Afo Emekeme Ndinyene Inyene!
1. Ntak emi ọfọnde ndikere mban̄a edinam utom usiakusụn̄ ofụri ini-e?
1 Nte omoyom ndinen̄ede n̄kop idatesịt ye uyụhọ ke uwem fo? Nte emesikop inemesịt ye uyụhọ ke ndin̄wam mbon en̄wen? Nte ọdọn̄ fi ndinam ekese ke utom Jehovah? Edieke ọbọrọde ih ke mbụme ekededi ke otu emi, ọwọrọ ke afo emekeme ndinam utom usiakusụn̄ ofụri ini. Nte ededi, mbiomo ubon ye mme mbiomo N̄wed Abasi eken, ọkọrọ ye udọn̄ọ ye mmeme ikpọkidem ẹkeme ndikpan ndusụk owo ndinam utom usiakusụn̄.
2. Tịn̄ ndusụk edidiọn̄ eke spirit oro mme asiakusụn̄ ofụri ini ẹnyenede.
2 N̄wed oro Solomon akadade odudu spirit Abasi ewet owụt ke ufọn m̀mê edidiọn̄ Jehovah oro oforide owo enyene ebuana n̄ko ye inyene obụkidem. (N̄ke 10:22) Mfịn, ufọn Jehovah ofori owo akpan akpan ke n̄kan̄ eke spirit. Mme asiakusụn̄ ofụri ini ẹnen̄ede ẹnyene utọ edidiọn̄ oro. Ke uwụtn̄kpọ, mmọ ẹsinen̄ede ẹkop inemesịt oro edinọ mbon en̄wen n̄kpọ adade edi nte mmọ ‘ẹdepde ifet’ oro mmọ ẹkpedade ẹnam mbubehe idemmọ. (Col. 4:5; Utom 20:35) Jehovah okụt onyụn̄ ama utom ima oro mmọ ẹnamde. Tutu amama utọ ‘n̄kpọuto emi ẹbonde ke heaven’ mi iditreke ndinyene ufọn. (Matt. 6:20; Heb. 6:10) N̄ko-n̄ko, nte mme asiakusụn̄ ẹnamde ‘enyịn mmọ ẹnen̄ede ẹse’ ẹnyụn̄ ẹnyenede mbuọtidem nte ke Jehovah ọyọnọ mmimọ mme n̄kpọ udu-uwem, emi anam itie ebuana mmọ ye enye etetịm ọsọn̄.—Matt. 6:22, 25, 32; Heb. 13:5, 6.
3. Nso ukpụhọde idu ke edibịne inyene eke spirit ye edibịne inyene obụkidem?
3 Ndibịne inyene obụkidem esiwak ndida n̄kosụn̄ọ ke “ediwak ndisịme ye idiọk udọn̄.” (1 Tim. 6:9, 10; Jas. 5:1-3) Edidiọn̄ Jehovah idaha ikosụn̄ọ ke mme utọ n̄kpọ oro. Mme asiakusụn̄ ofụri ini ndibiat ekese ini ke an̄wautom an̄wam mmọ ndida ukem ukem ke n̄kan̄ eke spirit nnyụn̄ nnen̄ede mfiọk se idide akpan n̄kpọ ikan. (Phil. 1:10) Eyenete kiet ama ọkpọn̄ utom esie nte ọdiọn̄-ukwakutom, emi ekesidiade ini esie, man ọtọn̄ọ usiakusụn̄. Enye ọkọdọhọ ete: “Utom idịbi udia mi ama esinen̄ede efịk mi. Edi usiakusụn̄ itiehe ntre. Idahaemi ndiwọwọrọ n̄kan̄wam mme owo nnyụn̄ n̄kpep mmọ akpanikọ. Emi enen̄ede ọnọ mi uyụhọ ye inemesịt.”
4. Didie ke ẹsidiọn̄ mme asiakusụn̄ ofụri ini nte mmọ ẹdade edidiọn̄ ẹsọk mbon en̄wen?
4 Mmọ Ẹdi Edidiọn̄ Ẹnọ Mbon En̄wen: Mfịn, kpukpru owo ẹsobo “ndiọkeyo.” (2 Tim. 3:1) Mme owo ke kpukpru ebiet ẹnen̄ede ẹyom idotenyịn. Mme anditan̄a Obio Ubọn̄ ẹsikop idatesịt ndin̄wam mbon oro mîkenyeneke idotenyịn ndikop eti mbụk nnyụn̄ nnam n̄kpọ mban̄a se ẹkpepde. Idatesịt oro esikpon didie ntem ye mme asiakusụn̄ ofụri ini emi ẹsibiatde se iwakde ibe hour 800 kpukpru isua ke utom unyan̄a uwem emi!—1 Tim. 4:16.
5, 6. Nso ikeme ndin̄wam fi akabade edi asiakusụn̄ ofụri ini?
5 Nte afo emenen̄ede ekere aban̄a edinam utom nte asiakusụn̄ ofụri ini? Emi ekeme ndiyom ‘ededep ifet’ oto mme n̄kpọ oro mînen̄ekede idi akpan n̄kpọ. (Eph. 5:15, 16) Ediwak owo ẹmenam ntre ẹnyụn̄ ẹdu mmemmem uwem, ndien emi ayak mmọ ẹkeme ndisịn esisịt ini ke utom idịbi udia mmọ man ẹkeme ndisịn ekese ini ke n̄kpọ Obio Ubọn̄. Nte afo emekeme ndinam ndutịm man ẹtiene asiak usụn̄?
6 Ben̄e Jehovah ọnọ fi ọniọn̄ man ekeme ndinam ndutịm oro edifọnde ye afo. (Jas. 1:5) Mme edidiọn̄ ewe ke afo okpodori enyịn ndibọ? Akpakịp inyene eke spirit! Jehovah ọyọdiọn̄ fi n̄ko ke n̄kan̄ eke obụk ke ndinọ fi se oyomde. (Matt. 6:33) Mbon oro ẹdade emi ẹdomo Jehovah ẹse ẹyebọ “nti n̄kpọ, tutu akaha.”—Mal. 3:10.