‘Owo Emi Akade Iso Ọyọ Idomo Okop Inemesịt’
1 Kpukpru mme Christian ẹnyene ndiyọ idomo. (2 Tim. 3:12) Idomo nnyịn ekeme ndidi udọn̄ọ, nsọn̄ọn̄kpọ, ukọbọ, m̀mê nsio nsio idomo en̄wen. Satan esidomo nnyịn man itehede ube, ifre enyịn iban̄a utom ukwọrọikọ oro ẹdọn̄de nnyịn nte mme Christian, m̀mê man akam anam nnyịn itre ndinam n̄kpọ Abasi. (Job 1:9-11) Didie ke ndiyọ idomo edinam nnyịn ikop inemesịt?—2 Pet. 2:9.
2 Ben̄e Idem Nọ Idomo: Jehovah ọnọ nnyịn Ikọ esie emi esịnede mbụk uwem ye mme ukpepn̄kpọ Jesus. Ndikop nnyụn̄ nnam ikọ Jesus ayanam isọn̄ọ ida inyụn̄ iben̄e idem inọ afanikọn̄. (Luke 6:47-49) Ke adianade do, nditọete nnyịn, mbono esop, ye mme n̄wed oro ẹkọn̄ọde ke Bible, emi ofụn oro anamde akpanikọ onyụn̄ enyenede ọniọn̄ osiode, ẹsisọn̄ọ nnyịn idem. Oyom isibọn̄ akam inọ Abasi kpukpru ini sia enye ọnọ nnyịn ifet ndinam ntre.—Matt. 6:13.
3 Jehovah ọnọ nnyịn idotenyịn n̄ko. Edieke inen̄erede ibuọt idem ke mme un̄wọn̄ọ Jehovah, idotenyịn nnyịn editie nte “ukwak ubom [ọnọ] ukpọn̄ nnyịn, emi mîdikpụhu onyụn̄ ọsọn̄ọde ada.” (Heb. 6:19) Ke mme ini Bible, ẹma ẹsikama ukwak ubom ke ini ubom oyomde ndikpọn̄ esụk, idem ke ini enyọn̄ ọfọnde. Edieke oyobio abarade ke unana idotenyịn, ndida ukwak oro mmụm ubom nnịm idiyakke enye ọfiọrọ akabak ke mbenesụk oro ọyọhọde ye itiat. Kpasụk ntre, ndinyene mbuọtidem ke mme un̄wọn̄ọ Abasi idahaemi ayanam nnyịn isọn̄ọ ida ke ini ikpọ mfịna ẹdide. Mfịna ekeme nditịbe ke ata unana idotenyịn. Okposụkedi mme owo ẹkemade utom ukwọrọikọ Paul ye Barnabas ke Lystra, n̄kpọ ama ọsọsọp okpụhọde ke ini mme Jew oro ẹdide mme andibiọn̄ọ ẹkedide ẹdisịm.—Utom 14:8-19.
4 Ediyọ Ada Inemesịt Edi: Ndika iso n̄kwọrọ ikọ kpa ye ubiọn̄ọ esinam ekikere nnyịn ana sụn̄. Nnyịn imesidara ke ini ẹbatde ẹte imodot ndibọ esuene kaban̄a Christ. (Utom 5:40, 41) Ndiyọ idomo esinam nnyịn isụhọde idem, isụk ibuot, inyụn̄ inen̄ede inyene ime. (Deut. 8:16; Heb. 5:8; Jas. 1:2, 3) Ndiyọ idomo esikpep nnyịn ndikọn̄ mbuọtidem ke Jehovah, ndinịm mme un̄wọn̄ọ esie ke akpanikọ, ndinyụn̄ nda enye nte ebiet ubọhọ nnyịn.—N̄ke 18:10.
5 Nnyịn imọdiọn̄ọ ke idomo ẹdi ke ibio ini. (2 Cor. 4:17, 18) Idomo esinọ nnyịn ifet ndiwụt adan̄a nte imade Jehovah. Ndiyọ idomo ayanam inọ Jehovah n̄kpọ ndibọrọ ke edori ikọ Satan. Ntre, ẹyak nnyịn ikûkpa mba! “Inemesịt edi eke owo emi ọyọde idomo, koro ke ẹma ẹkenyịme enye, enye ọyọbọ anyanya uwem.”—Jas. 1:12.