Utom Ukwọrọikọ Nnyịn Owụt Ima Oro Imade Abasi
1. Nso ke Jesus akanam ke ntak ima oro enye akamade Abasi?
1 Ima okonụk Jesus anam utom ukwọrọikọ esie. Kpukpru ikpehe utom ukwọrọikọ Jesus enen̄ede owụt ima oro enye akamade Jehovah. Jesus ọkọdọhọ ete: “Man ererimbot ọfiọk ete ke ami mmama Ete, idem kpa nte Ete ọkọnọde mi ibet ete nnam, kpa ntre ke ami nnam.” (John 14:31) Nte mme andisan̄a ke nde ikpat Jesus, nnyịn n̄ko imenyene ifet ndida utom ukwọrọikọ nnyịn n̄wụt ntotụn̄ọ ima oro imade Abasi.—Matt. 22:37; Eph. 5:1, 2.
2. Didie ke ima emi imade Jehovah otụk utom ukwọrọikọ nnyịn?
2 “Yak Ẹnam Enyịn̄ Fo Asana”: Ke ini isịnde idem ida kpukpru ifet oro ẹbererede itịn̄ iban̄a Jehovah ye Obio Ubọn̄ esie, nnyịn iwụt ima oro imade Abasi ndien, ke nditịm ntịn̄, itiene inam enyịn̄ esie asana. (Ps. 83:18; Ezek. 36:23; Matt. 6:9) Nte ekedide ke utom ukwọrọikọ Jesus, utom ukwọrọikọ nnyịn aka iso owụt ke enen̄ede ọdọn̄ nnyịn owo ndinam enyịn̄ Jehovah asana onyụn̄ ọdọn̄ nnyịn owo ndinam uduak esie.—Matt. 26:39.
3. Ke nso usụn̄ ke ima oro imade Jehovah ekeme ndin̄wam nnyịn ikan n̄kpọ ubiọn̄ọ?
3 Ima Anam Nnyịn Ikan Mme N̄kpọ Ubiọn̄ọ: Ima oro imade Jehovah akan kpukpru n̄kpọ ubiọn̄ọ. (1 Cor. 13:4, 7) Jesus ama osobo ekese n̄kpọ ke uwem oro ọkpọkọbiọn̄ọde enye ndika iso ke utom ukwọrọikọ esie. Nte ededi, ke ini enye okosobode ubiọn̄ọ, akwa ima oro enye ekenyenede ye udọn̄ esie ndinam uduak Jehovah ama an̄wam enye ndikan mfịna oro. (Mark 3:21; 1 Pet. 2:18-23) Nnyịn n̄ko imesisobo ekese mfịna, oro ima emi imade Abasi ekemede ndin̄wam nnyịn ikan. Ke nditiene uwụtn̄kpọ oro Christ ekenịmde, nnyịn imekeme ndinyene uko inyụn̄ iyakke n̄kpọ ọbiọn̄ọ nnyịn ndinam utom ukwọrọikọ nnyịn. Okposụkedi emi ubiọn̄ọ otode ubon, unana nsọn̄idem, usọn̄, m̀mê unana udọn̄ ẹkemede nditụk nnyịn, emi ikemeke ndinam nnyịn itre ndiwụt ima oro imade Jehovah ke ndinam utom ukwọrọikọ nnyịn uforo uforo nte ikekeme.
4. Nso ifet ke inyene ke ndima Jehovah?
4 Ima okop odudu, ndien ẹdiọn̄ nnyịn ye ukeme ndida utom ukwọrọikọ nnyịn n̄wụt ima ofụri ukpọn̄ oro imade Abasi. (1 Cor. 13:13) Nte nnyịn isọpde isan̄a ikpere ini emi ẹdinamde enyịn̄ Jehovah asana ke nsinsi, ‘ima nnyịn akpakam ọdọdiọn̄ awak.’—Phil. 1:9; Matt. 22:36-38.