Kpep Mbon En̄wen Ẹma Jehovah
1. Nso inam ndusụk owo ẹsan̄a ẹkpere Jehovah?
1 Ndi emeti akpa ini emi afo okokopde nte ẹtịn̄de n̄kpọ ẹban̄a Jehovah? Nso ikanam afo ama enye? Ediwak mbon emi ẹnyenede eti esịt ẹyedọhọ fi ẹte ke mmimọ ikasan̄a ikpere Andibot nnyịn ke ini mmimọ ikọfiọkde iban̄a nti edu esie, akpan akpan mbọm ye ima esie.—John 4:8.
2, 3. Didie ke nnyịn ikeme ndida n̄wed Bible Ekpep n̄n̄wam nditọ ukpepn̄kpọ nnyịn ẹnen̄ede ẹma Jehovah?
2 “Abasi Nnyịn Edi Emi”: N̄wed Bible Ekpep enen̄ede etịn̄ aban̄a ima Jehovah ye nte ọfọnde ndinyene ọkpọkpọ itie ebuana ye enye. Didie ke nnyịn ikeme ndida n̄wed emi n̄kpep mbon en̄wen ẹnen̄ede ẹma Abasi? Ke ini ikpepde obufa n̄kpọ, nnyịn imekeme ndibụp mme mbụme oro ẹnamde owo ekere n̄kpọ, utọ nte: “Nso ke akpanikọ emi ayarade aban̄a Jehovah?” m̀mê “Didie ke emi owụt nte ke Jehovah edi mfọnn̄kan Ete oro owo ekededi ekemede ndinyene?” Ndinọ ukpep ke utọ usụn̄ emi ekeme ndin̄wam eyen ukpepn̄kpọ ọtọn̄ọ ndinyene eti itie ebuana ye Jehovah ke ofụri eyouwem esie.
3 Ke ini nnyịn in̄wamde nditọ ukpepn̄kpọ ẹfiọk ke edi ata akwa ifet ndikpep n̄kpọ mban̄a odu-uwem Abasi akpanikọ kierakiet, mmọ ẹyenyịme ke “Abasi nnyịn edi emi” nte ẹwetde ke Isaiah 25:9. Ke ini inamde Ikọ Abasi an̄wan̄a, oyom nnyịn isọn̄ọ itịn̄ nte Jehovah edidiọn̄de ubonowo ke ini enye edisude uduak esie ke ukara esie emi Jesus Christ edide edidem.—Isa. 9:6, 7.
4, 5. Nso ke ndima Jehovah ọwọrọ?
4 Ndiwụt ke Imama Jehovah: Nnyịn imọfiọk ke owo ndima Jehovah ke ofụri esịt, ukpọn̄, ye ekikere akan ikpîkpu edinen̄ede n̄kere mban̄a Abasi. Ana nnyịn ikere n̄kpọ nte enye ekerede. (Ps. 97:10) Nnyịn iwụt ke imama Abasi ke ndinịm kpukpru mbet esie nnyụn̄ n̄ka iso ndu ‘edisana ido uwem nnyụn̄ nnam mme edinam uten̄e Abasi,’ idem ke ini isobode idomo ye ukọbọ.—2 Pet. 3:11; 2 John 6.
5 Esinen̄ede enem nnyịn ndinam uduak Abasi ke ntak imade enye. (Ps. 40:8) Ana eyen ukpepn̄kpọ Bible ọfiọk ke kpukpru ibet oro Abasi enịmde edi ke nsinsi ufọn mme asan̄autom Esie. (Deut. 10:12, 13) Owo oro etienede ndausụn̄ Jehovah owụt ke imenen̄ede inyene esịtekọm iban̄a mme utịbe n̄kpọ Esie. N̄wam eyen ukpepn̄kpọ fo ọfiọk nte ke ndisan̄a ke ndinen usụn̄ Jehovah ayanam owo efep ekese ubiak ye iduọesịt.
6. Nso edidiọn̄ ke owo emi amade Jehovah ekeme ndinyene?
6 Nte Ẹdidiọn̄de Mbon Oro Ẹmade Abasi: Jehovah enen̄ede ekere aban̄a mbon nsụhọdeidem oro ẹmade enye, enye onyụn̄ ayarade “nditụn̄ọ n̄kpọ [Esie]” ọnọ mmọ. (1 Cor. 2:9, 10) Mmọ ndifiọk uduak Jehovah anam mmọ ẹnyene nnennen ekikere ẹban̄a ini iso ẹnyụn̄ ẹnyene idotenyịn. (Jer. 29:11) Jehovah esinen̄ede ọfọn ido ye mbon oro ẹmade enye. (Ex. 20:6) Mmọ ẹnyene idotenyịn ndidu uwem ke nsinsi ke ntak emi Abasi enen̄erede ama mmọ.—John 3:16.
7. Esitie fi didie ke idem ke ini ekpepde mbon en̄wen ẹma Jehovah?
7 Adan̄a nte inen̄erede ifiọk Ete nnyịn eke heaven, ntre n̄ko ke ana nnyịn iteme mbon en̄wen. (Matt. 13:52) Nso n̄kpọ ukpono ke edi ntem ndikpep mbon en̄wen, akpan akpan nditọ nnyịn, ẹma Jehovah! (Deut. 6:5-7) Nnyịn ye nditọ ukpepn̄kpọ Bible nnyịn ikpakam ika iso ikwọ itoro nte nnyịn itide ‘akwa ufọn Jehovah.’—Ps. 145:7.