Tịm Siak Ikọ Abasi
1 Ke ini ọkọnọde akwa owo ukara kiet ikọ ntiense, “Philip atat inua esie, ọtọn̄ọ ke ikọ N̄wed Abasi [kiet], ọkwọrọ Jesus ọnọ enye.” (Utom 8:35) Philip ama ‘etịm asiak ikọ akpanikọ.’ (2 Tim. 2:15) Nte ededi, mfịn, mme esenyịn oro ẹsan̄ade-san̄a ẹkụt ke ediwak mme asuanetop iwakke ndida Bible nnam n̄kpọ ke ini ẹnọde ikọ ntiense. Nte afo emesida Bible anam n̄kpọ ke utom ukwọrọikọ fo?
2 Ikọ Abasi edi ebiet emi kpukpru se nnyịn inịmde ke akpanikọ inyụn̄ ikpepde, ẹtode. (2 Tim. 3:16, 17) Enye odụri mme owo ọnọ Jehovah onyụn̄ ọnọ mmọ ukpep ndinyene uwem. Ntak edi oro edide akpan n̄kpọ nnyịn ndida Bible nnam n̄kpọ ke utom ukwọrọikọ nnyịn utu ke ikpîkpu editịn̄ mban̄a mme ibuotikọ oro nnyịn imade. (Heb. 4:12) Sia ata ediwak owo ẹnyenede esisịt ifiọk ẹban̄a Bible, oyom nnyịn ikot ito enye man iwụt mmọ eti ndausụn̄ oro enye ọnọde ye ini iso oro enye akamade ọnọ ubonowo.
3 Kot Nnennen to Bible: Edieke mme owo ke n̄kann̄kụk fo ẹnyenede eyịghe ndikụt mme owo ẹkamade ẹkpat n̄wed ẹkwọrọ ikọ, afo emekeme ndidomo nditre ndikama ekpat n̄wed n̄ka ukwọrọikọ. Afo emekeme ndisịn mme n̄wed oro afo oyomde ndinọ ke ekpri ekpatubọk onyụn̄ akama Bible ke ubọk m̀mê ke ekpat ọfọn̄. Ndien, ke ini enyenede nneme ye owo, afo emekeme ndisio Bible ndi ye unana edinam owo oro ekere ke afo odomo ndikwọrọ ikọ. Da ke usụn̄ oro andikpan̄ utọn̄ nnọ fi ekemede nditiene n̄kot Bible fo. Emekeme ndidọhọ enye okot ufan̄ikọ kiet uyo ọwọrọ. Eyenen̄ede otụk enye ke ini enye okotde se Bible etịn̄de ke idemesie utu ke ndikop ke inua fo kpọt. Nte ededi, man an̄wam enye ọfiọk akpan n̄kpọ ke itien̄wed emi, sọn̄ọ tịn̄ mme ikọ oro ẹkamade ekikere.
4 Nneme Oro Ẹkotde Itie N̄wed Abasi Kiet: Ke ama eketịn̄ owo oro afo edide, afo emekeme ndidọhọ: “Mme owo ẹberi edem ke nsio nsio ebiet kaban̄a ndausụn̄ ke uwem mmọ. Afo ekere ke ewe edi mfọnn̄kan ebiet emi eti ndausụn̄ otode? [Bet ibọrọ.] Ekere didie aban̄a ikọ emi? [Kot Mme N̄ke 2:6, 7, nyụn̄ bet ibọrọ.] Ẹkụt nte ọniọn̄ owo enen̄erede ekpri, anamde ediwak owo ẹnana idotenyịn. Nte ededi, ẹkụt nte ọniọn̄ Abasi edide se ẹberide edem onyụn̄ enyenede ufọn kpukpru ini.” Ekem wụt n̄wed oro ọnọde, nyụn̄ wụt uwụtn̄kpọ kiet ke esịt esie nte ọniọn̄ Abasi enyenede ufọn.
5 Jesus ama ada N̄wed Abasi an̄wam mbon esịt akpanikọ. (Luke 24:32) Paul ama ada N̄wed Abasi ọsọn̄ọ mme n̄kpọ oro enye ekekpepde. (Utom 17:2, 3) Mbuọtidem ye idatesịt nnyịn ke utom ukwọrọikọ ọyọkọri nte nnyịn idiọn̄de-diọn̄ inyene usọ ke nditịm nsiak Ikọ Abasi.