Imekeme Ndinọ Jehovah N̄kpọ
1 Ndi ama ọfiọk ke mme owo ẹkeme ndinọ Abasi n̄kpọ? Abel ama awa ndusụk nti ufene esie ọnọ Jehovah, Noah ye Job ẹma ẹnyụn̄ ẹwa ukem uwa oro. (Gen. 4:4; 8:20; Job 1:5) Nte ededi, mme utọ uwa oro ikanamde Andibot oforo ke baba usụn̄ kiet, sia edide enye enyene kpukpru n̄kpọ. Edi mme uwa oro ẹma ẹwụt ke mbon mbuọtidem oro ẹma ẹnen̄ede ẹma Abasi. Mfịn, nnyịn imekeme ndida ini, odudu, ye inyene nnyịn nnọ Jehovah nte “uwa ekọm.”—Heb. 13:15.
2 Ini: Ọfọn didie ntem ‘ndidep ifet,’ oro edi, ndida ini oro ikpadade inam mme n̄kpọ oro mînen̄ekede idi akpan n̄kpọ mbuana ọyọhọ ọyọhọ ke utom ukwọrọikọ! (Eph. 5:15, 16) Ekeme ndidi imekeme ndinam ukpụhọde ke ndutịm nnyịn man ikeme ndinam usiakusụn̄ unọ un̄wam ke ọfiọn̄ kiet m̀mê akande oro ke isua kiet. Imonyụn̄ ikeme ndidu mbịghi esisịt ke an̄wautom n̄kan nte isibịghide. Ndikwọrọ ikọ ke minit 30 efen ndian ke ibat hour oro isikwọrọde ikọ ke urua kiet ekeme ndinam ini oro ibiatde ke an̄wautom ke ọfiọn̄ kiet ada hour iba awak akan nte esidide.
3 Odudu: Oyom nnyịn ifep mme edinam ini nduọkodudu ye ubọkọkọ oro ẹdinamde idem enen̄ede emem nnyịn tutu nnyịn ikemeke ndida ofụri ukeme nnyịn nnam n̄kpọ Jehovah. Inyene n̄ko nditre editịmede esịt oro ekemede ‘ndinụk nnyịn nduọk,’ ọbọde nnyịn odudu oro ikpadade inam n̄kpọ Abasi. (N̄ke 12:25) Idem edieke odude se ikemede ndinam nnyịn itịmede esịt, akam enen̄ede ọfọn ‘nditop mbiomo nnyịn nnọ Jehovah’!—Ps. 55:22; Phil. 4:6, 7.
4 Inyene: Nnyịn imekeme n̄ko ndida inyene nnyịn nnam utom ukwọrọikọ aka iso. Paul ama esịn udọn̄ ọnọ ekemmọ mme Christian ete ‘ẹsisio n̄kpọ ẹkpọnọde ẹnịm’ kpukpru ini man ẹnyene se ẹnọde mbon oro ẹdude ke unana. (1 Cor. 16:1, 2) Ke ukem usụn̄ oro, nnyịn imekeme ndisio okụk nnịm man ikpetịp isịn ke utom esop nnyịn ye ke utom ofụri ererimbot. Jehovah esima se nnyịn inọde ke ofụri esịt, idem ọkpọkọm ekpekpri.—Luke 21:1-4.
5 Jehovah ọmọnọ nnyịn ekese n̄kpọ. (Jas. 1:17) Nnyịn iwụt esịtekọm iban̄a se enye anamde ọnọ nnyịn ke ndida ini, odudu, ye inyene nnyịn nnam n̄kpọ esie. Nnyịn ndinam emi esinem Jehovah esịt, koro “Abasi amama owo eke ọnọde ke idatesịt.”—2 Cor. 9:7.