Nte Afo Emekeme Ndinam Utom ke Ebiet Oro Udọn̄ Okponde Akan?
1 Nte akanam afo emekere ndiwọrọ n̄ka ebiet oro ẹyomde mme anditan̄a Obio Ubọn̄ efen efen? Edieke ẹnọde fi ikot ẹte ‘ebe edi . . . edinyan̄a,’ nte afo eyeyere ikot oro nte apostle Paul ekeyerede? (Utom 16:9, 10) Ke ediwak esop, ẹyom mme ubon emi ẹkọride ẹsịm ọyọhọ idaha ke n̄kan̄ eke spirit, mme asiakusụn̄ ndin̄wam man ẹkụre efakutom, m̀mê mbiowo ye mme asan̄autom unamutom ndin̄wam ke edida usụn̄. Efakutom emi ekeme ndisịne n̄kpri obio emi ẹdude nsannsan oro ẹsuanade ẹyọhọ obio-in̄wan̄. Ufọkmbono Obio Ubọn̄ oro ekperede akan ekeme ndiyom usụn̄ ke ediwak kilomita. Ekeme ndidi utom idịbi udia iwakke do. Ekeme ndidi idaha eyo isiwakke ndifọn. Nte afo ayama ndinyịme utọ n̄kpọ-ata oro? Didie ke ekeme ndikụt unen?
2 Oyom Mbuọtidem ye Ibetedem: Ke ndausụn̄ Abasi, Abram ama ọkpọn̄ obio emana esie ke Ur onyụn̄ asan̄a kilomita 1,000 aka Haran ye n̄wan esie, eyen eyeneka esie, ye Terah, ete esie oro ama ọkọsọn̄. (Gen. 11:31, 32; Neh. 9:7) Ke Terah ama akakpa, Jehovah ama owụk Abram, emi ekedide isua 75 idahaemi, ete ọkpọn̄ Haran ye mme iman esie onyụn̄ anam isan̄ aka idụt oro Abasi ediwụtde enye. Abram, Sarai, ye Lot ẹma “ẹdan̄a.” (Gen. 12:1, 4, 5) Nte ededi, Abram ikadahake man akanam utom ke ebiet emi udọn̄ kaban̄a mme asan̄autom okokponde akan. Edi enye ndidaha ama oyom n̄kpọ. Nso ke okoyom?
3 Abram ama oyom mbuọtidem ye ibetedem man anam utọ isan̄ oro. Ekikere ye usụn̄ uwem esie ekenyene ndikpụhọde. Enye ekenyene ndikpọn̄ ukpeme emi enye ekenyenede oto mme iman esie. Edi enye ama eberi edem ke Jehovah ndise mban̄a enye ye mbonufọk esie. Ediwak owo mfịn ẹmewụt ibetedem oro mmọ ẹnyenede ke Jehovah ke ukem usụn̄ emi.
4 Utom Ibio Ini: Nte akanam amadara uwak edidiọn̄ oro ẹtode edinam utom ke efakutom oro owo mîbahakede inọ owo? Isua oko ke United States of America, asuanetop 5,699 ẹma ẹkụre efakutom 163 ke otu efakutom 174 oro owo mîbahakede inọ owo. Mme asuanetop 5,676 efen ẹma ẹn̄wam mme esop 380 ndikụre efakutom oro owo mîsiwakke ndinam utom. Ye ndusụk owo, emi ama abuana edinam ata anyan isan̄. Nte enye ama odot ye ukeme oro ẹkesịnde?
5 Eyenete kiet emi akanamde utọ isan̄ oro ekewet ete: “Ke akpa ini oro ẹkesiande mi ekikere edida otu kiet n̄ka efakutom oro owo mîsiwakke ndinam utom, mma mmen̄e. Edi mma mbiere ndinam utom oro. Idịghe n̄kukụre nte ke akanam ntuaha n̄kpọfiọk ndinam oro, edi enye ama okpụhọ uwem mi. Mmesikọm Jehovah kpukpru usen mban̄a ifet ndiketiene n̄ka isan̄ emi.” Eyenete efen ọkọdọhọ ete ke enye ekedi n̄wọrọnda ifiọkutom ke isua 20 oro imọ idude ke akpanikọ! Uyen kiet emi akakade ebiet emi udọn̄ odude ọkọdọhọ ete: “Emi ekedi mfọnn̄kan ifiọk n̄kpọntịbe ke uwem mi!” Ata ediwak mme asuanetop ẹnyịme ẹte ke ndinam utom idem ke ekpri ibio ini ke ebiet oro udọn̄ okponde akan amanam esịtekọm emi mmimọ inyenede inọ utom ukwọrọikọ otụn̄ọ. Neme ye mbon oro ẹma ẹkenanam. Afo oyokụt ete ke emi ama emenede idaha eke spirit mmọ ndien eyedi ayafiak emenede edieke ẹnọde ifet.
6 Ndinyịme ndinam utom ibio ini ke ebiet oro udọn̄ okponde akan ekeme ndin̄wam ke uduak efen. Mbon oro ẹnamde ntre ẹkeme ndinyene eti ntọt man an̄wam mmọ ‘nditie mbat se iditakde’ ke ediwọrọ n̄kodụn̄ ke idụt efen.—Luke 14:28.
7 Jehovah ebiere ndinam ẹtan̄a eti mbụk “ke ofụri ekondo” mbemiso utịt edide. (Matt. 24:14) Ke ama ọkọfiọk emi, edieke ekemede, nte afo eyenyịme ndiwọrọ n̄ka ebiet oro udọn̄ okponde akan? Udọn̄ odu ke ediwak itie.
8 Ndiwọrọ N̄ka Ebiet Oro Udọn̄ Okponde Akan: Nte afo ọmọkpọn̄ utom? Nte afo emenyene akpan ibatokụk kpukpru ini? Edieke mîdịghe ntre, nte afo emekeme ndinam ndutịm ndinam utom idemfo? Nte afo emekeme ndinam utom nnyene n̄kpọ udu uwem ke ebiet ekededi ke idụt emi? Edieke afo mûkemeke ndiwọrọ idụn̄, nte afo emekeme ndin̄wam owo kiet ke ubon ndinam utom ke itie en̄wen?
9 Edieke ke ama ekekere aban̄a emi ke akam, afo okụt ke imekeme ndise mban̄a n̄kpọ-ata oro odude ke ndiwọrọ n̄kodụn̄ ke ebiet oro udọn̄ okponde akan, neme n̄kpọ emi ye ubon fo ye mbiowo ke esop mbufo. Ekem wet leta nọ mbiowo man mmọ ẹkeme ndiwet n̄kpọ ndian nnyụn̄ ntoro mbemiso ẹnọde ẹdi ọfis n̄kọk itieutom.
10 Nso ke afo ekpesịn ke leta fo? Isua emana fo, usen emi akanade baptism, mme ifetutom fo ke esop, idaha ndọ, ye m̀mê afo emenyene n̄kpri nditọ. Wet enyịn̄ obio m̀mê ebiet emi afo akpamade ndinam utom, nte ekemde ye mme ọkpọkpọ udọn̄ fo.
11 Nte afo emenyene ifịk ye ukeme? Nte mme idaha fo ẹyak fi anam utom ke ebiet oro udọn̄ okponde akan? Edieke edide ntre, se ndien nte Jehovah akade-ka iso an̄wan̄a uwak edidiọn̄ ọnọ mbon oro ẹbuọtde idem ye enye nte mmọ ẹwụtde edu n̄waidem!—Ps. 34:8; Mal. 3:10.