Ẹkûmen̄e!
1 Ke ini nnyịn iben̄ede idem ndikwọrọ ikọ to ke enyịnusụn̄ sịm enyịnusụn̄, enyịnusụn̄ nnyịn ekeme ndikama n̄kponn̄kan n̄kpọ-ata oro nnyịn isobode. Edikere nte ke nnyịn idotke ekeme ndinam nnyịn imen̄e ndiwọrọ n̄kọkwọrọ akpanikọ nnọ “kpukpru owo.” (1 Tim. 2:4) Edi nnyịn ikpenyeneke ndimen̄e ndikwọrọ eti mbụk. Ntak-a?
2 Edi Etop Jehovah: Jehovah etịn̄ ikọ esie ebe ke Bible. Ke ini idade etop emi isọk mbon efen, nnyịn itịn̄ ekikere esie, idịghe ekikere nnyịn. (Rome 10:13-15) Ke ini mme owo ẹsịnde etop obio ubọn̄, mmọ ẹnen̄ede ẹsịn Jehovah. Kpa ye oro, nnyịn inanake udọn̄. Nnyịn imodori enyịn ite ke etop emi eyedemede esịt mbon oro ẹnyenede udọn̄ ndikụt ukpụhọde ke mme idaha ererimbot, emi ẹnyụn̄ ẹnyenede udọn̄ ke n̄kpọ eke spirit mmọ.—Ezek. 9:4; Matt. 5:3, 6, NW.
3 Jehovah Odụri Mme Owo: Owo emi ekesịnde ndikpan̄ utọn̄ nnọ nnyịn ke ini edem ekeme ndikpan̄ utọn̄ idahaemi koro mme idaha esie ẹkpụhọrede ndien esịt esie emem. Ke emi Jehovah ekeme ndiwụt owo emi mfọnido esie onyụn̄ “odụri enye.” (John 6:44, 65) Ke ini emi etịbede, nnyịn iyom ndidu ke mben̄eidem ndidi se Jehovah adade anam utom inyụn̄ inyịme ndausụn̄ angel ke ndiyom utọ mbon emi.—Edi. 14:6.
4 Abasi Ọnọ Nnyịn Spirit Esie: Edisana spirit anam nnyịn ikwọrọ ikọ “ye uko ke Ọbọn̄.” (Utom 14:1-3) Ke itide ite ke nnyịn imenyene okopodudu ibetedem emi ke utom ukwọrọikọ nnyịn, nnyịn idimen̄eke nditịn̄ akpanikọ nnọ mbọhọidụn̄, mme nsan̄autom, nsan̄a ubet ukpepn̄kpọ, mme iman m̀mê mbon oro ẹnen̄ede ẹnyene ifiọkn̄wed m̀mê mme imọ owo.
5 Jesus Ama Ekpep Nnyịn nte Ikpanamde: Jesus ama ada mme mbụme oro ẹnamde owo ekere n̄kpọ, in̄wan̄-in̄wan̄ uwụtn̄kpọ, ye n̄kọkibuot N̄wed Abasi. Enye ama anam akpanikọ an̄wan̄a ke mmemmem usụn̄ emi edemerede udọn̄ oto esịt esie. Mmọ emi ẹsụk ẹdi mfọnn̄kan usụn̄ mfịn. (1 Cor. 4:17) Usụn̄ oro itịmde ukwọrọikọ nnyịn ekeme ndikpụhọde, edi okopodudu etop Obio Ubọn̄ emi osụk edi ukem.
6 Nnyịn imenyene ifetutom ndidi se Jehovah adade an̄wam mme owo ke akpan ye n̄wọrọnda usụn̄. Ẹyak nnyịn ikûmen̄e! Nnyịn ikpakam inyene uko inyụn̄ iyak Jehovah “eberede usụn̄ ọnọ nnyịn” man ikeme ndikwọrọ eti mbụk nnọ mbon efen.—Col. 4:2-4.