Ndi Ama Edi Asiakusụn̄ Ofụri Ini Ini Kiet Ko?
1. Nso ifetutom ke ediwak owo ẹnyene, edi nso itịbe inọ ndusụk mmọ?
1 Ke ediwak isua emi ẹbede, ediwak tọsịn owo ẹmenyene ifet “ndikpep nnyụn̄ ntan̄a eti mbụk” nte mme asan̄autom uyọhọ ini. (Utom 5:42) Edi, ndusụk mmọ ẹmetre usiakusụn̄ ke nsio nsio ntak. Edieke afo ekedide asiakusụn̄ ofụri ini ini kiet ko, ndi omodụn̄ọde mme idaha fo idahaemi ese m̀mê afo emekeme ndifiak ndi asiakusụn̄?
2. Ntak emi mbon oro ẹkesiakde usụn̄ ke ini edem ẹkpefiakde ẹdụn̄ọde idaha mmọ?
2 Mme Idaha Ẹsikpụhọde: Ekeme ndidi mfịna oro akanamde fi etre utom usiakusụn̄ idụhe aba. Ke uwụtn̄kpọ, edieke edide afo eketre usiakusụn̄ sia mûkekemeke ndinọ hour 90 oro ẹkeyomde kpukpru ọfiọn̄, ndi emekeme ndifiak ntọn̄ọ idahaemi, ke emi ẹma ẹkesụhọde ibat hour ẹsịm 70? Ndi utom fo ọnọ fi ini ndien, mîdịghe ndi mbiomo ubon efere fi idahaemi tọn̄ọ nte ọkọkpọn̄ utom usiakusụn̄? Eyenete an̄wan kiet emi eketrede usiakusụn̄ ke ntak unana nsọn̄idem ama afiak ọtọn̄ọ ke ini enye ekedide isua 89. Sia enye mîkakaha ufọkibọk ke se ibede isua kiet, enye ama ekere ke idem imọ ayayak ifiak inam utom usiakusụn̄!
3. Didie ke mbonubon ẹkeme ndidiana kiet n̄n̄wam owo kiet ke ubon anam utom usiakusụn̄?
3 Yak idọhọ ke afo ukudịghe asiakusụn̄, edi owo ke ubon mbufo ama etre utom usiakusụn̄ man ese aban̄a andibuana ke ubon, utọ nte ete m̀mê eka fo oro ama ọkọsọn̄. (1 Tim. 5:4, 8) Edieke edide ntre, ndi afo m̀mê mbon efen ke ubon ẹmekeme ndinam n̄kpọ man ẹn̄wam enye oro eketrede utom usiakusụn̄? Ndi emekeme ndineme n̄kpọ emi ọtọkiet? (N̄ke 15:22) Ke ini mbonubon ẹdianade kiet ẹnam n̄kpọ man owo kiet ke ubon ekeme ndisiak usụn̄, kpukpru mmọ ẹkeme ndida nte ke mmimọ itiene inam oro.
4. Nso ke akpanam edieke mûkemeke ndifiak ndi asiakusụn̄ idahaemi?
4 Kûyak idem emem fi edieke mme idaha fo mîyakke fi afiak ọtọn̄ọ usiakusụn̄. Afo ndinyene udọn̄ ndisiak usụn̄ enem Jehovah esịt. (2 Cor. 8:12) Da mme usọ oro afo ekenyenede ke ini akasiakde usụn̄ nam n̄kpọ ke utom ukwọrọikọ fo. Bọn̄ akam ban̄a udọn̄ oro afo enyenede ndifiak ndi asiakusụn̄, nyụn̄ ben̄e idem ndikpụhọde idaha fo edieke ifet ebererede. (1 John 5:14) Ndusụk, nte ini akade, Jehovah eyeberede ‘akwa usụn̄ ọnọ fi ndinam utom,’ man oto do afo ekeme ndifiak nnyene idatesịt oro otode utom usiakusụn̄ ofụri ini!—1 Cor. 16:9.