Jehovah Odot nte Ẹtorode Etieti
Ẹdinịm Udia Mbubịteyo Ọbọn̄ ke April 16
1 Udọn̄ enen̄ede ọkọri nte isan̄ade ikpere April 16, 2003. Nnyịn iyeti n̄kpa Jesus ke mbubịteyo usen oro, idianade ye ediwak miliọn ekemmọ mme andituak ibuot ke ofụri ererimbot inọ enyịn̄ Jehovah ubọn̄. Jehovah odot ndibọ kpukpru itoro nnyịn ke ntak utịbe utịbe enọ ufak emi. Ebede ke ufak emi, enye ọyọnọ ofụri okopitem ubonowo mme utịbe utịbe edidiọn̄. Nnyịn iyadiana ye andiwet psalm ifiori ke ofụri esịt ite: “Jehovah omokpon, onyụn̄ odot nte ẹtorode enye eti-eti.”—Ps. 145:3.
2 Emi edi ini nditie n̄kere eti ido Abasi ye udomo esịtekọm oro inyenede inọ Jehovah ke ntak “okosiode edibon Eyen Esie kierakiet ọdọn̄ ke ererimbot, kpan̄ nnyịn ikpodu uwem oto ke Enye.” (1 John 4:9, 10) Ndikop item nnịm Udia Mbubịteyo Ọbọn̄ enen̄ede eti nnyịn nte ke “Jehovah enyene esịt ufọn ye mbọm . . . okpon ima.” (Ps. 145:8) Ke akpanikọ, ufak edi akakan usụn̄ emi Jehovah owụtde ima oro enye amade ofụri ubonowo. (John 3:16) Ke ini nnyịn ikerede iban̄a ima Abasi, ye nsọn̄ọnda Jesus, onụk nnyịn nditoro Jehovah. Ke nsinsi nsinsi, nnyịn iyotoro enye kaban̄a anana-utịt ima esie oro enye adade anam nnyịn ikeme ndinyene nsinsi uwem.—Ps. 145:1, 2.
3 N̄wam Mbon En̄wen Ẹtoro Jehovah: Ndiwụt esịtekọm mban̄a akakan enọ ufak emi Abasi ọnọde onụk nnyịn ndikot mbon efen ẹtiene nnyịn ẹtoro Jehovah. Ẹma ẹnọ andiwet psalm odudu spirit ndiwet ete: “Mmọ ẹneme ẹban̄a nte ẹtide akwa ufọn fo, ẹnyụn̄ ẹkwọ eti ido fo.” (Ps. 145:7) Isua oko kpọt, Mme Ntiense Jehovah ke ofụri ererimbot ẹma ẹsịn se iwakde ibe biliọn hour kiet ke utom ukwọrọikọ. Nso ikedi utịp ukeme oro mmọ ẹkesịnde? Ke urua kiet kiet, ke ẹbaharede ukem ukem, se iwakde ibe owo 5,100 ẹkena baptism ke uyarade uyakidem mmọ nnọ Jehovah. Ye owo 15,597,746 oro ẹkedụkde Editi, esịnede se ibede miliọn owo 9 oro mîtọn̄ọke kan̄a nditoro Jehovah nte mme asuanetop eti mbụk, idotenyịn odu kaban̄a n̄kaiso n̄kọri! Nte mme anditan̄a Obio Ubọn̄, nnyịn imama ifet oro inyenede nditan̄a eti mbụk nnyụn̄ n̄wọn̄ọde esịt mbon efen nnọ Jehovah, Eyen esie, ye Obio Ubọn̄.
4 Eti usụn̄ ndisịn udọn̄ nnọ mbon efen ẹtoro Jehovah edi ndinọ mmọ ikot ndidiana ye nnyịn nnịm Udia Mbubịteyo Ọbọn̄. Nte emewet enyịn̄ mbon oro afo oyomde ndikot ọkọrọ ye mbon oro ẹdiyomde ẹti mmimọ usen ye ini ẹdinịmde? Nte ọmọnọ kpukpru owo oro ekewetde enyịn̄ mmọ ikot? Edieke mûkanamke ntre, kụt ete ke emesịn ifịk ada ini emi osụhọde mi anam oro. Nam mmọ ẹfiọk uduak usọrọ emi. Sọp ndikọm isenowo ke itie usọrọ oro. Nam mmọ ẹkụt ke ẹdara mmimọ, da mmọ wụt mbon efen, nyụn̄ toro mmọ ban̄a edidi mmọ.
5 Ndidụk editi ekeme ndidemede udọn̄ mbufa owo ndinam n̄kọri ke n̄kan̄ eke spirit. Eyen ukpepn̄kpọ Bible kiet oro ekesikopde ndịk ke etide ubiak ubiak n̄kpọ oro eketịbede, emi akanamde edi ọkpọsọn̄ n̄kpọ ọnọ enye ndika ebiet emi owo ẹwakde, ama edi Editi. Ke ini ẹkebụpde enye nte mboho oro eketiede, enye ọkọdọhọ: “Enye ekedi okoneyo oro ekenyenede uten̄e akan, ndien ami mma ndu do.” Ọtọn̄ọde ke usen oro enye ama ọtọn̄ọ ndidụk mme mbono esop.
6 Ke Editi Ama Ekebe: Nso ke ẹkeme ndinam man ẹn̄wam mbon oro ẹnyenede udọn̄ mi ndikabade ndi mme anditoro Jehovah? Mbiowo ẹyetịn̄ enyịn ẹse mbufa owo oro ẹdụkde Editi ẹnyụn̄ ẹnam ndutịm man mme asuanetop oro ẹdotde ẹsọp ẹka ẹkese mmọ ẹnyụn̄ ẹdụn̄ọde mme akpan n̄kpọ oro mmọ ẹkekpepde ẹnyụn̄ ẹkụtde. Ndusụk mmọ ẹkeme ndiyom ẹtọn̄ọ ukpepn̄kpọ Bible ye mmimọ. Ẹkpenyene n̄ko ndikot mmọ ẹdidụk kpukpru mme mbono esop eke urua ke urua, sia mmọ ndidụk kpukpru in edinamde ifiọk Bible mmọ ọkọri.
7 Ke ẹnam ndutịm ndisịn udọn̄ nnọ kpukpru mbon oro mîsiwọrọke an̄wautom kpukpru ọfiọn̄ ye mbon oro mîwọrọke an̄wautom aba man mmọ ẹsidụk mme mbono esop kpukpru ini. Edieke mbiowo ẹdọhọde fi an̄wam owo emi mîwọrọke an̄wautom aba nditọn̄ọ ndiwọrọ an̄wautom, nyịme ndinam ntre. Ndiwụt utọ ima ima udọn̄ emi nnọ nditọete nnyịn odu ke n̄kemuyo ye item apostle Paul emi: “Adan̄a nte ikụtde ifet, ẹyak nnyịn ifọn ido ye kpukpru owo, akpan-akpan ye mmọ emi ẹtode ke ufọk mme andinịm ke akpanikọ.”—Gal. 6:10.
8 Kpukpru nnyịn ikpakam isịn san̄asan̄a ukeme ndidụk Editi ke April 16. Nnyịn idiyomke nditaba ndida ata edisana edinam emi ntoro Jehovah. Ih, ẹyak nnyịn itoro Jehovah iban̄a akwa utom esie idahaemi ye ke nsinsi nsinsi!—Ps. 145:21.