Ndi Emekeme Nditat Utom Ukwọrọikọ Fo?
1. Nso ke oyom ẹsọsọp ẹnam, ndien ntak-a?
1 Ke Jesus ama okokụt ke ediwak owo ẹnyene udọn̄ ke eti mbụk Obio Ubọn̄, enye ama eteme mme mbet esie ete “ẹben̄e Enyene idọk ẹte osio mme anamutom ọnọ ẹdi ke idọk esie.” (Matt. 9:37, 38) Sia idude ke utịt ini idọk, oyom ẹsọsọp ẹnam utom emi akan nte akanam ẹyomde. Emi ọwọrọ ke ikpenyene ndibọn̄ akam mben̄e ukeme ndibuana ọyọhọ ọyọhọ ke utom ukwọrọikọ emi.—John 14:13, 14
2. Didie ke ndusụk owo ẹyere ikot oro nte ke ẹyom ediwak owo ke utom ukwọrọikọ?
2 Ndinam Ekese: Ke ndausụn̄ ye un̄wam Jehovah, ediwak owo ẹkeme ndinam utom usiakusụn̄. (Ps. 26:2, 3; Phil. 4:6) Ndusụk owo ẹsisịn san̄asan̄a ukeme man ẹnam utom usiakusụn̄ unọ un̄wam ke ọfiọn̄ kiet m̀mê akande oro ke isua. Emi esidi eti usụn̄ ọnọ mmọ nditat utom ukwọrọikọ mmọ. Inemesịt oro mmọ ẹsikopde ke ndinam usiakusụn̄ unọ un̄wam esinam ediwak mmọ ẹyom ndidụk utom usiakusụn̄ ofụri ini.—Utom 20:35.
3. Edieke edide ama ọkpọn̄ utom usiakusụn̄, ọkpọfọn ekere aban̄a nso?
3 Nte Emekeme Nditọn̄ọ Ntak Nsiak Usụn̄?: Edieke edide ama ananam utom usiakusụn̄, ekeme ndidi afo ke eteti mme inem inem ifiọkutom oro ekesinyenede ini oro. Ndi emesikere onyụn̄ ọbọn̄ akam aban̄a ndifiak nnam utom usiakusụn̄? Ekeme ndidi se ikanamde etre utom usiakusụn̄ idụhe aba ndibiọn̄ọ fi. Ekeme ndidi ini edi emi ndifiak n̄kop inem utom emi.—1 John 5:14, 15.
4. Nso akwa ifet iberede inọ kpukpru nnyịn?
4 Utom idọk aka anyan idahaemi ndien ibịghike enye ọmọn̄ okụre. (John 4:35, 36) Kpukpru nnyịn ikpakam ikere iban̄a idaha nnyịn man ise m̀mê imekeme ndikpụhọde ndutịm nnyịn man ikeme nditat utom ukwọrọikọ nnyịn. Mîdịghe edieke ifiọkde ke nnyịn idikemeke nditat utom ukwọrọikọ nnyịn, ndi imekeme ndiyom usụn̄ en̄wen ndinam n̄kọri? (Mark 12:41-44) Nso ifet ke kpukpru mbon oro idaha mmọ ayakde Jehovah ada mmọ anam n̄kpọ, ẹnyene ntem!—Ps. 110:3.