Jehovah An̄wam Mbon Oro Ẹbuọtde Idem ye Enye
1 Ediwak owo ẹda okụk, odudu, ye ukeme owo nte mme n̄kpọ oro ẹnamde owo okụt unen. (Ps. 12:4; 33:16, 17; 49:6) Nte ededi, mbon oro ẹbakde Jehovah ẹnyụn̄ ẹbuọtde idem ye enye ẹnyene nsọn̄ọ Bible emi nte ke “enye edi andinyan̄a mmọ ye otu-ekọn̄ mmọ.” (Ps. 115:11) Ẹyak nnyịn ineme iban̄a ikpehe iba oro oyomde nnyịn iwụt mbuọtidem ke Jehovah.
2 Nte Mme Asan̄autom Christian: Ini ekededi oro nnyịn inọde utịn̄ikọ ke esop m̀mê inọde ukpep ke an̄wautom, ana nnyịn iberi edem ke Abasi nnyịn. Kere ban̄a uwụtn̄kpọ Jesus. Okposụkedi enye ekedide Eyen Abasi, enye ikeberike edem ke ọniọn̄ m̀mê ukeme esie, utu ke oro, enye ọkọkọn̄ ọyọhọ mbuọtidem ke Ete esie eke heaven. (John 12:49; 14:10) Adan̄a didie akan oro ke oyom nnyịn iberi edem ọyọhọ ọyọhọ ke Jehovah! (N̄ke 3:5–7) N̄kpri ukeme nnyịn edida itoro ọsọk Jehovah onyụn̄ enyene ufọn ọnọ mbon efen n̄kukụre ke Jehovah ọnọde nnyịn odudu.—Ps. 127:1, 2.
3 Nnyịn iwụt ke imeberi edem ke Jehovah ebe ke ndibọn̄ akam nyom ndausụn̄ ye un̄wam edisana spirit esie. (Ps. 105:4; Luke 11:13) Ke adianade do, nnyịn iwụt ke imọbuọt idem ke Abasi ebe ke ndinam ukpepn̄kpọ nnyịn ọkọn̄ọ ke Ikọ esie, kpa Bible. Etop esie enyene odudu nditụk esịt nnyụn̄ n̄kpụhọde uwem. (Heb. 4:12) Nnyịn iyọnọ Jehovah ubọn̄ ke ini nnyịn ‘inamde n̄kpọ nte ida odudu eke Abasi ọnọde inam.’—1 Pet. 4:11.
4 Ndise Mban̄a Mme Mfịna: Nnyịn imoyom un̄wam Jehovah n̄ko ke ini isobode mfịghe ye mme mfịna. (Ps. 46:1) Ke uwụtn̄kpọ, eteutom nnyịn ekeme ndimen̄e ndinọ nnyịn ini ndida n̄ka mbono, mîdịghe nnyịn imekeme ndisobo ọkpọsọn̄ idaha ke uwem ubon nnyịn. Nnyịn iwụt mbuọtidem nnyịn ke Jehovah ebe ke ndibọn̄ akam ofụri esịt nnọ enye nnyụn̄ ntiene ndausụn̄ oro enye ọnọde ke Ikọ ye esop esie. (Ps. 62:8; 119:143, 173) Ebede ke ndinam emi, mme asan̄autom Jehovah ẹyekụt un̄wam esie ke uwem mmọ.—Ps. 37:5; 118:13, 16.
5 Jehovah ke idemesie ọnọ nnyịn nsọn̄ọ ete: “Osụk ọfọfọn ọnọ owo eke ọbuọtde idem ye Jehovah, eke Jehovah onyụn̄ edide ibetedem esie.” (Jer. 17:7) Nnyịn ikpakam iwụt mbuọtidem oro ibuọtde ke enye ke kpukpru se inamde!—Ps. 146:5.