Obufa Ndutịm Usen Akpan Mbono

Ibuotikọ obufa ndutịm Usen Akpan Mbono eke isua emi enyene ata isọn̄ N̄wed Abasi: “Ẹsụk Idem ẹnọ Abasi—Ẹn̄wana ye Satan.” (Jas. 4:7) Emi edi eti ndausụn̄ ke mme ini emi ẹkamade n̄kpọ-ata mi! Nnyịn ndinam mme ewụhọ Abasi anam nnyịn idi iso en̄wan Satan nnennen nnennen. Ndutịm emi eyekpep nnyịn nte ikemede ndisọn̄ọ nda mbiọn̄ọ ndiọi n̄kukan oro Devil adade abiat mbuọtidem. Nso idi ndusụk ọsọn̄urua n̄kpọ eke spirit emi nnyịn idibọde ke mbono emi?

Esenyịn circuit oyowụt nte “Ndiwụt Nsụkidem nnọ Abasi nte Mme Andibuana ke Ubon” ọsọn̄ọde mme ubon idem ndisọn̄ọ nda mbiọn̄ọ mme mfịghe ererimbot. Akpa utịn̄ikọ emi etịn̄ikọ oro otode-to edi edinọde ke usen oro, “Se Ndin̄wana ye Satan Ọwọrọde,” ayanam an̄wan̄a ntak ye nte oyomde nnyịn in̄wana ọkpọsọn̄ ọkpọsọn̄ man ibiọn̄ọ uduak Satan ndibiat idaha eke spirit nnyịn. Ẹtịm ikpehe iba akpan akpan ẹnọ mme uyen, emi anade ẹdu n̄ko ke edidemede ẹban̄a mme n̄kukan Devil. Ediwak Christian oro ẹdide ikpọ owo idahaemi ẹma ẹsịn nditiene mme udọn̄ ererimbot ke ini mmọ ẹkedide uyen. Nnyịn iyenem esịt ndikop ndusụk ọkpọkpọ ifiọkutom mmọ.

Ẹyom kpukpru mme andidu ke n̄kaowo ẹsụk idem ẹnọ odudu ukara. Ntem, akpatre utịn̄ikọ emi etịn̄ikọ oro otode-to edi edinọde oyowụt ikpehe inan̄ oro anade ẹwụt nsụkidem nnyịn nnọ Abasi: (1) ke ukara, (2) ke esop, (3) ke utom idịbi udia, ye (4) ke ubon. Nso eti ndutịm ke emi edi ntem!

Oyom mbon oro ẹyomde ndina baptism ke usen akpan mbono emi ẹsian esenyịn oro etiede ibuot usọp usọp nte ẹkekeme. Kpukpru nnyịn ikpenyene ndisịn idiọn̄ọ ke usenọfiọn̄ oro ke n̄wed usenọfiọn̄ nnyịn inyụn̄ inam ndutịm man ibuana ke ofụri ndutịm mbono oro. Mme edidiọn̄ oro nnyịn ibọde ẹdidi ke nsinsi nte nnyịn isụkde idem inọ Jehovah ke nsinsi.