Ndi Amada Ikpaedem Magazine Anam N̄kpọ?

Ke ini mme owo ẹbọde magazine ẹkama, mmọ ẹsiwak ndise edem ndien ekem ẹwọn̄ọde ẹkese edem n̄kan̄ eken. Edem Enyọn̄-Ukpeme eke Nsiondi Ofụri Owo enyene ediwak mbụme ye mme ikọ oro ẹdemerede owo udọn̄, ọkọrọ ye mme nọmba page oro ẹwụtde ebiet emi ẹkemede ndikụt ntọt oro.

Imekeme ndikụt nti ekikere emi ẹban̄ade mme mbụme oro ikpadade itọn̄ọ nneme ke edem magazine. Edieke inamde utom ke efakutom ndien ndien, imekeme nditọn̄ọ nneme ke nsio nsio usụn̄ ebe ke ndibụp nsio nsio mbụme ofụri ọfiọn̄ oro. Edieke enyeneufọk mînyeneke ini, imekeme ndinam nneme nnyịn edi ibio ibio ke ndiwụt enye kiet ke otu mbụme oro ẹdude ke edem inyụn̄ idọhọ ite, “Edieke afo edimade ndifiọk ibọrọ mbụme emi, mmekeme ndikpọn̄ magazine emi nnọ fi ndien imekeme ndineme n̄kpọ efen efen ama enyene ini.” Ndusụk mme asuanetop ẹsima nditọn̄ọ nneme ke ndiwụt enyeneufọk edem magazine nnyụn̄ ndọhọ enye emek mbụme oro enye amade. Ekem mmọ ẹkeme ndiwụt enye ebiet oro ibọrọ odude ẹnyụn̄ ẹkot itie N̄wed Abasi kiet oro mmọ ẹma ẹkememek ndikot. Afo emekeme ndikere mban̄a mme usụn̄ efen oro ekemede ndida edem Enyọn̄-Ukpeme ndemede mme owo udọn̄.