Kpebe Christ ke Utom Ukwọrọikọ Fo
1 Jesus ama enịm uwụtn̄kpọ ọnọ nnyịn ndikpebe ke utom ukwọrọikọ nnyịn. Ediwak ini, enye ama owụt ke imenen̄ede ima Abasi ye mme owo ke nsio nsio usụn̄. Enye ama ekpep mbon nsụkidem akpanikọ onyụn̄ atua mbon ukụt ye mbon oro ẹkefịkde, mbọm.—Matt. 9:35.
2 Uwụtn̄kpọ ye Ukpepn̄kpọ Jesus: Jesus ikayakke mbubehe ukaraidem ye ndutịm unọ un̄wam ke ufọn mbon obio ẹwọn̄ọde ntịn̄enyịn esie. Enye ikonyụn̄ iyakke se mbon en̄wen ẹkpedade nte nti utom ẹdi ebeiso m̀mê ẹwọn̄ọde ntịn̄enyịn esie ẹkpọn̄ utom esie. (Luke 8:1) Enye okowụk ntịn̄enyịn ke edikwọrọ eti mbụk Obio Ubọn̄ Abasi nte n̄kukụre ukara oro edikọkde mme mfịna ubonowo ke nsinsi. Jesus ama enyene ekese utom ndinam, edi enye ekenyene ata esisịt ini ndida nnam mmọ. Ke ini mbon Capernaum ẹkeyomde Jesus odu ye mmimọ, enye ama ọdọhọ mme mbet esie ete: “Ẹyak nnyịn ika ebiet en̄wen . . . man n̄kwọrọ ikọ do n̄ko, koro n̄kọwọrọ ndi kaban̄a uduak emi.”—Mark 1:38.
3 Ke Jesus ama ọkọnọ mme mbet esie ukpep ama, enye ama osio mmọ ọdọn̄ onyụn̄ eteme mmọ ete: “Ẹkwọrọ, ẹte, ‘Obio ubọn̄ heaven ke asan̄a ekpere.’” (Matt. 10:7) Enye ama ekpep mme mbet esie ndibem iso nyom Obio Ubọn̄. (Matt. 6:33) Mme akpatre ikọ oro Jesus eketịn̄de ye mme mbet esie mbemiso ọkọdọkde heaven ẹma ẹwụt in̄wan̄-in̄wan̄ se mmọ ẹdinamde. Enye ọkọdọhọ ete: “Mmọdo ẹka ẹkenam mme owo ke kpukpru idụt ẹdi mbet mi.”—Matt. 28:19.
4 Ufọn Obio Ubọn̄: Akpan ibuot nneme Jesus ekedi Obio Ubọn̄ Abasi, ndien enye ama esịn udọn̄ ọnọ mme mbet esie ete ẹkpebe uwụtn̄kpọ imọ. Ukeme oro mme owo ẹsịnde ndikọk mme mfịna ubonowo ikemeke ndikụt unen. (Jer. 10:23) Obio Ubọn̄ Abasi kpọt edinam enyịn̄ Abasi asana onyụn̄ ada nsinsi ubọhọ ọsọk ubonowo. (Matt. 6:9, 10) Ndikpep mbon oro “ẹsemede ẹnyụn̄ ẹtuade ẹban̄a kpukpru mbubiam ido” akpanikọ aban̄ade Obio Ubọn̄ Abasi anam mmọ ẹkop inemesịt idahaemi, onyụn̄ anam mmọ ẹnyene ata idotenyịn kaban̄a ini iso.—Ezek. 9:4.
5 Jesus osụk enyenyene ọyọhọ udeme ke utom edikwọrọ eti mbụk Obio Ubọn̄ Abasi, onyụn̄ ọn̄wọn̄ọ ndinọ nnyịn ibetedem. (Matt. 28:20) Adan̄a didie ke nnyịn itiene uwụtn̄kpọ Jesus ke utom ukwọrọikọ nnyịn? (1 Pet. 2:21) Nnyịn ikpakam isọn̄ọ iyịre ketket ke uwụtn̄kpọ oro Jesus ekenịmde ọnọ nnyịn ke utom ukwọrọikọ ke mme akpatre usen emi!