Da Bible Nam N̄kpọ Nte Ọfọnde
1. Nso ke afo akpanam nditịm idem nnọ an̄wautom?
1 Inamke n̄kpọ m̀mê ewe n̄wed ke nnyịn idiomi ndinọ ke an̄wautom, ọfọn ndiyom itie N̄wed Abasi oro anamde owo ekere n̄kpọ nda nnyene nneme ye mbon oro ẹdikpan̄de utọn̄. (Heb. 4:12) Ndikot itie N̄wed Abasi kiet oro odude ke n̄wed oro afo ọnọde ayanam edi mmemmem n̄kpọ ndinọ n̄wed oro. Ke ndusụk ebiet, mme asuanetop ẹkụt ke ọfọn ndikama Bible ke ubọk ke ini ẹyomde ndinyene nneme ye owo m̀mê ke ini ẹnamde utom eke ufọk ke ufọk.
2. (a) Didie ke nnyịn ikeme ndida itie N̄wed Abasi kiet ntọn̄ọ nneme? (b) Ewe ibuot nneme N̄wed Abasi ke mbon oro ẹdude ke efakutom mbufo ẹsinen̄ede ẹma?
2 Da Itie N̄wed Abasi Tọn̄ọ: Ndusụk mme asuanetop ẹsitọn̄ọ nneme mmọ ke ndibụp enyeneufọk mmemmem mbụme oro ẹdade ẹfiọk ekikere owo ẹto itie Bible kiet oro mmọ ẹdikotde. Emi esisọp odụri ntịn̄enyịn owụt Ikọ Abasi. Ndi ndusụk ntọn̄ọikọ emi ẹyenyene uforo ke efakutom mbufo?
◼ “Ndi afo akpada mme ukpụhọde emi edi, edieke afo ekpenyenede odudu ndinam ntre?” Kot Ediyarade 21:4.
◼ “Ntak emi nnyịn idude ke utọ ndiọkeyo emi?” Kot 2 Timothy 3:1-5.
◼ “Ndi emekere ke obio nnyịn ọkpọfọn edieke kpukpru owo ẹkpetienede item emi?” Kot Matthew 7:12.
◼ “Ndi emekere ke nditọ fo ẹyekeme ndinyene utọ idaha oro ẹtịn̄de ẹban̄a mi?” Kot Psalm 37:10, 11.
◼ “Ndi emekere ke tutu amama ini oyodu oro mme ikọ emi ẹdisude?” Kot Isaiah 33:24.
◼ “Ndi afo ememehe ye ukpụhọ ukara oro ẹtịn̄de ẹban̄a mi?” Kot Daniel 2:44.
◼ “Ndi akanam afo omoyom ndibụp Abasi mbụme emi?” Kot Job 21:7.
◼ “Ndi imekeme ndifiak n̄kụt mbonima nnyịn oro ẹma ẹkekpan̄a?” Kot John 5:28, 29.
◼ “Ndi mme akpan̄kpa ẹfiọk se mme odu-uwem ẹnamde?” Kot Ecclesiastes 9:5.
3. Didie ke nnyịn ikeme ndinam itie Bible oro ikotde an̄wan̄a mme owo?
3 Nam An̄wan̄a, Nọ Uwụtn̄kpọ, Buan: Ke ini owo enyịmede ndinyene nneme, kûnam nneme emi etie itọk itọk. Da ini nam itie N̄wed Abasi oro okotde an̄wan̄a, nọ uwụtn̄kpọ, nyụn̄ buan enye. (Neh. 8:8) Ke ini mme owo ẹfiọkde, ẹnyụn̄ ẹnyịmede se Ikọ Abasi ekpepde, emi ekeme ndinam mmọ ẹnam ikpọ ukpụhọde ke uwem mmọ.—1 Thess. 2:13.
4. Didie ke nnyịn ikeme ndida Bible nnam n̄kpọ nte ọfọnde ke mme mfiakn̄ka?
4 Ka iso ndida Bible nnam n̄kpọ nte ọfọnde, nte afo ọkọride udọn̄ oro. Afo emekeme ndida ukem usụn̄ emi nnam n̄kpọ ke ini anamde mme mfiakn̄ka: (1) Kot itie N̄wed Abasi oro odotde. (2) Bụp mmemmem mbụme oro ẹdade ẹfiọk ekikere owo ban̄a itien̄wed oro. Ekem kot itien̄wed oro. (3) Nam an̄wan̄a, nọ uwụtn̄kpọ, nyụn̄ buan itien̄wed oro. Ini kiet kiet oro afiakde aka, domo ndinam owo oro ọkọri ke ifiọk Ikọ Abasi. Afo emekeme nditọn̄ọ ukpepn̄kpọ Bible ke mîbịghike!