Mme Mfiakn̄ka Ẹda Ẹsịm Mme Ukpepn̄kpọ Bible
1. Ntak emi utom mfiakn̄ka edide ata akpan n̄kpọ?
1 Jesus ikọdọn̄ke mme anditiene enye ẹkekwọrọ ikọ kpọt edi n̄ko ‘ẹkenam mbet, ẹnyụn̄ ẹkpep mmọ n̄kpọ.’ (Matt. 28:19, 20) Ọkwọrọikọ esinọ ntọt, edi andikpep esinam se ikande oro. Enye esiteme, anam an̄wan̄a, onyụn̄ ọnọ mme ntak. Usụn̄ kiet oro nnyịn ikpepde mbon en̄wen edi ke ndifiak n̄ka n̄kese mbon oro ẹnyenede udọn̄ ye uduak editọn̄ọ ukpepn̄kpọ Bible ye mmọ.
2. Mmanie ke nnyịn ikpafiak ika ikese?
2 Mmanie ke afo akpafiak aka ekese? Kụt ete ke amafiak aka ekese kpukpru mbon oro ẹbọde n̄wed m̀mê oro ẹkam ẹwụtde ata esisịt udọn̄ ke eti mbụk. Edieke afo okụtde ke owo enyene udọn̄ ke ini ọnọde ikọ ntiense ke eferife, domo ndibọ adres m̀mê nọmba urụk ukopikọ owo oro man otodo afo akpanam udọn̄ oro ọkọri. Dori enyịn nditọn̄ọ mme ukpepn̄kpọ Bible. Ka iso ndiyom mbon oro ẹdinyịmede afo enịm ukpepn̄kpọ Bible ye mmimọ, ndien afo oyokụt mmọ.—Matt. 10:11.
3, 4. Nso ibuana ke ndinam mme mfiakn̄ka oro ẹnyenede uforo?
3 Wụt Ọkpọkpọ Udọn̄: Ẹsịn itiat idakisọn̄ ẹnọ mfiakn̄ka oro enyenede uforo ke akpa ediwaha. Mme ọkwọrọ eti mbụk oro ẹkụtde unen ẹsifiọk mme n̄kpọ oro ẹdemerede enyeneufọk udọn̄, ndien mmọ ẹsida oro nte isọn̄ kaban̄a n̄kaiso nneme. Ndusụk owo ẹsikụt ke ọfọn ndibụp mbụme ke utịt mfiakn̄ka ndidemede udọn̄ enyeneufọk man mmọ ẹkpefiak ẹdi. Udọn̄ ofụri esịt oro inyenede ke idem mme owo esinam nnyịn ika iso ikere iban̄a mmọ idem ke ima ikọnyọn̄, esinyụn̄ onụk nnyịn ndifiak n̄ka ye unana ubiatini. Edieke ekemede, domo ndifiak n̄ka ke ini udọn̄ osụk edide obufa obufa—iso-ọfọn ke ufan̄ usen kiet m̀mê iba.
4 Ke ini afiakde aka, domo ndika iso ke akpa nneme. Nam edi utịtmbuba fo ndibuana ke nsụhọde n̄kaha akpan n̄kpọ kiet ke N̄wed Abasi oro ọbọpde-bọp ke ini kiet kiet oro akade, nyụn̄ kpan̄ utọn̄. Domo ndinen̄ede mfiọk enyeneufọk. Ekem ke mme mfiakn̄ka ini iso, neme mme akpanikọ ẹtode Ikọ Abasi emi ẹnen̄erede ẹtụk mme mfịna esie.
5. Mmemmem usụn̄ ewe ke ẹkeme ndida ntọn̄ọ ukpepn̄kpọ Bible?
5 Nyene Udọn̄ Nditọn̄ọ Mme Ukpepn̄kpọ Bible: Nam mfiakn̄ka ye uduak editọn̄ọ ukpepn̄kpọ Bible. Didie ke ẹkeme ndinam emi? Dọhọ enyene-ufọk ete ke imọ ikpama ndibuana akpan n̄kpọ udọn̄ kiet, nyụn̄ kụbọde ka ikpehe ekikere kiet ke n̄wed Ifiọk m̀mê ediye uduot ekpri n̄wed Oyom oro afo ekerede ke eyedemede owo oro udọn̄. Kot ikpehe ekikere oro, bụp mbụme, nyụn̄ neme itie N̄wed Abasi kiet m̀mê iba oro ẹsiakde ẹsịn. Ẹkeme ndinam emi ke enyịnusụn̄ ke minit ition esịm duop. Beri ke ndibụp mbụme oro etienede nyụn̄ nam ndutịm ndika iso ke nneme oro ini efen.
6. Didie ke nnyịn ikeme ndiwụt ke nnyịn imọfiọk ufọn edinam mme mfiakn̄ka?
6 Ndinam kpukpru udọn̄ oro ikụtde ọkọri edi akpan ikpehe utom ukwọrọikọ nnyịn. Ke ntre, sio ini ke ndutịm fo eke urua ke urua nịm nọ mme mfiakn̄ka. Ndinam ntre ayanam utom ukwọrọikọ fo enen̄ede enyene uforo onyụn̄ ada ata idatesịt edi.