede edi n̄wọrọnda. Ekenem didie ntem ndikụt ediwak owo ẹnyenede uku ẹnyụn̄ ẹkponode idem. Ẹsịne se iyede ikan ke Sunday, ediwak ubon ke mme itie ikie ẹtode [kpukpru] orụk ye ekpụk ẹsan̄a sụn̄sụn̄ ẹka an̄wambre oro. Edu uwem mmọ ekedi ata isio ye eke ekese otuowo oro ẹsibụmerede ẹdụk an̄wambre oro. Ke akpanikọ, Mme Ntiense ẹdi ata isio ye ediwak otuowo ke ofụri ofụri. Edi ọsọ n̄kpọ ndikụt nte ẹwụtde idiọk edu uwem an̄wa-an̄wa. . . . Ke akpanikọ, otu Mme Ntiense enem.” Nnyịn ikpakam idehede iyak ọfọn̄ ye ukamaidem m̀mê edu uwem nnyịn ọwọn̄ọde idaha eke spirit mbono nnyịn ke usụn̄ ekededi.—Phil. 1:10; 1 Tim. 2:9, 10.
8 Ẹnam Se Ifọnde—Ke Itie Baptism: Mbon baptism ẹyeyom ndinen̄ede n̄wụt uku ke ini edinam emi. Ndisịne ọfọn̄ uyere mmọn̄ oro odotde oyowụt esịtekọm ẹnyenede ẹban̄a edisana edinam emi. Eyenen̄ede ọfọn mme ada ukpepn̄kpọ Bible ndidụn̄ọde “Mme Mbụme Ẹtode Mme Andikot” ke nsiondi Enyọn̄-Ukpeme eke April 1, 1995 ye nditọ ukpepn̄kpọ mmọ mbemiso ẹdụkde mbono.
9 Nti edu ye edu uten̄e Abasi nnyịn ẹsọn̄ọ mme edinịm ke akpanikọ Christian nnyịn ẹnyụn̄ ẹnam edi mmemmem n̄kpọ ọnọ mbon oro ẹnyenede esịt akpanikọ ndidiọn̄ọ akpanikọ. Ke ntre, ẹyak nnyịn ika iso ‘inam se ifọnde’ inyụn̄ idi se ẹtorode ke adan̄aemi idụkde Mbono District “Mme Andikpep Ikọ Abasi.”—Rome 13:3.