Ẹn̄wam Nditọ Mbufo Ẹnam N̄kọri ke An̄wautom
1 Mme ete ye eka emi ẹdide Christian ẹnyene akwa mbiomo ndikpep nditọ mmọ ẹtiene ẹbuana ke an̄wautom toto ke uyen. Ẹkeme ndida nsio nsio usụn̄ nnam emi. Ndusụk nditọwọn̄ ẹkeme nditịn̄ ndusụk itie N̄wed Abasi ke ibuot idem mbemiso mmọ ẹkemede ndikot n̄wed. Emi ekeme ndinen̄ede ntụk mme andikpan̄ utọn̄. Nte n̄kpri nditọ ẹkọride ẹkpon, mmọ ẹkeme ndikam nnam ekese ke an̄wautom. Didie ke mbufo mme ete ye eka ẹkeme ndin̄wam nditọ mbufo ndibuana ke ndinọ ikọ ntiense? Ekeme ndidi mme ekikere oro ẹtienede mi ẹyenọ un̄wam efen efen.
2 Ke ama ọkọnọ ekọm, afo emekeme ndidọhọ:
◼ “Eyen mi [enyịn̄ esie] enyene akpan itie N̄wed Abasi oro enye edimade afo okop.” Eyen fo ekeme ndidọhọ: “Itie N̄wed Abasi emi ke Psalm ama ekpep mi enyịn̄ Abasi. [Eyen okot mîdịghe etịn̄ Psalm 83:18 ke ibuot.] Mme magazine emi ẹtịn̄ ẹban̄a se Jehovah Abasi edinamde ọnọ nnyịn. Ndi akpama ndibọ mmọ?” Afo emekeme ndiberi ke nditịn̄ nte ẹnọde utom ofụri ererimbot ibetedem.
3 Mîdịghe afo emekeme ndidomo usụn̄ emi nse:
◼ “Mmọkọm-o. Ami n̄kpep [enyịn̄ esie] eyen mi ndin̄wam mbon en̄wen ke obio emi. Enye akpama ndibuana ibio ibio etop Bible ye afo.” Enye ekeme ndidọhọ: “Usụn̄ kiet oro mmade ndin̄wam mme owo edi ndibuana idotenyịn Bible kaban̄a ini iso. [Eyen okot mîdịghe etịn̄ Ediyarade 21:4 ke ibuot.] Mme magazine emi ẹtịn̄ se Obio Ubọn̄ Abasi edinamde ọnọ nnyịn. N̄kere ke afo ayama ndikot mmọ.”
4 Ndida mmemmem usụn̄ unyene nneme kpukpru ini ayanam nditọwọn̄ ẹnyene uko nte ke mmimọ imekeme ndibuana etop Obio Ubọn̄. Mme ini ndomonse oro ẹwụkde ntịn̄enyịn ke nditịn̄ ikọ in̄wan̄-in̄wan̄ ye ke uyo oro okponde ekem ẹyetịm mmọ idem nditịn̄ ikọ ke nsio nsio idaha ekededi. Ndibem iso ntịm idem nte ọfọnde ọkọrọ ye itoro oro ẹnọde ke ofụri esịt ẹyen̄wam n̄kpri nditọ nditan̄a mbuọtidem mmọ.
5 Ye utọ nsịnudọn̄ oro, ediwak n̄kpri nditọ ẹmedot nte mme asuanetop oro mînaha baptism. Esidi n̄kpọ idatesịt didie ntem ndikụt nditọ nnyịn ẹnamde n̄kọri ke utom ukwọrọikọ Christian!—Ps. 148:12, 13.