Un̄wam ke Nnennen Ini
1 Ke ini apostle Peter ọkọfiọkde ke oyom ẹsọn̄ọ ekemmọ mme andinịm ke akpanikọ idem, udọn̄ emi enye ekenyenede aban̄a mmọ ama onụk enye ndinọ mmọ ima ima n̄kpọ editi ye nsịnudọn̄. (2 Pet. 1:12, 13; 3:1) Enye ama esịn udọn̄ ọnọ ‘mmọ emi ẹkebọde mbuọtidem’ ndika iso n̄kọri mme edu eke spirit mbak ẹdikabade ‘ẹtie ifu, ẹnyụn̄ ẹnana mfri ke edifiọk Ọbọn̄ nnyịn Jesus Christ.’ (2 Pet. 1:1, 5-8) Uduak Peter ekedi ndin̄wam mmọ ẹnam ikot oro Jehovah okokotde mmọ ye edimek mmọ ẹsọn̄ọ ẹda, man otodo mmọ ‘ẹtie ke emem, ẹnana ntọi ẹnyụn̄ ẹnana ndo.’ (2 Pet. 1:10, 11; 3:14) Nsịnudọn̄ esie ekedi un̄wam ke nnennen ini ọnọ ediwak owo.
2 Mfịn, mme esenyịn Christian ẹnyene ukem udọn̄ oro ke idem ikọt Abasi. Ke “ndiọkeyo” emi, ediwak mme asan̄autom Jehovah ẹnyene ndiyọ mme idiọk idaha. (2 Tim. 3:1) Ke ntak unana okụk, mfịna ubon, m̀mê mme ọkpọkpọ mfịna oro ẹkade-ka iso, ekeme nditie ndusụk owo ke idem nte eketiede David: “Mme idiọk-n̄kpọ eke mînyeneke ibat [ẹkan] mi ẹkụk: mme idiọk ido mi ẹmesịm mi, ndien n̄kemeke ndikụt n̄kpọ; mmọ ẹwak ẹkan idet ibuot mi: ndien esịt ọmọduọ mi.” (Ps. 40:12) Mme mfịghe emi ẹkeme ndikpon tutu ẹnam utọ mbon emi ẹfụmi mme akpan n̄kpọ eke spirit ẹnyụn̄ ẹtre ndinen̄ede nnyene ebuana ke utom ukwọrọikọ Christian. Edi kpa ye mme mfịna mmọ, ‘mmọ ifreke mbet Jehovah.’ (Ps. 119:176) Nnennen ini edi emi mbiowo ndinọ utọ mbon emi un̄wam oro ẹyomde.—Isa. 32:1, 2.
3 Man ẹsịm se ẹyomde emi, ẹsịn udọn̄ ẹnọ mbiowo ndisịn san̄asan̄a ukeme ndin̄wam mbon oro mîbuanake ke utom ukwọrọikọ idahaemi. Ke ẹsịn akpan ukeme ndinam emi idahaemi ndien ẹyeka iso ndinam tutu esịm March. Ẹdọhọ mme esenyịn ukpepn̄kpọ n̄wed ẹka ẹkese mbon oro mîwọrọke an̄wautom aba man ẹn̄wam mmọ ke n̄kan̄ eke spirit ẹnyụn̄ ẹn̄wam mmọ ẹfiak ẹtọn̄ọ utom ye esop. Edieke odotde, ẹkeme ndidiomi ndinịm ukpepn̄kpọ Bible ye owo oro. Ẹkeme ndidọhọ mbon efen ẹn̄wam. Edieke ẹdọhọde fi an̄wam, ukeme oro afo esịnde ekeme ndinen̄ede nnyene ufọn, akpan akpan edieke afo adade mfọnido ye mbufiọk ọnọ nsịnudọn̄.
4 Kpukpru owo ẹnyene ntak ndikop idatesịt ke ini owo afiakde ọtọn̄ọ utom ye esop. (Luke 15:6) Ke akpanikọ, ukeme oro nnyịn isịnde man isịn udọn̄ inọ mbon oro mîwọrọke an̄wautom aba ekeme ndisụn̄ọ ke “ikọ eke ẹtịn̄de ke ekem ini.”—N̄ke 25:11.