Da Mme N̄wed Nnyịn Nam N̄kpọ ke Eti Usụn̄
1. Didie ke nnyịn ikeme ndinyene esịtekọm mban̄a mme n̄kpọ oro Jehovah ọnọde nnyịn ukem nte Jesus ekenyenede?
1 Ke Jesus ama ọkọnọ ata ediwak owo udia ke utịbe utịbe usụn̄ ama, enye ama ọdọhọ mme mbet esie ẹtan̄ mbubek udia oro. (Matt. 14:19-21) Utọ esịtekọm oro Jesus ekenyenede aban̄a udia oro Jehovah ọkọnọde mi owụt ke akpana nnyịn n̄ko ‘iwụt esịtekọm’ ke ndida kpukpru se Jehovah ọnọde nnyịn ebe ke “akama-ukpọhọde emi anamde akpanikọ,” nnam n̄kpọ ke eti usụn̄.—Col. 3:15; Luke 12:42; Matt. 24:45-47.
2. Nso ke ikpanam man magazine nnyịn ediwak akaha?
2 Mme Magazine: Magazine nnyịn ekeme ndinen̄ede n̄wak edieke nnyịn mîsinịmke mmọ ke an̄wautom. Edieke magazine oro ẹsiyọhọde ẹsụhọ ẹsiwakde, sụhọde ibat oro esibọde. Nso kaban̄a n̄kani magazine? Mme magazine emi ẹsụk ẹnyenyene ufọn okposụkedi emi ẹkanide. Edieke inyenede ediwak n̄kani magazine, esenyịn utom m̀mê ebiowo en̄wen ekeme ndisian nnyịn mme usụn̄ oro ikemede ndinịm mmọ.
3, 4. Nso ke ikpeti ke ini ibọde n̄wed ke Ufọkmbono Obio Ubọn̄?
3 Mme N̄wed Eken: Ke ini ẹsiakde n̄wed oro ẹdinọde, bem iso se m̀mê emenyenyene mbon oro ọkọbọde man ọnọ ke an̄wautom mbemiso ọbọde efen ke Ufọkmbono Obio Ubọn̄. Bọ ibat n̄wed oro edikemede ndinịm mma ke urua kiet, nyụn̄ fiak kọbọ efen edieke se ọkọbọde okụrede.
4 Ke ini otobode n̄wed ọnọ idemfo, bọ ibat oro oyomde kpọt. Wet enyịn̄ fo ke ebiet oro ẹnịmde. Emi ayanam ekeme ndifiak n̄kụt n̄wed fo edieke osopde. Edieke enyenede Watchtower Library, esinyụn̄ etịmde mme magazine fo obon, ekeme ndidi idiyomke afiak otobo mme eboho Enyọn̄-Ukpeme ye Awake!
5. Nso ke ikpeti ke ini inọde mme owo n̄wed?
5 Ndinọ Mme Owo N̄wed: Nnyịn isinọ mbon oro ẹnyenede udọn̄ mme n̄wed nnyịn. Ti ete ke nnyịn inen̄ede inyene mbiomo editịp okụk man ẹka iso ẹda ẹmịn̄ mme n̄wed emi. Ke ini ọnọde owo emi enyenede udọn̄ n̄wed, dọhọ enye ke enye ekeme nditịp n̄kpọ man ọnọ utom ofụri ererimbot emi ibetedem.
6. Ntak emi idade mme n̄wed nnyịn ke ata akpan n̄kpọ, ndien ndifiọk emi edinam nnyịn ida mme n̄wed emi inam n̄kpọ didie?
6 Jesus ama ọnọ ediwak owo udia ke utịbe utịbe usụn̄, edi enye ekesiwak ndinọ mme owo udia eke spirit. Enye ọkọdọhọ ete: “Idịghe uyo ikpọn̄ ke ana owo ada odu uwem, edi edida kpukpru ikọ eke ẹwọrọde Jehovah ke inua odu.” (Matt. 4:4) N̄wed nnyịn ọdọn̄ọ akpanikọ Bible oro anade owo ọfiọk man enyene nsinsi uwem. (John 17:3) Mme N̄wed emi ẹnen̄ede ẹsọn̄ urua, ntre ifọnke ibabaha mmọ.