Wụt Edinam Akpanikọ Christian ke Ini Ẹsiode Iman Ẹfep
1. Nso idaha ikeme ndisịn edinam akpanikọ Christian ke udomo?
1 Mbọbọ oro odude ke ufọt mme andibuana ke ubon ekeme ndinen̄ede n̄kop odudu. Emi esisịn Christian ke udomo ke ini ẹsiode nsan̄a ndọ, eyen, ete m̀mê eka, m̀mê n̄kpet n̄kpet iman efen ẹfep m̀mê ke ini kiet ke otu mmọ ọkpọn̄de esop ke idemesie. (Matt. 10:37) Didie ke mme anam-akpanikọ Christian ẹkpenam n̄kpọ ye utọ iman oro? Nte akpanam n̄kpọ ke usụn̄ efen edieke owo oro odụn̄de ufọk kiet ye afo? Akpa kan̄a, ẹyak nnyịn ise se Bible etịn̄de aban̄a n̄kpọ emi, mme edumbet emi ẹbuanade mbon oro ẹsiode ẹfep ye mbon oro ẹkpọn̄de esop ke idemmọ.
2. Nte Bible ọdọhọde, didie ke mme Christian ẹnyene ndinam n̄kpọ ye mbon oro ẹbịnde ẹfep ke esop?
2 Nte Ẹkpenamde N̄kpọ ye Mbon Oro Ẹbịnde Ẹfep: Ikọ Abasi owụk mme Christian ete ẹtre ndidụk ndụk m̀mê ndinyene ebuana ye mbon oro ẹbịnde ẹfep ke esop: “Ẹkûdụk ndụk ye owo ekededi emi ẹkotde enye eyen-ete, emi edide owo use, m̀mê esịn esịt ke n̄kpọ owo, m̀mê okpono ndem, m̀mê owo idiọk inua, m̀mê oyụhọ mmịn, m̀mê owo n̄kan-ubọk; ẹkûnyụn̄ ẹdia n̄kpọ ye orụk owo oro. . . . Ẹsio oburobụt owo oro ke otu mbufo ẹfep.” (Sịghisịghi ubọkn̄wed edi eke nnyịn; 1 Cor. 5:11, 13) Ikọ Jesus oro ẹwetde ke Matthew 18:17 enyene ebuana n̄ko ye n̄kpọ emi: “Yak [owo oro ẹbịnde ẹfep] etie fi ke enyịn nte owo mme idụt ye publican [“ọbọ a-tax,” NW].” Mme andikpan̄ utọn̄ nnọ Jesus ẹma ẹnen̄ede ẹfiọk ẹte ke mme Jew eke ini oro ikodụkke ndụk ye mme Gentile ye nte ke mmọ ẹma ẹsọn mme ọbọ a-tax nte mbon oro ẹbịnde ẹsio ke obio. Ntem Jesus ọkọnọ mme anditiene enye item ete ẹtre ndidụk ndụk ye mbon oro ẹbịnde ẹfep.—Se Enyọn̄-Ukpeme eke February 1, 1982, page 18-20.
3, 4. Nso ebuana ke ẹkpan ndinyene ye mbon oro ẹsiode ẹfep ọkọrọ ye mbon oro ẹkpọn̄de esop ke idemmọ?
3 Emi ọwọrọ ke mme anam-akpanikọ Christian inyeneke ebuana eke spirit ye owo ekededi oro ẹbịnde ẹfep ke esop. Edi oyom se ikande oro. Ikọ Abasi ọdọhọ ete ke nnyịn ikpenyeneke ‘ndidia n̄kpọ ye orụk owo oro.’ (1 Cor. 5:11) Ntem, nnyịn n̄ko inyene ndifep ebuana otu ye owo oro ẹbịnde ẹfep. Emi akpan ndisan̄a ye enye n̄ka isan̄ unọ idem inemesịt, usọrọ, mbre bọl, m̀mê ndisan̄a ye enye n̄ka urua m̀mê akwa efe ndise m̀mê ndisụhọde ntie ndia udia ye enye ke ufọk m̀mê ke itie unyamudia.
4 Nso kaban̄a nditịn̄ ikọ ye owo oro ẹsiode ẹfep? Ke adan̄aemi Bible mîtịn̄ke kpukpru n̄kpọ, 2 John 10 an̄wam nnyịn ndifiọk ekikere Jehovah ke n̄kpọ emi: “Edieke owo ekededi edide ke ọtọ mbufo, mînyụn̄ idaha ukpep-n̄kpọ emi idi, ẹkûda enye ẹsịn ke ufọk, ẹkûnyụn̄ ẹkọm enye.” Ke etịn̄de aban̄a emi, Enyọn̄-Ukpeme eke February 1, 1982, page 25, ọdọhọ ete: “Ñkukure ndidöhö owo ‘Mmököm-o’ ekeme ndidi akpa edinam oro ököride osim edineme neme ndien ekeme ndisim idem edidi ufan. Nte nnyịn ikpoyom ndida akpa edinam oro ye owo oro ema ekesio efep?”
5. Ke ini ẹsiode owo ẹfep, nso ke owo oro ọduọk?
5 Ke akpanikọ, edi kpa nte page 31 ke nsiondi Enyọn̄-Ukpeme oro ọdọhọde: “Akpanikö edi nte ke ini Christian ayakde idemesie önö idiökñkpö ndien enyenede ndidi se esiode efep, enye öduök ekese ñkpö: idaha esie oro Abasi onyimede; . . . edinem ebuana esie ye nditö-ete, ökörö ye ekese nsan̄a oro enye ekenyenede ye me iman oro edide Christian.”
6. Ndi oyom Christian etre kpukpru ebuana ye iman oro ẹsiode ẹfep oro odụn̄de ye ubon? Nam an̄wan̄a.
6 Ke Ubon: Nte emi ọwọrọ ke mme Christian oro ẹdụn̄de ufọk kiet ye andibuana ke ubon oro ẹsiode ẹfep inyeneke nditịn̄ ikọ, ndidia udia, m̀mê ndisan̄a kiet ye owo oro ke adan̄aemi ẹnamde mme mbubehe eke usen ke usen? Enyọn̄-Ukpeme eke April 15, 1991, ke ikọ idakisọn̄ oro odude ke page 22, ọdọhọ ete: “Edieke iman oro ẹkesiode ẹfep odude ke ubon Christian, owo oro eyesụk edi ubak ke mme mbubehe ye mme edinam ubon eke usen ke usen.” Ntem, mbonubon ẹnyene ndibiere udomo oro mmọ ẹdiyakde andibuana ke ubon oro ẹma ẹkesio ẹfep etiene abuana ke ini ẹdiade n̄kpọ m̀mê ke mme edinam eken ke ubon. Edi kpa ye oro, mmọ idiyomke ndinam nditọete emi ẹdide mme ufan mmọ ẹkere nte ke kpukpru n̄kpọ ẹdi ukem ukem nte ẹkedide mbemiso ẹkesiode enye ẹfep.
7. Didie ke ebuana eke spirit ke esịt ufọk okpụhọde ke ini ẹsiode andibuana ke ubon ẹfep?
7 Nte ededi, Enyọn̄-Ukpeme eke February 1, 1982, page 28 etịn̄ ntem aban̄a owo oro ẹsiode ẹfep m̀mê oro ọkpọn̄de esop ke idemesie: “Ebahare akpa edidiana kiet eke spirit oro okodude efep ofụri-ofụri. Emi edi akpanikö kabaña idem m’iman esie, ökörö ye mö oro edude ke mkpet-mkpet otu ubon esie. . . . Oro ediwörö me ukpuhöre ke ebuana eke spirit oro ekemede ndikodu ke ufök. Ke uwutñkpö, edieke esiode ebe efep, ñwan ye nditö idikopke inem ye enye ndinim ukpepñkpö Bible eke ubon me ndida ubon usuñ ke edikot Bible ye akam. Edieke enye oyomde ndiböñ akam, utö nte ke ini udia, enye enyene unen ndinam ntre ke ufök esie. Edi mö ekeme ndiböñ me akam ekemö nö Abasi ke ndopuyo. (N̄ke 28:9; Ps. 119:145, 146) Edi nso edieke owo oro ekesiode efep oro oduñde ke ufök oro oyomde ndidu ke itie kini ubon ekotde Bible ötökiet me enyenede ukpepñkpö Bible? Mö eken ekeme ndiyak enye odu ke itie ndikpañ utöñ edieke enye mididomoke ndikpep mö me ndibuana ekikere ido-ukpono esie.”
8. Nso mbiomo ke mme ete ye eka oro ẹdide Christian ẹnyene kaban̄a ekpri eyen oro ẹsiode ẹfep emi odụn̄de ye ubon?
8 Edieke ẹsiode ekpri eyen emi odụn̄de ye ubon ẹfep, osụk edi mbiomo ete ye eka oro ẹdide Christian ndibọk enye. Enyọn̄-Ukpeme eke November 15, 1988, page 20, ọdọhọ ete: “Ukem nte mmọ ẹdikade iso ndinọ enye udia, ọfọn̄, itie udak-ibuot, oyom mmọ ẹnọ enye ukpep ẹnyụn̄ ẹtụnọ enye nte ekemde ye Ikọ Abasi. (Mme N̄ke 6:20-22; 29:17) Ima ima ete ye eka ẹkeme ke ntem ndidiomi ndinyene ukpepn̄kpọ Bible ye enye ke ufọk, idem edieke ẹsiode enye ẹfep ke esop. Ekeme ndidi enye eyebọ mfọn n̄kan edinen̄ede ke mmọ ndikpep n̄kpọ ye enye ikpọn̄. Mîdịghe, mmọ ẹkeme ndibiere nte ke enye ekeme ndikaiso mbuana ke ndutịm ukpepn̄kpọ ubon.”—Se n̄ko Enyọn̄-Ukpeme eke October 1, 2001, page 16-17.
9. Adan̄a didie ke Christian ekpenyene ebuana ye iman oro ẹsiode ẹfep oro mîdụn̄ke ye ubon?
9 Mme Iman Oro Mîdụn̄ke ye Ubon: Enyọn̄-Ukpeme eke April 15, 1988, page 27 ọdọhọ ete: “Idaha oro okpụhọde edieke owo oro ẹsiode ẹfep m̀mê ọwọrọde ke idemesie, edide iman emi odụn̄de ke ebiet efen ọkpọn̄ ubon ye ufọk oro. Ekeme ndidi se ẹtrede ndinyene ebuana ekededi ye iman oro. Idem ekpedi odu ndusụk n̄kpọ ke ubon oro oyomde enye abuana, ke akpanikọ ẹyenam enye osụhọde ubọk,” nte asan̄ade ekekem ye edumbet Abasi oro nte yak “ẹkûdụk ndụk ye owo ekededi” oro eduede isop idiọkn̄kpọ mînyụn̄ ikabakede esịt. (1 Cor. 5:11) Mme anam-akpanikọ Christian ẹkpenyene ndidomo ndifep ebuana oro mîdotke ye utọ iman oro, idem ẹnamde ata esisịt mbubehe ye enye.—Se n̄ko Enyọn̄-Ukpeme eke February 1, 1982, page 29-30.
10, 11. Nso ke Christian edikere aban̄a mbemiso ayakde iman oro ẹsiode ẹfep edidụn̄ ye ubon?
10 Enyọn̄-Ukpeme oro etịn̄ aban̄a idaha efen oro ekemede ndidemede: “Nso edieke esiode mkpet-mkpet iman efep, utö nte eyeneren me ete me eka oro miduñke ke ufök oro, ndien ke ntre oyomde ndifiak nyöñ ndi ufök? Ubon oro ekeme ndibiere se ekpenamde ököñöde ke idaha oro odude. Ke uwutñkpö, ete me eka oro ema ekesio efep ekeme ndidöñö midighe ikemeke ndise aba mbaña idemesie ke okụk me ke ñkañ eke ikpökidem. Nditö Christian enyene mbiomo eke ido-uwem ye eke Ñwed Abasi ndinö uñwam. (1 Tim. 5:8) . . . Se enamde ekeme ndiköñö ke me ñkpö nte me akpan udöñ ete me eka oro, edu esie ye ukpono oro ibuot ufök oro enyenede abaña nsöñidem eke spirit ofuri ubon.”—Enyọn̄-Ukpeme eke February 1, 1982, page 28-29.
11 Amaedi eyen, ibuotikọ oro aka iso ete: “Ke ndusuk ini ete ye eka Christian ema efiak eda eyen oro ema ekesio efep oro öködöñöde ke ikpökidem me ke ntuk esin ke ufök ke ekpri ini. Edi ke ebiet kiet-kiet ete ye eka oro ekeme ndidomo m’idaha eyen oro nse. Nte eyen oro esiode efep ekese abaña idemesie, ndien nte enye ikemeke ndinam ntre aba idahaemi? Midighe nte enye oyom ndinyöñ ndi ñkukure koro emi eyedi mem-mem usuñ udu uwem? Nso kabaña ido-uwem ye ekikere esie? Nte enye eyeda ‘leaven’ edi ufök?—Gal. 5:9.”
12. Nso idi ndusụk ufọn oro ndutịm edisio owo mfep enyenede?
12 Mme Ufọn Edinam Akpanikọ nnọ Jehovah: Ufọn odu nditiene ndutịm N̄wed Abasi nte ẹsio mme anamidiọk oro mîkabakede esịt ẹfep ẹnyụn̄ ẹdian̄ade ẹkpọn̄ mmọ. Enye ekpeme edisana idaha esop onyụn̄ anam nnyịn idi isio nte mbon oro ẹmụmde mme n̄kokon̄ idaha ido uwem Bible ẹkama. (1 Pet. 1:14-16) Enye ekpeme nnyịn osio ke mme mbiara odudu. (Gal. 5:7-9) Enye n̄ko ọnọ anamidiọk oro ifet ndibọ ufọn ọyọhọ ọyọhọ nto ntụnọ oro enye ọbọde, emi ekemede ndin̄wam enye ‘on̄wụm mfri emem, kpa edisana ido.’—Heb. 12:11.
13. Nso ukpụhọde ke ubon kiet akanam, ndien ye nso utịp?
13 Ke ẹma ẹkekop utịn̄ikọ kiet ke mbono circuit, eyenete eren kiet ye eyeneka esie an̄wan ẹma ẹdikụt nte ke oyom mmimọ inam ukpụhọde ke nte ikanamde n̄kpọ ye eka mmimọ oro ẹma ẹkesio ẹfep ke isua itiokiet oro ẹkebede emi okonyụn̄ odụn̄de isio. Ke ndondo oro ẹnyọn̄ọde mbono oro, eren oro ama okot eka esie, ndien ke ama ọkọnọ enye nsọn̄ọ nte ke mmimọ ke imama enye, enye ama anam an̄wan̄a nte ke mmimọ iditịn̄ke ikọ aba ye enye ibọhọke ata akpan n̄kpọ etịbe ke ubon oro oyomde isobo ye enye. Esisịt ini ke oro ebede, eka esie ama ọtọn̄ọ ndidụk mme mbono esop ndien ke akpatre ẹma ẹfiak ẹda enye. N̄ko ebe esie emi mîkedịghe andinịm ke akpanikọ ama ọtọn̄ọ ndikpep n̄kpọ ndien nte ini akakade ama ana baptism.
14. Ntak emi nnyịn ikpanamde akpanikọ ke ndidiana kiet ye ndutịm edisio mfep?
14 Ndinam akpanikọ ke ndidiana kiet ye ndutịm edisio mfep nte ẹwụtde ke N̄wed Abasi owụt ima oro nnyịn imade Jehovah onyụn̄ ọnọ enye se ọbọrọde owo eke osụn̄ide Enye. (N̄ke 27:11) Nte utịp, nnyịn imekeme nditịm nnịm ke iyenyene edidiọn̄ Jehovah. Edidem David ama ewet aban̄a Jehovah ete: “Ama onyụn̄ edi mme ewụhọ esie, n̄wahake n̄kpọn̄ mmọ. Afo [“ayanam akpanikọ ye mbon akpanikọ,” NW].”—2 Sam. 22:23, 26.