Ndikama Idem Nte Asanade, Onyụn̄ Odotde Itoro
1. Ke nditịm idem nnọ mbono district, ntak akpanade nnyịn ikere iban̄a nte idikamade idem?
1 “Mme Ntiense Jehovah ẹfọn ẹkan! Ikọt mbufo ẹfọn ido ẹnyụn̄ ẹsịne n̄kpọ ediye ediye, ndien mmọ ẹkpono owo eti eti.” Ntre ke etubom ufọkisen kiet eketịn̄ aban̄a nditọete ke mbono district kiet isua oko. Ke mbono efen, anamutom kiet ke ufọkisen ọkọdọhọ ete: “Ke akpanikọ ikọt mbufo ẹsịne n̄kpọ nte enemde Abasi esịt.” Ih, mbon efen ẹsikụt mme andidụk mbono. Ke ntre, nnyịn iyom ndisịne n̄kpọ “nte odotde ye gospel,” ndien emi esiwak ndinụk mbonan̄wa nditoro nnyịn, esinyụn̄ owụt ke nnyịn idi mme asan̄autom Abasi. (Phil. 1:27) Nte nnyịn itịmde idem inọ mbono district, odot nnyịn ibem iso ikere iban̄a nte idikamade idem nnyịn.
2. Ntak edide ọkpọsọn̄ n̄kpọ ndisịne n̄kpọ nnyụn̄ n̄kama idem nte asanade?
2 Mbet oro James ekewet ete: “Eti ibuot emi otode ke enyọn̄ edi edisana ke mbemiso.” (Jas. 3:17) Ekeme ndidi ọkpọsọn̄ n̄kpọ ndikama idem nte asanade. Oburobụt ererimbot Satan anam mme owo ẹsịne n̄kpọ oro mîdotke mînyụn̄ iwụtke iso o-bụt, emi edemerede owo udọn̄ idan̄, onyụn̄ etiede n̄kon̄ine n̄kon̄ine. (1 John 2:15-17) Ntem, ke ini inamde ubiere aban̄ade ọfọn̄ ye ukamaidem, oyom inam item Bible emi ọdọhọde “idianade ikpọn̄ idiọk ido ye idiọk udọn̄ ererimbot, idu uwem ke eti ibuot . . . ke eyo emi.” (Titus 2:12) Nnyịn ikpedehe-de iyom ukamaidem nnyịn afịna mbon efen, edide mmọ ẹdi nditọete nnyịn, mme anamutom ke ufọkisen ye itie unyamudia, m̀mê mme ndanse en̄wen.—1 Cor. 10:32, 33.
3. Mme mbụme ewe ẹdin̄wam nnyịn ndidụn̄ọde ukamaidem nnyịn?
3 Usịnen̄kpọ Oro Eyede Onyụn̄ Owụtde Iso O-bụt: Ke ini etịmde idem ndika mbono, bụp idemfo: ‘Nte usịnen̄kpọ mi owụt iso o-bụt, mîdịghe nte enye odụri ntịn̄enyịn nte mîdotke owụt mi? Nte enye owụt ke mmekere mban̄a nte editiede mbon efen ke idem? Nte itọn̄ itọn̄ọfọn̄ mi osụhọde akaha mîdịghe nte itọn̄ọfọn̄ mi omụhọ akaha? Nte ọfọn̄ mi ẹsision̄o mi ndido idem m̀mê ẹbọbọp? Nte mmọ ẹsana inyụn̄ inyeneke idiọk utebe? Ke ini udia usenubọk ke ufọkisen, itie unyamudia, m̀mê ke ini nduọkodudu ke edinam ama okokụre, nte nyakama idem nte asanade onyụn̄ eyede nte asan̄autom Abasi, mîdịghe ndi edisịnen̄kpọ mi editie ntaha ntaha, n̄kon̄ine n̄kon̄ine, nsuahade nsuahade, inyụn̄ idotke ye andidụk mbono emi adiande kad idiọn̄ọ? Nte ọfọn̄ oro nsịnede ke ini nduọkodudu ayanam n̄kûkeme ndinọ ikọ ntiense ido nneme?’—Rome 15:2, 3; 1 Tim. 2:9.
4. Didie ke mbon efen ẹkeme ndin̄wam nnyịn ndikama idem nnyịn nte asanade?
4 Nnyịn imekeme ndibọ ufọn nto ekikere oro mme Christian emi ẹkọride ẹsịm ọyọhọ idaha ẹnọde. Ibanndọ ẹkpenyene ndibụp mme ebe mmọ nte mbon efen ẹkemede ndise edisịnen̄kpọ mmimọ. Mme ete ye eka ẹdide mme abak Abasi ẹkeme ndin̄wam nditọ mmọ emi ẹdide mme uyen ke afan̄ emi. Ke akande oro, ikpọ nditọete iban oro ẹbakde Abasi ẹkeme ‘nditeme n̄kparawa iban ẹnyene eti ibuot,’ ẹnyụn̄ ẹkama idem ke usụn̄ oro ‘owụtde iso o-bụt,’ “mbak ikọ Abasi edidia esuene.” (Titus 2:3-5) Mme n̄wed nnyịn ẹdọn̄ọ ndise usịnen̄kpọ oro ẹyede ẹnyụn̄ ẹwụtde iso o-bụt.
5. Didie ke kpukpru nnyịn ikeme ndida itoro nsọk Jehovah ke ini mbono?
5 Da Itoro Sọk Jehovah: Mme mbono district ẹsinọ kpukpru nnyịn, idịghe sụk mbon oro ẹnyenede n̄kpọ ndinam, ata eti ifet nditoro Jehovah. Edi akpanikọ nte ke edu uwem ye ikọinua nnyịn nte mme Christian ẹyeda itoro ẹsọk Enye. Edi akpa n̄kpọ oro ediwak mme ndanse ẹsikụtde esidi ọfọn̄ ye ukamaidem nnyịn. Kpukpru nnyịn ikpakam ida itoro isọk Jehovah ebe ke ndikama idem nte asanade, onyụn̄ odotde itoro.—Ps. 148:12, 13.
[Ekebe ke page 6]
Mme Un̄wam ke Ndikama Idem nte Odotde Itoro
◼ Ikọ Abasi
◼ Ndụn̄ọde idemowo
◼ Mme ekikere mbon efen
◼ Mme n̄wed Christian