Utom Ukwọrọikọ Nnyịn—Utom Oro Owụtde Mbọm
1 Jesus ama okụt nte ‘ẹfiomode ẹnyụn̄ ẹsuande’ ata ediwak mbon oro ẹkekpan̄de utọn̄ ẹnọ enye “nte erọn̄ eke mînyeneke andikpeme.” (Matt. 9:36) Enye ama ada sụn̄sụn̄ ido ye ima ekpep mmọ usụn̄ Jehovah, ọdọn̄ mmọ esịt, onyụn̄ ada mbọm ese aban̄a se mmọ ẹkeyomde ke n̄kan̄ eke spirit. Nte nnyịn ikerede iban̄a mme usụn̄ esie, nnyịn ikpep ndikere n̄kpọ nte Jesus ekekerede, ndien imesiwụt edu mbọm emi ke utom ukwọrọikọ nnyịn.
2 Da esisịt ini kere ban̄a nte Jesus akanamde n̄kpọ ke ini mbon oro ẹkenen̄erede ẹyom un̄wam ẹkekade ẹbịne enye. (Luke 5:12, 13; 8:43-48) Enye ama ekere aban̄a mbon oro idaha mmọ okoyomde san̄asan̄a ntịn̄enyịn. (Mark 7:31-35) Enye ama ọfiọk nte eketiede mbon en̄wen ke idem onyụn̄ ekere aban̄a mmọ. Enye ikesehe nte owo etiede ke enyọn̄ enyọn̄ idem kpọt. (Luke 7:36-40) Ke akpanikọ, Jesus ke mfọnmma usụn̄ ama owụt ima ima mbọm oro Abasi nnyịn enyenede.
3 “Atua Mmọ Mbọm”: Jesus ikadaha utom ukwọrọikọ esie nte ikpîkpu mbiomo. Enye ama ‘atua mme owo mbọm.’ (Mark 6:34) Ukem ntre mfịn, nnyịn itan̄ake etop kpọt edi idomo ndinyan̄a mme owo. Domo ndifiọk ntak emi mme owo ẹnamde n̄kpọ ke usụn̄ oro mmọ ẹnamde. Ntak emi mmọ ẹtịmerede esịt-e? Nte mme nsunsu ekpemerọn̄ ido ukpono ẹfụmi ẹnyụn̄ ẹbian̄a mmọ? Ata udọn̄ oro nnyịn inyenede ke idem mbon en̄wen ekeme ndinụk mmọ ndikpan̄ utọn̄ nnọ eti mbụk.—2 Cor. 6:4, 6.
4 Mbọm esitụk esịt. Ke ndinam an̄wan̄a: N̄wan kiet ama ataba eyen esie an̄wan emi ekedide ọfiọn̄ ita. Ke ini Ntiense iba ẹkekade ufọk esie, enye ama ọdọhọ mmọ ẹdụk ẹdi sia okoyomde ndifan̄a mban̄a ntak emi Abasi ayakde ndutụhọ odu. Nte ini akakade, n̄wan oro ekewet ete: “Mmọ ẹma ẹkpan̄ utọn̄ ẹnọ mi ẹnyụn̄ ẹnen̄ede ẹnyene esịtmbọm, ndien ke ini mmọ ẹkeyomde ndinyọn̄, ama enen̄ede enem mi ke idem tutu ndọhọ ama ekem mmọ ẹfiak ẹdi.” Nte afo emesidomo ndiwụt mbọm nnọ kpukpru mbon oro afo okụtde ke an̄wautom?
5 Ndiwụt mbọm ayan̄wam nnyịn ndinam mbon en̄wen ẹnen̄ede ẹkop ndọn̄esịt. Ke ndinam ntre, nnyịn inọ “Ete mbọm,” kpa Jehovah, ubọn̄.—2 Cor. 1:3.