Ata Akpan Utom
1. Ata esịtekọm oro inyenede inọ utom ukwọrọikọ nnyịn edinụk nnyịn inam nso n̄waidem?
1 Ntak emi ẹsisịnde udọn̄ kpukpru ini ẹnọ nnyịn ẹte isịn ini, odudu, ye inyene nnyịn ke utom ukwọrọikọ? Koro idụhe utom ndomokiet oro edide akpan utom akan emi! Nditie n̄kere ikpọ ufọn oro utom emi enyenede ayanam inen̄ede inyene udọn̄ nditiene mbuana ke utom emi owo mîdifiakke inam aba mi.—Utom 20:24.
2. Didie ke utom ukwọrọikọ nnyịn an̄wam ke ndinam akwa enyịn̄ Jehovah asana?
2 Anam Enyịn̄ Jehovah Asana: Utom ukwọrọikọ anam ẹfiọk nte ke Obio Ubọn̄ Jehovah emi Christ Jesus edide andikara ayada itie kpukpru ukara owo onyụn̄ ọkọk kpukpru mfịna ubonowo. (Matt. 6:9, 10) Enye ọnọ Jehovah ubọn̄ nte n̄kukụre owo emi ekemede ndinyan̄a ubonowo nsio ke udọn̄ọ ye n̄kpa. (Isa. 25:8; 33:24) Sia ikerede enyịn̄ idian enye, mbon efen oro ẹkụtde nti ido ye ifịk oro isịnde ẹkeme ndinọ enye ubọn̄. (1 Pet. 2:12) Enem nnyịn didie ntem ndinam ẹfiọk enyịn̄ Jehovah Ọbọn̄ Andikara ke ofụri ererimbot!—Ps. 83:18.
3. Nso edidiọn̄ ke mbon oro ẹsikpan̄de utọn̄ ẹnọ etop Obio Ubọn̄ ẹsinyene?
3 Anyan̄a Uwem: Jehovah ‘iyomke owo ndomokiet atak, edi oyom kpukpru owo ẹkabade esịt.’ (2 Pet. 3:9) Edi didie ke mme owo ẹdifiọk se Jehovah adade nte eti ye idiọk ke ini owo mîdụhe ndikpep mmọ? (Jonah 4:11; Rome 10:13-15) Ke ini mme owo ẹkpan̄de utọn̄ ẹnọ eti mbụk, uwem mmọ ẹsikpụhọde nte mmọ ẹsion̄ode idem ẹkpọn̄ ndiọi edinam. (Mic. 4:1-4) Mmọ ẹnyene inem inem idotenyịn nsinsi uwem n̄ko. Nnyịn ndisịn ifịk n̄kwọrọ ikọ nnyụn̄ n̄kpep mme owo n̄kpọ anyan̄a nnyịn ye mbon oro ẹkopde uyo nnyịn. (1 Tim. 4:16) Udeme oro inyenede ke ata akpan utom emi edi akwa n̄kpọ ukpono!
4. Ntak emi ikpenen̄erede isịn ifịk ke utom edikwọrọ Obio Ubọn̄ ye edinam mbet?
4 Ibịghike akwa ukụt ọmọn̄ edisọp ada idiọk ererimbot emi esịm utịt. Mme andituak ibuot nnọ Jehovah ẹdibọhọ. Ntem, utom oro ẹnamde ata usọp usọp ẹkan nte akanam edide mfịn, utom emi edide akpan n̄kpọ akan, onyụn̄ enyenede ufọn edi utom edikwọrọ ikọ ye edinam mbet. Ẹyak inam enye edi ata akpa n̄kpọ ke uwem nnyịn!—Matt. 6:33.