Mme Aduai-Owo-Idem Ukpụhọde Oro Ẹdinamde ke Enyọn̄-Ukpeme!
1 Ke ntọn̄ọ ntọn̄ọ isua emi, mme esop ẹma ẹbọ aduai-owo-idem ntọt oro ọkọdọhọde ke ọtọn̄ọde ke January 2008, Enyọn̄-Ukpeme edinyene nsiondi iba, kiet eke mbonan̄wa, eken edi eke nditọete Christian nnyịn! Anaedi afo emekere ete: ‘Nso ididi ukpụhọde magazine mbiba emi? Nso idi ufọn edinyene nsio nsio nsiondi? Ndi mbufa n̄kpọ ẹyedu ke mme nsiondi emi?’
2 Se Idide Ukpụhọde: Ẹdikot akpa nsiondi oro, Nsiondi Mbonan̄wa. Ẹditịm kpukpru ibuotikọ ke nsiondi enye emi ẹnọ mbonan̄wa. Ẹdikot ọyọhọ nsiondi iba Nsiondi Ukpepn̄kpọ, ndien owo idinịmke enye ke an̄wautom. Enye eyesịne kpukpru ibuotikọ ukpepn̄kpọ ke ọfiọn̄ kiet, ọkọrọ ye mme ibuotikọ eken oro ẹdinen̄erede ẹnyene ufọn ọnọ mme Christian oro ẹma ẹkeyak idem ẹnọ. Mme Ntiense ẹdisụk imama Nsiondi Enyọn̄-Ukpeme Mbonan̄wa, edi mbon oro mîdịghe Mme Ntiense, edi ẹnịmde Bible ke akpanikọ ẹyenen̄ede ẹma Nsiondi emi. Nte ededi, ẹyeka iso ẹwet Awake! ke usụn̄ oro ata ediwak owo ẹdimade, esịnede mbon oro mînịmke Bible ye Christ ke akpanikọ.
3 Mme Ufọn Esie: Ke Nsiondi Ukpepn̄kpọ, ufọn ididụhe aba ndinam utọ ikọ nte “asiakusụn̄” an̄wan̄a mbon oro mîdịghe Mme Ntiense. Nsiondi emi ekeme n̄ko ndisịne akpan ntọt oro ẹtịmde san̄asan̄a ẹnọ Mme Ntiense Jehovah ye nditọ ukpepn̄kpọ Bible oro ẹnamde n̄kọri ke n̄kan̄ eke spirit. Nso kaban̄a Nsiondi Mbonan̄wa? Sia ibuotikọ ye nte ẹwetde edidemerede udọn̄ mbonan̄wa, akpana owo oro mîdịghe Ntiense ama ndikot enye n̄kụre. Nte ededi, kpukpru Ntiense Jehovah ẹyebọ ufọn ẹto edikot nsiondi kiet kiet. Sia idinọde Enyọn̄-Ukpeme kiet ye Awake! kiet ke ọfiọn̄ ke an̄wautom, nnyịn iyenyene ofụri ọfiọn̄ kiet ndida ntịm mme nneme an̄wautom oro ẹnyenede ufọn.
4 Mbufa N̄kpọ: Ẹtịm mme aduai-owo-idem mbufa n̄kpọ ẹdọn̄ ke nsiondi Enyọn̄-Ukpeme oro idinọde Mbonan̄wa. Obufa n̄kpọ kiet edidi ẹdineme mme akpan ukpepn̄kpọ N̄wed Abasi ke ata mmemmem usụn̄. Obufa n̄kpọ en̄wen oyowụt nte Bible ekemede ndin̄wam mme ubon. Ẹyewụt mme uyen mme ndutịm edikpep Bible. Nsiondi kiet kiet eyenyene ibuotikọ oro enemede se akpan itien̄wed Bible ekpepde nnyịn aban̄a mme edu Jehovah.
5 Nnyịn imeben̄e Jehovah ite ọdiọn̄ obufa ndutịm oro ẹnamde mi ẹban̄a Enyọn̄-Ukpeme. Magazine emi, ọkọrọ ye Awake! ẹkpekam ẹka iso ẹda eti mbụk ẹsọk ata ediwak mbon efen oro ẹdotde.—Matt. 10:11.