Nte Enye Ọbiọn̄ọ Ukwọrọikọ?
1 Ata ediwak owo ẹdu uwem emi ọyọhọde ye utom. Mme Ntiense Jehovah ẹsịne ke otu mbon oro ẹyọhọde ye utom ẹkan—edikpep Ikọ Abasi, edidụk mme mbono esop, ye edibuana ke utom an̄wautom. Ke adianade do, nnyịn imesinam utom idịbi udia, utomufọk m̀mê utom ufọkn̄wed, ye ediwak mbiomo eken emi kpukpru ẹdade ini. Emi enen̄ede edi n̄kpọ-ata ọnọ mme ibuot ufọk.
2 Ke ntak ndiọi idaha ndutịm uforo ke nsio nsio itie, mme ibuot ufọk ẹkeme ndinam ọkpọsọn̄ utom ke anyan ini man ẹnyene se ẹdade ẹdu uwem. Ke ini uyịre uyịre utom idịbi udia adade ekese ini ye odudu mmọ, mmọ ẹsinyene esisịt ini ẹnọ utom ukwọrọikọ. Sia mmọ ẹnyenede mbiomo edinọ mme ubon mmọ n̄kpọ eke obụk, ndusụk mmọ ẹkeme ndikere nte ke mmimọ inyene sụk esisịt ini inọ utom ukwọrọikọ. (1 Tim. 5:8) Edi akpanikọ, ndinyene mme n̄kpọ oro ẹyomde ke uwem mfịn akama ediwak mfịghe. Edi iyomke utom idịbi udia owo ọbiọn̄ọ edikwọrọ eti mbụk. (Mark 13:10) Ntem, nnyịn iyanam ọfọn ndidụn̄ọde ata idaha nnyịn.
3 Sia ido ererimbot emi okpụhọrede kpukpru ini, ibuot ufọk ekeme ndinyene ntụhọ edibiat ebeubọk ini ke utom, ye ekikere edin̄wana okụk nnịm nnọ mme mbabuat afanikọn̄. (1 Cor. 7:32, NW) Ke adan̄aemi ndika iso nnam utom idịbi udia ekemede nditie nte ke ọnọ mme n̄kpọ obụkidem m̀mê ndinọ mme ifet unọ idem nduọkodudu ye unọ idem inemesịt efen efen, nte emi ayanam ubon ẹnen̄ede ẹkop inemesịt ẹnyụn̄ ẹnyene uyụhọ edieke ẹdade enye ẹkpụhọ ye edibịne mme n̄kpọ eke spirit ye edidụk mbono esop ofụri ini? Ke akpanikọ nnyịn iyom ndifep n̄kpọ ekededi oro edisịnde idaha eke spirit nnyịn ke itiendịk. Ndinam item Jesus eke ‘edibon n̄kpọ-uto ke heaven’ nnyụn̄ nnyene “inyene ke n̄kan̄ Abasi” edi usụn̄ uwem oro owụtde eti ibuot.—Matt. 6:19-21; Luke 12:15-21.
4 Bem Iso Yom Ufọn N̄kpọ Obio Ubọn̄: Jesus ekekpep mme mbet esie ndinịm mme n̄kpọ eke spirit mbemiso kpukpru n̄kpọ eken. Enye ama eteme mmọ ete: “Ẹkûtịmede esịt ẹbụp ẹte, Nso ke nnyịn ididia? Nso ke nnyịn idin̄wọn̄? Nso ke nnyịn idisịne?” Ntak emi enye ọkpọdọhọde ntre? Enye ama anam an̄wan̄a ete: “Koro Ete mbufo ke heaven ọmọfiọk ete kpukpru n̄kpọ emi ẹnana mbufo.” Edieke nnyịn inen̄erede inyịme ye oro, n̄kpọ ndomokiet idibiọn̄ọke nnyịn ndinam ikọ efen emi Jesus eketịn̄de ete: “Ẹkam ẹbem iso ẹyom Obio Ubọn̄ Esie ye edinen ido Esie; ndien ẹyedian kpukpru n̄kpọ emi [n̄kpọ eke obụk oro ẹyomde] ẹnọ mbufo.” Abasi eyese aban̄a emi! (Matt. 6:31-33) Ke akpanikọ emi idịghe ini ndiyak editịmede esịt oro mîdotke kaban̄a nte ikpodude uwem m̀mê udọn̄ ndinyene inem inem idaha ke editịm n̄kpọ emi oyomde ndibe mfep ke mîbịghike mi ọwọn̄ọde ntịn̄enyịn nnyịn.—1 Pet. 5:7; 1 John 2:15-17.
5 Akpan uduak utom idịbi udia edi man ọnọ owo n̄kpọ obụkidem. Edi se nnyịn iyomde awak didie? Apostle Paul ama ewet ete: “Edieke nnyịn inyenede se idiade ye se idade ifụk iferi, nnyịn iyokụt ite oro ekem.” Nte nnyịn idomo ndinyene se ikande oro? Edieke edide ntre, ekeme ndidi nte ke nnyịn ke idọk mme utịp oro Paul okodụride nnyịn utọn̄ aban̄a ete: “Mmọ eke ẹyomde ndidi mbon inyene ẹduọ ẹsịne ke idomo ye afia ye ediwak ndisịme ye idiọk udọn̄, eke ẹdụdide owo ẹsụhọde ke nditaha ye nsobo.” (1 Tim. 6:8, 9; Matt. 6:24; Luke 14:33) Didie ke nnyịn ikeme ndidiọn̄ọ m̀mê mme ebeubọk udọn̄ ẹbiọn̄ọ nnyịn?
6 Edieke otode ke ntak edibịne n̄kpọ ererimbot nnyịn inyene sụk esisịt udeme ke utom an̄wautom m̀mê ikpu ndikụt ufọn ediwa idem ke ntak eti mbụk, do oyom inam ukpụhọde ke mme ebeiso n̄kpọ nnyịn. (Heb. 13:15, 16) Ata uke uke usụn̄ uwem ekeme ndin̄wam ke ndimen n̄kpọ ubiọn̄ọ emi ke ukwọrọikọ nnyịn mfep. Ufọn n̄kpọ Obio Ubọn̄ ekpenyene ndidi akpa n̄kpọ kpukpru ini ke se iban̄ade edida ini ye odudu nnyịn nnam n̄kpọ.
7 Utom Oro Mîdịghe Ikpîkpu: Ikọ Paul esịn udọn̄ ọnọ nnyịn ‘ndiyọhọ kpukpru ini ke utom Ọbọn̄; sia imọfiọk ite utom eke nnyịn inamde idiwọrọke idi ikpîkpu ke Ọbọn̄.’ (1 Cor. 15:58) Ata akpan “utom Ọbọn̄” edi utom edikwọrọ Obio Ubọn̄ ye edinam mbet. (Matt. 24:14; 28:19, 20) Man inyene ọyọhọ ebuana nte ikekeme, nnyịn ikpenyene ndidiomi ini nnọ utom an̄wautom ke urua kiet kiet inyụn̄ idomo nditre ndida ini oro mbịne n̄kpọ efen ekededi. (Eph. 5:15-17) Do, utom idịbi udia m̀mê n̄kpọ ekededi idibiọn̄ọke utom ukwọrọikọ nnyịn.
8 Ke ini inọde idem nnyịn ndibuana akpanikọ Bible ye mbon efen, nnyịn inyene mfọnn̄kan inemesịt oro otode edinọnọ. (Utom 20:35) Ebede ke edibịne utom ukwọrọikọ Obio Ubọn̄, nnyịn imekeme ndiberi edem ke ini iso ye mbuọtidem, ‘koro Abasi ikwan̄ake nte efrede utom nnyịn ye ima enyịn̄ Esie eke nnyịn iwụtde.’—Heb. 6:10.