Leta N̄kọk Itieutom

Ndima Mme Asuanetop Obio Ubọn̄:

“N̄kọri oto Abasi.” (1 Cor. 3:6) Edi n̄kpọ nduaidem didie ntem ndikụt n̄kọri oro adade itie ke an̄wautom Nigeria! Ke isua utom 2003, ẹma ẹtọn̄ọ se iwakde ibe mbufa ukpepn̄kpọ Bible 90,000. Emi odot itoro.

Jehovah ke ọdiọn̄ ndutịm ubọp Ufọkmbono Obio Ubọn̄. Idahaemi imenyene mme Otu Ubọp Ufọkmbono Obio Ubọn̄ 29 ke Nigeria. Ke isua utom 2003, nnyịn ima isibọp Ufọkmbono Obio Ubọn̄ kiet ikụre ke usen utom kiet kiet. Idahaemi mme esop efen efen ẹkeme ndinyene ndiye Ufọkmbono Obio Ubọn̄ man ẹda ẹtuak ibuot ẹnọ Abasi nnyịn, Jehovah.

Man ẹmịn̄ n̄wed awak ekem an̄wautom ofụri ererimbot oro akade-ka iso ndikọri, ẹnam ndutịm nditat Itie Umịn̄n̄wed ke Watchtower Farms, emi odude ekpere Wallkill, New York. Ke ẹnam eti n̄kọri ndibọp mbọp-ndian oro okponde ke hectare 1.4. Emi edi ukem ye ufan̄ isọn̄ oro ẹkpedade ẹbọp uke uke Ufọkmbono Obio Ubọn̄ 30! Ẹdori enyịn ikpọ ukwak umịn̄n̄wed iba eke eyomfịn ndidi ndibehe ke ntọn̄ọ ntọn̄ọ isua 2004. Ukwak umịn̄n̄wed kiet kiet eyekeme ndimịn̄ se iwakde isịm magazine 25 ke sekọn kiet. Ke 2004, ẹyewụk n̄ko obufa ukwak udian n̄wed ye ukwakutom oro edin̄wamde ke ndinọ n̄wed ọwọrọ. Emi oyosụn̄ọ ke ndimịn̄ ediwak n̄wed onyụn̄ osụhọde ibat mme anamutom.

Nte nnyịn itọn̄ọde isua utom 2004 emi, nnyịn imadiana ye mbufo ke ndibọn̄ akam nte, Jehovah akpakam ‘akaiso ndinam enye ọkọri.’

Nditọete mbufo,

Ọfis N̄kọk Itieutom Nigeria