Ukpọhọde Inemesịt Ubon
1 Ubon edi akpan ubak n̄kaowo, ndien mme obio-in̄wan̄, ikpọ obio, mme stet, ye ofụri idụt ẹwọrọ ẹto ubon. Mfịn mme ubon ẹdu ke idak mfịghe akan nte akanam ẹdude. Satan, mme demon esie, ye idiọk ererimbot ke ẹka iso ndisịn ndutịme ke ubon. (1 John 5:19) Nnyịn ikop inemesịt didie ntem nte ke Jehovah, Andikọtọn̄ọ ndutịm ubon, ọmọnọ nnyịn mme item man otodo nnyịn ikeme ndinyene inemesịt ke ubon! Mbon oro ẹtienede ndausụn̄ esie ẹkụt ke mme mfịna ẹsisụhọde ubọk ẹnyụn̄ ẹnyene ubon oro okụtde unen.
2 Mme Edumbet Bible Ẹdi N̄kpọ Ukpeme: Mme mfịna emi mme ubon ẹsobode mfịn ẹwụt nte ọfọnde ‘ndibọp ubon nnyịn’ nnyụn̄ n̄kpep mbon en̄wen nte mmọ ẹkemede ndinam ukem oro nnọ ubon mmọ. (N̄ke 24:3, 27) Ndida mme edumbet Bible nsịn ke edinam esinam ubon okop inemesịt. Mme okopodudu akpanikọ emi ẹnyene ufọn ẹnọ kpukpru mme andibuana ke ubon ke ofụri ikpehe uwem. Ubon oro adade mmọ esịn ke edinam oyokop inemesịt onyụn̄ enyene emem Abasi. (Men Isaiah 32:17, 18 domo.) Ẹda n̄wed Ukpọhọde Inemesịt Ubon ẹwụt nnyịn ke ibio ibio usụn̄ mme edumbet oro ẹkemede ndin̄wam nnyịn ibọp ufọk nnyịn. Ibuot kiet kiet etre ye ọnọ-un̄wam ekebe unọ ukpep oro ọsọn̄ọde owụt mme edumbet oro oyomde mme andibuana ke ubon ẹti. Ekese ke otu ekebe emi ẹtọn̄ọ ye mbụme oro, “Didie ke mme edumbet Bible emi ẹkeme ndin̄wam . . . ?” Emi odụri ntịn̄enyịn owụt mme ekikere Abasi man otodo nnyịn inyene ekikere esie ke se ẹnemede.—Isa. 48:17.
3 Tọn̄ọ Idahaemi Tịm Idem Man Ọbọ Ufọn: Biere idahaemi ndibọ ufọn ọyọhọ ọyọhọ nto ukpepn̄kpọ n̄wed Inemesịt Ubon, emi editọn̄ọde ke urua August 4, 2008! Diomi ndidụk Ukpepn̄kpọ N̄wed Esop kpukpru urua. Da ini tịm idem nọ ukpepn̄kpọ kiet kiet, okotde mme itie N̄wed Abasi emi ẹdude do man ẹse nte mmọ ẹnyenede ebuana ye se ẹnemede. Da utọ mbụme ntem kere ban̄a se ẹnemede, ‘Didie ke n̄keme ndida se ẹnemede mi nsịn ke edinam ke ufọk, ke ufọkn̄wed, ke an̄wautom, ye ke edinam mi ye ekemmọ nditọete?’ Tịm idem di Ukpepn̄kpọ N̄wed Esop ndinọ ibọrọ man abuana ke ndinọ nsịnudọn̄ eke otode edem mbiba.—Rome 1:12.
4 Mme ubon oro ẹten̄ede Abasi ẹyesọn̄ idem ke n̄kan̄ eke spirit ẹnyụn̄ ẹdiana kiet, ẹyenyụn̄ ẹtịm idem mfọn mfọn ndiyọ mme en̄wan Satan. (1 Tim. 4:7, 8; 1 Pet. 5:8, 9) Nnyịn iwụt esịtekọm didie ntem nte ke imenyene item Abasi emi otode Andikọtọn̄ọ ubon!