Kpukpru se Abasi okobotde ẹma ẹdiana kiet ẹnyụn̄ ẹdu ke emem ini Abasi akakarade kpukpru mmọ

Ntak Emi Iyomde Obio Ubọn̄ Abasi Edi?

Toto ke ini emi ẹkebotde Adam ye Eve, Andibot nnyịn emi ekerede Jehovah akakara kpukpru owo. Enye akakara ke ata eti usụn̄. Enye ama anam ata ediye in̄wan̄ ke Eden ọnọ mme owo ẹdụn̄. Enye ama anam ediwak udia odu ọnọ mmọ, onyụn̄ ọnọ mmọ eti utom ẹnam. (Genesis 1:28, 29; 2:8, 15) Ekpedi mme owo ẹma ẹka iso ẹyak Abasi akara mmọ, emem okpodu ke ofụri isọn̄ tutu esịm emi.

Eve ọnọ Adam mfri eto oro Abasi ọkọdọhọde mmọ ẹkûdia. — Adam ye Eve ikenyịmeke Abasi akara mmimọ

Bible ọdọhọ ke idiọk angel kiet, emi ẹkedide ẹdikot Satan kpa Devil, ama ọdọhọ ke Abasi idotke ndikara. Enye ọkọdọhọ ke mme owo ẹyenen̄ede ẹkop inemesịt edieke mmọ mîyakke Abasi akara mmọ. Adam ye Eve emi ẹkedide akpa ete ye eka nnyịn ẹma ẹtiene Satan ẹsọn̄ ibuot ye Abasi.—Genesis 3:1-6; Ediyarade 12:9.

Sia Adam ye Eve mîkayakke Abasi akara mmọ, Abasi ama ebịn mmọ osio ke Paradise oro mmọ ẹkedụn̄de, mmọ ikonyụn̄ inyeneke aba idotenyịn ndidu uwem ke nsinsi. (Genesis 3:17-19) Se mmọ ẹkebierede oro ama ada afanikọn̄ ọsọk nditọ emi mmọ ẹkedide ẹdinyene. Bible ọdọhọ ke ‘idiọkn̄kpọ okoto Adam odụk ererimbot, n̄kpa onyụn̄ oto ke idiọkn̄kpọ oro odụk.’ (Rome 5:12) Idiọkn̄kpọ oro ama ada akamba mfịna en̄wen edi. Ecclesiastes 8:9 ọdọhọ ke ‘owo akara owo tutu ọnọ enye unan.’ Oro ọwọrọ ke mfịna edisụk idodu edieke mme owo ẹsụk ẹkarade.

MME OWO ẸTỌN̄Ọ NDIKARA

Nimrod ada n̄kon̄ine n̄kon̄ine. Mme owo ke ẹbọp ufọk. — Nimrod ama ọsọn̄ ibuot ye Jehovah

Bible ọdọhọ ke Nimrod edi akpa owo emi akakarade mme owo. Enye ama ọsọn̄ ibuot ye Jehovah onyụn̄ owụt ke imọ iyomke Jehovah akara mme owo. Tọn̄ọ ke eyo Nimrod, mbon emi ẹkarade ẹda odudu mmọ ẹfịk mme owo. Edidem Solomon ekewet ke n̄kpọ nte isua 3,000 emi ekebede ete: “Sese! mmọn̄eyet mmọ emi ẹfịkde, inyụn̄ idụhe owo eke ọdọn̄de mmọ esịt; ndien mme andifịk mmọ ẹnyene odudu.”—Ecclesiastes 4:1.

Se isụk itịbede edi oro mfịn. N̄wed United Nations kiet ọkọdọhọ ke 2009 ete ke mme owo ẹnen̄ede ẹkụt ke idiọk ukara edi ntak ediwak mfịna emi inyenede ke ererimbot emi.

ABASI ỌMỌN̄ ANANAM N̄KPỌ!

Imoyom eti ukara ye nti mme andikara. Se Abasi onyụn̄ ọn̄wọn̄ọde ndinam edi oro!

Nsio nsio ndise: Se ukara owo anamde. 1. N̄wan Asia etie ke ndedehe efak akama nsekeyen ke ubọk, ndien eyen oro ke atua. 2. Akanieren ete emi ana ke bed ufọkibọk. 3. Mbonekọn̄ ke ẹtop ikan̄. 4. Mbon emi ẹyatde esịt ye ukara ke ẹfiori n̄kpo. 5. Mma emi ye eyen esie ẹda ke iso ufọk mmọ ẹkụt ke ẹbom usụn̄ ufọk mmọ. 6. Ukwak emi osion̄o nsụn̄ikan̄ ofụk efak, ediwak urụkikan̄ ẹnyụn̄ ẹdu ke efak oro. — Mme owo ikemeke nditre ikpọ mfịna oro inyenede ọkpọkọm mmọ ẹtịme didie

Abasi ọtọn̄ọ Obio Ubọn̄ m̀mê ukara emi edidade itie ukara owo, ndien ukara esie oro ikpọn̄ ‘edida ke nsinsi.’ (Daniel 2:44) Obio Ubọn̄ emi ke ediwak owo ẹsibọn̄ akam ẹyom. (Matthew 6:9, 10) Edi idịghe Abasi ke idemesie edikara ke Obio Ubọn̄ emi. Utu ke oro, enye emek owo emi okodụn̄de ke isọn̄ inikiet ko edi Edidem Obio Ubọn̄ emi. Anie ke Abasi emek?