Vidio Oro Edikpepde Fi N̄kpọ Onyụn̄ Esịn Udọn̄ Ọnọ Fi!
Ekedi ke April 1951. Ẹma ẹtan̄ ediwak tọsịn Mme Ntiense Jehovah ke akani Soviet Union—kpukpru ubon—ke nsio nsio itie, ke moto mbiomo ẹka ntan̄mfep ke Siberia. Ntak emi okopodudu ukara Soviet ekebierede ndisobo mmọ mfep-e? Nditọete nnyịn ẹkesan̄a didie ẹbọhọ ẹnyụn̄ ẹkọri ke ediwak isua kpa ye uyịre uyịre ukọbọ? Afo oyokụt mme ibọrọ ke vidio Faithful Under Trials—Jehovah’s Witnesses in the Soviet Union. Se enye, nyụn̄ yak etop esie oro ekpepde owo n̄kpọ esịn udọn̄ ọnọ fi ndika iso nnam akpanikọ nnọ Jehovah, inamke n̄kpọ m̀mê nso itịbe!
Nte afo emekeme ndibọrọ mme mbụme emi? (1) Ini ewe ke ẹkenọ Mme Ntiense Jehovah ke Russia unyịme? (2) Mbemiso ye ke Ekọn̄ Ererimbot II ama okokụre, didie ke mbon Soviet Union ẹkedi ẹdinyene ediwak ubon Mme Ntiense efen efen? (3) Didie ke mme edinịm ke akpanikọ mmọ ẹketuaha ye ukpepn̄kpọ akwaifiọk Lenin? (4) Nso ikedi Ediomi Edem Edere (Operation North), ndien nso ke Stalin akaduak ndida enye nnam? (5) Nso ke ntan̄mfep ọkọwọrọ ọnọ Mme Ntiense, ndien nso ke ẹkedọhọ mmọ ẹnam mbak ẹditan̄ mmọ ẹka ntan̄mfep? (6) Ke ini ẹkesan̄ade anyan usụn̄ ke tren ẹka Siberia, didie ke nditọete nnyịn ẹkesịn udọn̄ ẹnọ kiet eken ẹnyụn̄ ẹnam idem akpa mme andimụm mmọ? (7) Nso n̄kpọ mmọn̄eyet ke Mme Ntiense ẹkeyọ ke Siberia? (8) Ewe ndutịm eke spirit ke ikọt Jehovah ẹkenen̄ede ẹda ke akpan n̄kpọ, ndien ntak-a? (9) Ntak emi nditọete nnyịn ẹkenyịmede ndisịn uwem mmọ ke itiendịk ke ntak mme n̄wed mmọ, ndien didie ke mmọ ẹkekan kpa ye oro ukara ekesịnde ọkpọsọn̄ ukeme nditre mmọ ndibọ mme n̄wed oro? (10) Didie ke Khrushchev akaka iso ndin̄wana ye ikọt Abasi? (11) Didie ke ukara okodomo ndibiat mbuọtidem nditọ Mme Ntiense? (12) Nso in̄wan̄-in̄wan̄ ifiọk ke nditọete nnyịn ẹkenyene ẹban̄a ntak oro ẹkekọbọde mmọ? (2002 Yearbook, page 203-204) (13) Didie ke ọkpọsọn̄ en̄wan oro mme andikọbọ ẹken̄wanade ye esop Abasi okokpu? (2002 Yearbook, page 220-221) (14) Mme n̄kpọ ewe ke Mme Ntiense ke akani Soviet Union ẹkedi ẹdinyene oro ke akpa ẹkedide ikpîkpu idotenyịn? (15) Nso ikan̄wam nditọete nnyịn ndiyọ mme ukọbọ oro mmọ ẹkesobode, ndien didie ke akpatre ikpehe vidio emi osu se ẹwetde ke Jeremiah 1:19? (16) Bụk ata ifiọk n̄kpọntịbe aban̄ade edinam akpanikọ ke idak idomo oro enen̄erede otụk fi.