Obufa Ndutịm Usen Akpan Mbono

Ibuotikọ ndutịm Usen Akpan Mbono eke 2009 edi “Ka Iso Kpeme Utom Emi . . . , Man Anam Enye Ama,” ndien ẹda enye ẹto Colossae 4:17. Nnyịn mme Christian ida item oro ke akpan n̄kpọ. Uduak nnyịn edi ndinam utom nnyịn mma, kpa nte Jesus akanamde. (John 17:4) Apostle Paul n̄ko ama enịm ata eti uwụtn̄kpọ ọnọ nnyịn ke afan̄ emi. Enye ama ebiere ndinam utom esie mma.—Utom 20:24.

Utịn̄ikọ esenyịn circuit oyowụt nte mme asuanetop ẹkande nsio nsio n̄kpọ-ata oro mmọ ẹsobode ke utom ukwọrọikọ. Ekem utịn̄ikọ oro, “Bọk Se Ọkọtọde,” oyowụt nte ikemede ndinen̄ede n̄n̄wam mbon oro “ẹnyenede eti esịt ndinyene nsinsi uwem.” (Utom 13:48) Etịn̄ikọ oro otode-to edi eyeneme ufan̄ikọ kiet kiet ke 2 Corinth 6:1-10, ke ibuotikọ oro, “Nte Itorode Idem Nnyịn nte Mme Asan̄autom Abasi.” Enye eyeneme ibuotikọ oro “Da Utom Ukwọrọikọ Fo ke N̄kpọ Ukpono,” ke ikpehe edinam uwemeyo. Ke akpanikọ, mme utịn̄ikọ nte “N̄kpri ye Ikpọ Ẹma Utom Ukwọrọikọ” ye “Mme Uyen oro Ẹnamde Utom Ukwọrọikọ Ọyọhọ Ọyọhọ” ẹyesịn udọn̄ ẹnọ fi. Mbon oro ẹyomde ndina baptism nte uyarade uyakidem mmọ ke mbono circuit m̀mê usen akpan mbono ẹkpenyene ndibabak nsian esenyịn oro etiede ibuot. Ẹsinọ utịn̄ikọ Enyọn̄-Ukpeme ke kpukpru mbono nnyịn. Men enye emi ẹdikpepde ke urua usen akpan mbono oro kama di.

Nte ikpemede man inam utom nnyịn ima, nnyịn imesidomo ndikụt nte ke se idọn̄de nnyịn ye mme edinam en̄wen idaha ini emi ikpadade inam utom emi Jehovah ọnọde nnyịn. Nsịnudọn̄ N̄wed Abasi oro idibọde ke ndutịm usen akpan mbono emi akpakam an̄wam kpukpru nnyịn ifiọk se anade inam man inen̄ede itịn̄ enyịn inyụn̄ idụn̄ọde utom nnyịn man inam enye ima.