Ukpepn̄kpọ Bible Idemowo ye Eke Ubon Ẹdi Akpan N̄kpọ!
1. Nso ke Otu Ukara oyom ndinam nnọ nnyịn idahaemi, ndien ntak emi enye oyomde ndinam ntre?
1 Kpa nte ekedide ke akpa isua ikie, Otu Ukara oyom ndinam kpukpru se enye ekekeme man ese aban̄a ufọn ikọt Jehovah. (Utom 15:6, 28) Nte akwa ukụt enen̄erede asan̄a ekpere, enen̄ede oyom kpukpru mme asuanetop Obio Ubọn̄ ẹnyene ata eti itie ebuana ye Jehovah. Afo edida ini oro ẹkesidade ẹnịm Ukpepn̄kpọ N̄wed Esop anam nso? Ẹsịn udọn̄ ẹnọ kpukpru owo ẹte ẹda ini emi ẹnịm utuakibuot ubon. Ndida ini emi nnam n̄kpọ ọniọn̄ ọniọn̄ ayan̄wam nnyịn inen̄ede idụn̄ọde Ikọ Abasi eke odudu spirit inyụn̄ ibọ ufọn ọnọ-uwem “mmọn̄” esie.—Ps. 1:1-3; Rome 11:33, 34.
2. Didie ke ikeme ndinam ndutịm nnọ usen utuakibuot ubon idem nnyịn, ndien nso kaban̄a nditọete iren ye iban emi mîdọhọ ndọ?
2 Usen Utuakibuot Ubon: Ẹsịn udọn̄ ẹnọ mme ibuot ufọk ẹte ẹbiom mbiomo mmọ ke iso Jehovah ke ndikụt ete ke imenịm ukpepn̄kpọ Bible ubon kpukpru ini. (Deut. 6:6, 7) Nditọete oro mîdọhọ ndọ mînyụn̄ inyeneke mbiomo ubon ẹyeda ini emi ẹnam ukpepn̄kpọ Bible ye ndụn̄ọde Bible idemowo. Oyom kpukpru owo ‘ẹdedep ifet’ ẹda ẹkpep ẹnyụn̄ ẹtie ẹkere n̄kpọ man ẹka iso ẹnyene ata eti itie ebuana ye Jehovah ke ‘mme idiọk usen emi.’—Eph. 5:15, 16.
3, 4. Mme ekikere ewe ke ẹnọ ẹban̄a se ikemede ndikpep, ndien nso ikpedi uduak?
3 Se Ẹkpekpepde: Watch Tower Publications Index m̀mê Watchtower Library ke usan umụm ntọt kọmputa ekeme ndin̄wam fi okụt ntọt oro edinamde ukpepn̄kpọ Bible fo enem fi. Mme ubon ẹkeme ndineme mme ibuotikọ Enyọn̄-Ukpeme, utọ nte ikpehe oro “Ukpọhọde Inemesịt Ubon,” “Kpep Nditọ Fo,” ye “Eke N̄kparawa Owo.” N̄ko, ikpehe “N̄kparawa Owo Ẹbụp” ye mme inem inem ibuotikọ oro ẹban̄ade mme utịbe utịbe n̄kpọ obot ẹdu ke Awake!
4 Edikot Bible oro owo mîkotke itọk itọk ekeme ndin̄wam kpukpru owo ke ubon nditi nnyụn̄ nda mme edumbet Abasi nsịn ke edinam ke uwem mmọ. (Heb. 4:12) Ke mme idaha en̄wen, mbufo ẹmekeme ndise nnyụn̄ nneme kiet ke otu vidio oro esop Abasi osiode. Ediwak n̄kpọ ẹdu ndimek nnyụn̄ n̄kpep. Ntak mûbụpke ikọtufọk fo se mmọ ẹkpemade-e?
5. Ntak emi ukpepn̄kpọ Bible idemowo ye eke ubon ẹdide ata akpan n̄kpọ ẹnọ nnyịn idahaemi-e?
5 Ntak Emi Edide Akpan N̄kpọ Idahaemi: Ndisọn̄ọ itie ebuana nnyịn ye Abasi eyetịm nnyịn idem man ‘ituak ida, inyụn̄ ikụt edinyan̄a Jehovah.’ (Ex. 14:13) Mme ete ye eka ẹyom ndausụn̄ Abasi man ẹbọk nditọ “ke n̄kakwan̄a emana emi.” (Phil. 2:15) Nditọ ẹyom un̄wam man ẹfep mbiara ido uwem ke mme ufọkn̄wed mfịn. (N̄ke 22:3, 6) Ọfọn mme ọdọ ndọ ẹsọn̄ọ mbọbọ “urụk eke ẹfiakde ita-ita” ye Jehovah. (Eccl. 4:12) Mmọdo, ẹyak ida ini oro osụhọde ibọp idem nnyịn “ke ata edisana mbuọtidem”!—Jude 20.