Ẹtịn̄ Ubọn̄ Jehovah
1 Andiwet psalm akatan̄a ete: “Mbufo, ofụri ekondo, ẹkwọ ẹnọ Jehovah. Ẹtịn̄ ubọn̄ esie ke otu mme idụt, ye mme utịbe n̄kpọ esie ke ofụri ererimbot.” Esịt nnyịn esinụk nnyịn nditịn̄ ubọn̄ Jehovah nte nnyịn ikerede iban̄a mme n̄kpọ oro enye akanamde, se enye anamde idahaemi, ye mme n̄kpọ oro enye edinamde!—Ps. 96:1, 3.
2 Ke Utom Ukwọrọikọ Nnyịn: Ẹnọ Mme Ntiense Jehovah ifet ndikere enyịn̄ ndian Abasi ndinyụn̄ ntoro enyịn̄ esie an̄wan̄wa ke ofụri ererimbot. (Mal. 1:11) Emi okpụhọde didie ntem ye mme ọkwọrọ ederi Christendom emi ẹsọn̄ọde enyịn ẹsio enyịn̄ Abasi ẹfep ke mme edikabade Bible mmọ! Oyom ẹsọsọp ẹnam utom edinam mme owo ẹfiọk enyịn̄ Abasi, sia ana mmọ ẹkot ẹnyụn̄ ẹbuọt idem ke enyịn̄ emi man ẹnyan̄a mmọ ke akwa ukụt oro edide. (Rome 10:13-15) Akan oro, man ofụri ekondo, esịnede mme andidụn̄ isọn̄ ẹnyene emem, ana ẹnam enyịn̄ Abasi asana. Ke akpanikọ, kpukpru utom Abasi ẹnyene ebuana ye enyịn̄ esie.
3 “Jehovah omokpon, onyụn̄ odot nte ẹkpetorode enye eti-eti.” Edi man mme owo “ẹnọ Jehovah ubọn̄ enyịn̄ esie,” ana mmọ ẹfiọk akpanikọ aban̄ade enye. (Ps. 96:4, 8) Nte ededi, ndusụk owo ẹsidọhọ ke Abasi idụhe. (Ps. 14:1) Mbon en̄wen ẹbiat enyịn̄ esie ke ndidọhọ ke enye inyeneke odudu, mîdịghe mmọ ẹdọhọ ke enye inyeneke udọn̄ ke mme mbubehe ubonowo. Nnyịn iyọnọ Jehovah ubọn̄ nte nnyịn in̄wamde mbon oro ẹnyenede esịt akpanikọ ndinyene nnennen ifiọk aban̄ade Andibot, mme uduak, ye ima ima edu esie.
4 Ebe ke Edu Nnyịn: Nnyịn iyọnọ Jehovah ukpono edieke idude uwem ekekem ye ndinen idaha esie. Mme owo ẹsikụt eti edu uwem nnyịn. (1 Pet. 2:12) Ke uwụtn̄kpọ, eti ukamaidem ekeme ndinam mbon en̄wen ẹtịn̄ eti ikọ ẹdian nnyịn, onyụn̄ ọnọ nnyịn ifet nditịn̄ mban̄a mme ufọn edida mme edumbet oro ẹkụtde ke Ikọ Abasi ndu uwem. (1 Tim. 2:9, 10) Nnyịn isinem esịt didie ntem ke ini mbon en̄wen ‘ẹkụtde nti utom nnyịn ẹnyụn̄ ẹnọde Ete nnyịn emi odude ke heaven ubọn̄’!—Matt. 5:16.
5 Ẹyak nnyịn itoro akwa Abasi nnyịn ke usen ke usen ke usụn̄ oro itịn̄de ikọ ye nte inamde n̄kpọ, ke ntre, inamde idara idara ikot emi ẹnọde nnyịn ẹte: “Ẹkwọ ẹnọ Jehovah, ẹtoro enyịn̄ esie; ẹtan̄a edinyan̄a esie kpukpru usen.”—Ps. 96:2.