“Ẹyak Un̄wana Mbufo Ayama”
1. Nso ke inyene ifet nditiene nnam?
1 Uyai oro otode un̄wana oro esiyamade ọtọn̄ọde ke usenubọk tutu esịm mbubreyo esinam ẹtoro Jehovah Abasi. Edi, orụk un̄wana efen ke Jesus ọkọdọhọ mbet esie ẹnyene—oro edi, “un̄wana uwem.” (John 8:12) Ndinyene un̄wana eke spirit emi edi akwa ifet emi asan̄ade ye akwa mbiomo. Jesus ama eteme ete: “Ẹyak un̄wana mbufo ayama ke iso owo,” man mbon efen ẹbọ ufọn. (Matt. 5:16) Ọkpọsọn̄ ekịm eke spirit odu mfịn, ntre ana inam mme owo ẹnyene un̄wana emi, ndien oyom inen̄ede inam oro idahaemi! Didie ke nnyịn ikeme ndinam un̄wana nnyịn ayama ukem nte Christ?
2. Didie ke Jesus okowụt ke edinọ mme owo un̄wana eke spirit edi akpan n̄kpọ?
2 Ke Ndikwọrọ Ikọ: Jesus ama ada ini, odudu, ye se enye ekenyenede anam mme owo ẹfiọk un̄wana akpanikọ ke mme ufọk mmọ, mme an̄wan̄wa ebiet, enyọn̄ obot—ebiet ekededi oro enye ekekemede ndikụt mme owo. Enye ama ọfiọk ke ndinọ mme owo ata un̄wana eke spirit enyene nsinsi ufọn. (John 12:46) Man un̄wana emi esịm ediwak owo efen efen, Jesus ama etịm mbet esie idem ndidi “un̄wana ererimbot.” (Matt. 5:14) Mmọ ẹma ẹyak un̄wana mmọ ayama ebe ke ndinam nti n̄kpọ nnọ mbọhọidụn̄ mmọ nnyụn̄ nneme akpanikọ Bible ye mme owo.
3. Didie ke nnyịn ikeme ndinen̄ede n̄wụt esịtekọm nnọ un̄wana akpanikọ?
3 Ikọt Abasi ẹda utom ‘ẹdika iso nsan̄a nte nditọ un̄wana’ ke akpan n̄kpọ, mmọ ẹnyụn̄ ẹkwọrọ ikọ ke ebiet ekededi oro mmọ ẹkemede ndikụt mme owo. (Eph. 5:8) Ndikam ntie ke ebiet oro mme owo ẹkemede ndikụt fi n̄kot Bible m̀mê mme n̄wed Christian eken ke ini nduọkodudu utom m̀mê eke ufọkn̄wed ekeme ndinam enyene ifet ndineme nneme N̄wed Abasi. Ke usụn̄ emi ke ekpri eyenete an̄wan kiet ọkọtọn̄ọ ukpepn̄kpọ Bible onyụn̄ enịm mme n̄wed ye nditọ ubet ukpepn̄kpọ esie 12!
4. Ntak emi ‘ediyak un̄wana nnyịn ayama’ abuanade eti edu uwem?
4 Ke Ndinam Nti Utom: Ndinam un̄wana nnyịn ayama abuana n̄ko edinam nnyịn eke usen ke usen. (Eph. 5:9) Ẹsikụt eti edu uwem nnyịn ke itieutom, ke ufọkn̄wed, ye ke mme an̄wan̄wa ebiet eken, ndien emi esinọ nnyịn ifet ndineme nneme Ikọ Abasi. (1 Pet. 2:12) Ke uwụtn̄kpọ, eti edu uwem eyeneren isua ition ama anam andikpep esie okot ete ye eka esie. Enye ọkọdọhọ ete: “Akananam n̄kwe eyenọwọn̄ emi enen̄erede ọfiọk se ifọnde ye se idiọkde ntre!” Ih, utom ukwọrọikọ nnyịn ye eti edu uwem nnyịn ẹsinam mme owo ẹma “un̄wana uwem” onyụn̄ anam ẹtoro Abasi nnyịn.