Nen̄ede Kere Ban̄a Mbon Efen—Ebe ke Ndise Owo Iso
1 Ke ini inọde ikọ ntiense an̄wan̄wa ye ke ufọk ke ufọk, nnyịn imesise mme owo iso mbemiso itọn̄ọde nditịn̄ ikọ. Ke esisịt ini oro, nnyịn imekeme ndida nte mmọ ẹnịmde iso mfiọk nte mmọ ẹdade edidi nnyịn inyụn̄ ikam ifiọk nte etiede mmọ ke idem. Kpasụk ntre, mmọ ẹkeme ndifiọk ekese mban̄a nnyịn. N̄wan kiet ama etịn̄ aban̄a ediwaha oro Ntiense kiet akawahade ete: “Se ntide ke imam imam iso esie ekedi emem. Ama edemede mi udọn̄.” Emi ama eberede usụn̄ ọnọ n̄wan oro ndikpan̄ utọn̄ nnọ eti mbụk.
2 Ndise mbon en̄wen iso edi usụn̄ oro enyenede uforo ndida ntọn̄ọ ikọ ntiense ke ini inamde utom efak m̀mê ke ini inọde ikọ ntiense ke mme itie en̄wen oro ẹkemede ndikụt ediwak owo. Eyenete eren kiet esise iso mbon oro ẹsan̄ade ẹkpere enye. Enye esituak inua imam ke ini enye esede mmọ iso ndien ekem ọnọ mmọ mme magazine. Enye esida usụn̄ emi enyene ediwak inem inem nneme onyụn̄ enịm ediwak n̄wed.
3 Fiọk Ekikere Mbon En̄wen: Ndise mbon en̄wen iso ayan̄wam nnyịn ifiọk ekikere mbon en̄wen. Ke uwụtn̄kpọ, edieke ọsọn̄de owo ndifiọk m̀mê ndinyịme se nnyịn itịn̄de, ẹsiwak ndikụt emi ke iso esie. Edieke enye mînyeneke ini m̀mê ime, nnyịn iyọfiọk ebe ke ndise nte enye enịmde iso. Do, nnyịn imekeme ndinam ukpụhọde m̀mê inam nneme nnyịn edi ibio ibio. Ndikere mban̄a nte etiede mbon en̄wen ke idem edi eti usụn̄ ndiwụt ọkpọkpọ udọn̄ oro nnyịn inyenede ke idem mmọ.
4 Esịt Akpanikọ ye Mbuọtidem: Ke ediwak itie, ẹda edise owo iso nte uyarade ndiwụt ke owo oro enyene esịt akpanikọ. Se nte Jesus ọkọbọrọde ke ini mme mbet esie ẹkebụpde enye ẹte: “Anie ndien ekeme ndibọhọ?” Bible ọtọt ete: “Jesus ese mmọ ke iso onyụn̄ ọdọhọ mmọ ete: ‘Owo ikemeke ndinam emi, edi Abasi emekeme ndinam kpukpru n̄kpọ.’” (Matt. 19:25, 26) Nte eyịghe mîdụhe, nte enye ekenịmde iso ama anam ikọ esie enyene udobi. Ntre, ndise owo iso ayan̄wam nnyịn itan̄a etop Obio Ubọn̄ ke esịt akpanikọ ye mbuọtidem.—2 Cor. 2:17; 1 Thess. 1:5.