Kpep Mbon Nsụkidem Ẹsan̄a ke Usụn̄ Abasi
1. Nso ibuana ke edinam mbet?
1 Ẹkedọhọ ke mme mbet Christ eke akpa isua ẹkedu ke “Usụn̄ Oro.” (Utom 9:2) Ata Ido Ukpono Christ abuana ofụri usụn̄ uwem owo. (N̄ke 3:5, 6) Ke ntre, ke ini inịmde ukpepn̄kpọ Bible, nnyịn ikpenyeneke ndinam mme owo ẹnyene nnennen ifiọk ẹban̄a mme ukpepn̄kpọ Bible kpọt. Ana in̄wam nditọ ukpepn̄kpọ Bible ẹsan̄a ke usụn̄ Jehovah n̄ko.—Ps. 25:8, 9.
2. Nso ikeme ndinụk eyen ukpepn̄kpọ Bible enịm mme ewụhọ Abasi?
2 Ndima Jehovah ye Jesus: Ọsọn̄ didie ntem mme anana-mfọnmma owo ndinam ekikere, edu, ikọ, ye ido uwem mmọ ẹdu ke n̄kemuyo ye uduak Abasi! (Rome 7:21-23; Eph. 4:22-24) Nte ededi, ima oro mbon nsụkidem ẹmade Abasi ye Eyen esie esinụk mmọ ndinam mme n̄kpọ oro ẹsọn̄de mi. (John 14:15; 1 John 5:3) Didie ke ikeme ndin̄wam nditọ ukpepn̄kpọ Bible nnyịn ẹnyene utọ ima emi?
3. Didie ke nnyịn ikeme ndin̄wam nditọ ukpepn̄kpọ ẹma Jehovah ye Jesus?
3 N̄wam eyen ukpepn̄kpọ fo ọfiọk utọ owo oro Jehovah edide. Eyenete kiet ọkọdọhọ ete, “Mme owo ikemeke ndima owo emi mmọ mîfiọkke, ntre toto ke ata ntọn̄ọ ukpepn̄kpọ, mmesikpep mmọ enyịn̄ Abasi ke Bible, nnyụn̄ nyom mme ifet ndisọn̄ọ ntịn̄ mban̄a mme edu Jehovah.” Ata eti usụn̄ ndinam emi edi ndisọn̄ọ ntịn̄ mban̄a uwụtn̄kpọ oro Jesus ekenịmde. (John 1:14; 14:9) Ke adianade do, da ekebe ndụn̄ọde oro odude ke utịt ibuot kiet kiet ke n̄wed Bible Ekpep n̄wam eyen ukpepn̄kpọ nditie n̄kere mme utịbe utịbe edu Abasi ye Eyen esie.
4. (a) Ntak emi esisọn̄de ediwak nditọ ukpepn̄kpọ ndikwọrọ ikọ? (b) Didie ke nnyịn ikeme ndin̄wam nditọ ukpepn̄kpọ nnyịn ẹtọn̄ọ utom ukwọrọikọ Christian?
4 Da Uwụtn̄kpọ Nọ Ukpep: Nte mme andikpep ye mme adausụn̄, mbon efen ẹsida mme edinam nnyịn ẹfiọk se ndisan̄a ke usụn̄ Abasi ọwọrọde. (1 Cor. 11:1) Ke uwụtn̄kpọ, imeheke ata ediwak nditọ ukpepn̄kpọ Bible ndisan̄a n̄kpere isenowo man ẹneme se mmọ ẹnịmde ke akpanikọ. Ke ntre, ekeme ndiyom ime ye usọ man an̄wam mmọ enyene ima, mbuọtidem, ye uko oro oyomde man ẹbuana ke utom ukwọrọikọ ye edinam mbet. (2 Cor. 4:13; 1 Thess. 2:2) Udọn̄ oro inyenede ndida nditọ ukpepn̄kpọ nnyịn usụn̄ oyonụk nnyịn ndin̄wam nnyụn̄ nsan̄a ye mmọ ke ini mmọ ẹtọn̄ọde utom ukwọrọikọ Christian.
5. Didie ke eti uwụtn̄kpọ esin̄wam nditọ ukpepn̄kpọ ndifiọk se ibuanade ke owo nditiene ewụhọ Abasi?
5 Nditọ ukpepn̄kpọ fo ẹkeme ndikpep mme akpan ikpehe uwem Christian eken ẹto uwụtn̄kpọ fo. Mmọ ẹsikụt nte afo owụtde ima ke ini akade ekese mbon udọn̄ọ, m̀mê ke ini ọkọmde mme owo ufiop ufiop ke mme mbono esop. (John 15:12) Afo ekpep mmọ ndinam n̄kpọ nnọ mbon efen ke ini mmọ ẹkụtde nte afo etienede abuana ke ndinam Ufọkmbono Obio Ubọn̄ asana m̀mê ke ini anamde n̄kpọ ndin̄wam mbon efen. (John 13:12-15) Ke ini mmọ ẹkụtde nte afo odude mmemmem uwem, mmọ ẹyefiọk se ‘ndibem iso nyom Obio Ubọn̄’ ọwọrọde.—Matt. 6:33.
6. Nso idi utịp edin̄wam mbon nsụkidem ẹnam n̄kpọ Jehovah?
6 Oyom ekese ukeme man ẹda Ikọ Abasi ẹnam utom edikpep mbon efen n̄kpọ ẹnyụn̄ ẹnam mbet. Edi n̄kpọ idatesịt didie ntem ndikụt nte mbon nsụkidem ẹkade iso ‘ndisan̄a ke akpanikọ’!—3 John 4.