Ndikọri N̄kpet N̄kpet Itie Ebuana ye Jehovah
1. Nso ke eyenete an̄wan kiet ekedi edifiọk aban̄a mme edinam ofụri ini esie eke spirit?
1 Christian eyenete an̄wan kiet ama enyịme ete: “Mmodu ke akpanikọ ke isua 20 emi ẹbede m̀mê n̄kpọ ntre ebe ke ndinyụn̄ n̄ka mme mbono esop ye edibuana ke utom ukwọrọikọ.” Edi, enye aka iso ọdọhọ ete: “Mmedisịm ubiere nte ke okposụkedi mme n̄kpọ emi ẹdide akpan n̄kpọ, mmọ kpọt ikemeke ndimụm mi n̄kama ke ini n̄kpọ ẹtọn̄ọde ndisọn̄. . . . Mmokụt idahaemi nte ke ana nnen̄ede ekikere mi nnyụn̄ ntọn̄ọ ndutịm ukpepn̄kpọ oro enyenede iwụk man n̄keme ndinen̄ede mfiọk Jehovah nnyụn̄ mma enye nnyụn̄ n̄wụt esịtekọm ke se Eyen esie ọnọde nnyịn.”
2. Ntak edide akpan n̄kpọ ndikọri n̄kpet n̄kpet itie ebuana ye Jehovah?
2 Ndikọri n̄kpet n̄kpet itie ebuana ye Jehovah oyom ukeme. Enye oyom se ikande sụk editiene edinam Christian ofụri ini. Edieke nnyịn ikpude ndinyene nneme ye Jehovah kpukpru ini, nte ini akade enye ekeme ndikabade ntie nte akani n̄kpet n̄kpet ufan oro nnyịn mîkopke n̄kpọ aba iban̄a. (Edi. 2:4) Ẹyak nnyịn idụn̄ọde nte ukpepn̄kpọ Bible idemowo ye akam ẹkemede ndin̄wam nnyịn ikọri n̄kpet n̄kpet itie ebuana ye Jehovah.—Ps. 25:14.
3. Didie ke nnyịn ikpenịm ukpepn̄kpọ idemowo man an̄wam nnyịn isan̄a ikpere Abasi?
3 Akam ye Editie N̄kere Ẹdi Akpan N̄kpọ: Ukpepn̄kpọ idemowo oro esibọkde esịt abuana se ikande edidụri udịm ke mme akpan n̄kpọ ke ibuotikọ ukpepn̄kpọ nnyụn̄ nse mme itie N̄wed Abasi oro ẹsiakde ẹsịn. Enye oyom nnyịn itie ikere nte se nnyịn ikotde ayararede aban̄a mme usụn̄, mme edumbet, ye mme edu Jehovah. (Ex. 33:13) Ndifiọk mme n̄kpọ eke spirit esitụk onyụn̄ onụk nnyịn ndikere mban̄a uwem nnyịn. (Ps. 119:35, 111) Uduak edinyene ukpepn̄kpọ idemowo ekpedi ndisan̄a n̄kpere Jehovah. (Jas. 4:8) Ukpepn̄kpọ oro ẹdade ke akpan n̄kpọ oyom ini ọkọrọ ye nnennen itie, ndien esiyom ẹnọ idem ntụnọ man ẹnam oro kpukpru ini. (Dan. 6:10) Idem ọkpọkọm afo emesinen̄ede anana ini, nte afo omodiomi ini enịm kpukpru usen ndisitie n̄kere mme utịbe utịbe edu Jehovah?—Ps. 119:147, 148; 143:5.
4. Didie ke ndibọn̄ akam mbemiso itọn̄ọde ukpepn̄kpọ idemowo an̄wam nnyịn ndikọri n̄kpet n̄kpet itie ebuana ye Jehovah?
4 Akam ofụri esịt edi akpan ubak ukpepn̄kpọ idemowo oro enyenede uduak. Man mme akpanikọ Bible ẹdemede nnyịn udọn̄ ẹnyụn̄ ẹnụk nnyịn ndinam “utom eke enemde Enye esịt ke ukpono ye uten̄e,” nnyịn imoyom edisana spirit Abasi. (Heb. 12:28) Mmọdo, nnyịn ikpenyene ndiberede ini ukpepn̄kpọ kiet kiet ke ndiben̄e Jehovah spirit esie. (Matt. 5:3) Nte nnyịn ikerede iban̄a mme itie N̄wed Abasi inyụn̄ idade mme n̄wed ukpepn̄kpọ oro esop Jehovah ọnọde inam n̄kpọ, nnyịn in̄wan̄a esịt nnyịn inọ Jehovah. (Ps. 62:8) Ndikpep n̄kpọ ke utọ usụn̄ emi edi edinam utuakibuot oro nnyịn idade iwụt ke imeten̄e Jehovah inyụn̄ isọn̄ọ itie ebuana nnyịn ye enye.—Jude 20, 21.
5. Ntak edide akpan n̄kpọ nnyịn nditie n̄kere Ikọ Abasi kpukpru usen?
5 Nte esidide ye kpukpru itie ebuana, ana nnyịn kpukpru ini ifori itie ebuana nnyịn ye Jehovah inyụn̄ inam enye aka iso ọkọri ke ofụri eyouwem nnyịn. Ke ntre, nnyịn ikpakam idep ifet kpukpru usen ndisan̄a n̄kpere Abasi, ifiọkde ite ke enye n̄ko ayasan̄a ekpere nnyịn.—Ps. 1:2, 3; Eph. 5:15, 16.