Se Inịmde Nte Akpa N̄kpọ
1. Didie ke Jesus okowụt ke utom ukwọrọikọ ekedi akpan n̄kpọ ọnọ enye?
1 Jesus ekenịm utom ukwọrọikọ nte akpa n̄kpọ. Enye ama esisịn idem anam utom, asan̄a ke ediwak kilomita aka Palestine man ọkọkwọrọ ikọ ọnọ ata ediwak owo nte ekekeme. Enye okodu mmemmem uwem man enye esịn ediwak ini onyụn̄ owụk ntịn̄enyịn ke utom ukwọrọikọ. (Matt. 8:20) Ke ini otuowo ẹkedomode ndinam enye etie ọkọk mme owo udọn̄ọ, enye ọkọdọhọ ete: “Ana ntan̄a eti mbụk obio ubọn̄ Abasi nnọ mme obio en̄wen n̄ko, koro ẹkesio mi ẹdọn̄ ẹte ndinam emi.”—Luke 4:43.
2. Ntak emi utom ukwọrọikọ ekedide akpan n̄kpọ ntre ọnọ Jesus?
2 Ntak emi utom ukwọrọikọ ekedide akpan n̄kpọ ọnọ Jesus? Akpan n̄kpọ oro ekebehede enye ekedi ndinam enyịn̄ Jehovah asana. (Matt. 6:9) Enye ama ama Ete esie eke heaven, ntre ama ọdọn̄ enye ndinam uduak Esie nnyụn̄ nnam ofụri ewụhọ Esie. (John 14:31) Ke adianade do, enye ama enen̄ede ekere aban̄a mme owo onyụn̄ oyom ndin̄wam mmọ.—Matt. 9:36, 37.
3. Didie ke ikeme ndiwụt ke imowụk ntịn̄enyịn ke utom ukwọrọikọ?
3 Kpebe Jesus: Ndida utom ukwọrọikọ nte akpa n̄kpọ ukem nte Jesus akanamde ekeme ndinen̄ede nsọn̄ sia ererimbot odomo ke kpukpru usụn̄ ndibọ nnyịn ini nnyụn̄ n̄wọn̄ọde ntịn̄enyịn nnyịn. (Matt. 24:37-39; Luke 21:34) Ke ntre, ana idụn̄ọde ifiọk se idide akpan n̄kpọ ikan, inịm ini nditịm idem nnọ nnyụn̄ ntiene mbuana ke utom an̄wautom kpukpru ini. (Phil. 1:10) Ana idomo ndidu mmemmem uwem inyụn̄ itre ndida ererimbot emi nnam n̄kpọ ọyọhọ ọyọhọ.—1 Cor. 7:31.
4. Ntak emi oyomde ika iso inịm n̄kpọ oro edide akpan n̄kpọ, akpa idahaemi?
4 Ke ini owo oro enyenede ọniọn̄ enyenede esisịt ini, enye esinam se idide akpan n̄kpọ kan̄a. Ke uwụtn̄kpọ, ke ini enye okopde ke idiọk oyobio ke edi, enye ayada ini ye odudu esie anam ndutịm man ubon esie ọbọhọ oyobio oro onyụn̄ anam mbọhọidụn̄ esie ẹfiọk se iditịbede. Enye idinamke mme n̄kpọ oro mîdịghe akpan n̄kpọ ke utọ ini oro. Ini oro osụhọde mbemiso Armageddon edi iniọn̄ke aba. (Zeph. 1:14-16; 1 Cor. 7:29) Ana ika iso inọ ntịn̄enyịn ke idem nnyịn ye ke se ikpepde, edide ke esịt esop m̀mê ke an̄wa, man ikeme ndinyan̄a idem nnyịn ye mmọ oro ẹkopde uyo nnyịn. (1 Tim. 4:16) Ih, man ibọhọ, ana ika iso inịm utom ukwọrọikọ nnyịn nte akpa n̄kpọ!