Ẹda Nsụhọdeidem Ẹsịne
1 Akparawa ekpemerọn̄ kiet ọbuọt idem ke Jehovah onyụn̄ akan okopodudu owo ekọn̄. (1 Sam. 17:45-47) Owo inyene kiet ọyọ afanikọn̄ ke ime. (Job 1:20-22; 2:9, 10) Eyen Abasi ọnọ Ete esie kpukpru itoro ke se enye ekekpepde. (John 7:15-18; 8:28) Ke kpukpru uwụtn̄kpọ emi, nsụhọdeidem ama enyene n̄kpọ ndinam akamba akamba. Kpasụk ntre mfịn, nsụhọdeidem edi akpan n̄kpọ ke ndiyọ mme mfịna oro nnyịn isobode.—Col. 3:12.
2 Ke Ini Ikwọrọde Ikọ: Nte mme asan̄autom Christian, nnyịn ke nsụhọdeidem imesibuana eti mbụk ye kpukpru orụk owo, isarike mmọ asari ke ntak orụk, idụt, m̀mê idaha mmọ ke uwem. (1 Cor. 9:22, 23) Edieke ndusụk owo ẹsọn̄de ido m̀mê ke ntan̄idem ẹsịnde etop Obio Ubọn̄, nnyịn idisioho usiene edi nnyịn iyada ime ikaiso ndiyom mbon oro ẹdotde. (Matt. 10:11, 14) Utu ke ndidomo ndiwụt mbon en̄wen ke imọfiọk n̄kpọ m̀mê ke ima ika n̄wed, nnyịn ikpodụri ntịn̄enyịn iwụt Ikọ Abasi, ifiọkde ite ke enye enen̄ede enyene odudu ndikpek mme owo n̄kan ikọ ekededi oro nnyịn ikemede nditịn̄. (1 Cor. 2:1-5; Heb. 4:12) Ke ndikpebe Jesus, nnyịn inọ Jehovah kpukpru itoro.—Mark 10:17, 18.
3 Ke Esop: Ana mme Christian n̄ko “ẹbọbọ nsụkidem ke idem nte mbọbọ, ẹnam n̄kpọ ẹnọ kiet eken.” (1 Pet. 5:5) Edieke nnyịn idade ke mbon en̄wen ẹfọn ẹkan nnyịn, nnyịn iyoyom mme usụn̄ ndinam n̄kpọ nnọ nditọete nnyịn utu ke ndidori enyịn mmọ ndinam n̄kpọ nnọ nnyịn. (John 13:12-17; Phil. 2:3, 4) Nnyịn idikereke ke imokpon ikan ndinam mme utọ utom nte edinịm Ufọkmbono Obio Ubọn̄ asana.
4 Nsụhọdeidem an̄wam nnyịn ‘ndime ime ye kiet eken ke ima’ ndien ke ntem itịpde isịn ke emem ye edidianakiet ke esop. (Eph. 4:1-3) Enye an̄wam nnyịn ndisụk ibuot nnọ mbon oro ẹmekde ndida usụn̄. (Heb. 13:17) Enye onụk nnyịn ndibọ item m̀mê ntụnọ ekededi oro ẹnọde nnyịn. (Ps. 141:5) Ndien nsụhọdeidem anam nnyịn iberi edem ke Jehovah ke ini isede iban̄a mme ifet ekededi oro nnyịn inyenede ke esop. (1 Pet. 4:11) Ukem nte David, nnyịn imọfiọk ke nnyịn ndikụt unen ikọn̄ọke ke ukeme owo edi oto edidiọn̄ Abasi.—1 Sam. 17:37.
5 Ke Iso Abasi Nnyịn: Ke akande kpukpru, oyom nnyịn ‘isụhọde idem ke idak ọkpọsọn̄ ubọk Abasi.’ (1 Pet. 5:6) Edieke anade nnyịn iyọ n̄kpọsọn̄ idaha, ekeme ndidọn̄ nnyịn ndikụt ubọhọ oro Obio Ubọn̄ edidade edi. Edi ana nnyịn ida nsụhọdeidem ime ime, ibetde Jehovah osu mme un̄wọn̄ọ esie ke edimek ini esie. (Jas. 5:7-11) Kpa nte ekedide ye Job oro okomụmde nsọn̄ọnda esie akama, se inen̄erede ibehe nnyịn edi ‘ndika iso n̄kọm enyịn̄ Jehovah.’—Job 1:21.
6 Prọfet Daniel ‘ama osụhọde idem esie enịm ke iso Abasi esie’ ndien ẹma ẹda mfọn Jehovah ye ediwak nti ifetutom ẹdiọn̄ enye. (Dan. 10:11, 12) Kpasụk ntre, nnyịn ikpakam ida nsụhọdeidem isịne, sia ifiọkde ite ke “utịp nsụkesịt [“nsụhọdeidem,” NW] ye eke uten̄e Jehovah edi inyene, ye ukpono, ye uwem.”—N̄ke 22:4.