Unọ Ikọ Ntiense Efak Oro Enyenede Uforo
1. Nso idi usụn̄ kiet oro ikemede ndikpebe Jesus?
1 Ke ini utom ukwọrọikọ Jesus ke isọn̄, enye ikesimen̄eke nditịn̄ ikọ ye mbon oro enye okosobode ke usụn̄ ye ke mme itie oro ẹkekemede ndikụt ediwak owo. (Luke 9:57-61; John 4:7) Enye okoyom ndibuana akpan etop esie ye adan̄a ediwak owo nte enye ekekeme. Mfịn, unọ ikọ ntiense efak edi ata eti usụn̄ ndin̄wam mme owo ẹnyene ọniọn̄ Abasi. (N̄ke 1:20) Iyenen̄ede ikụt unen edieke inamde usio-ukot ndisobo ye mme owo nnyụn̄ nda mbufiọk nnam n̄kpọ.
2. Nso usio-ukot ke oyom ẹnam ke ini ẹnọde ikọ ntiense efak?
2 Nam Usio-Ukot: Esinen̄ede ọfọn ndisan̄a mbịne mme owo utu ke ndida m̀mê nditie itie kiet mbet owo oro asan̄ade ebe asan̄a ebịne fi. Tuak inua imam, se owo iso, nyụn̄ tie emem emem, ye ufan ufan. Edieke afo anamde utom ye mme asuanetop efen, ọkpọfọn asan̄a ikpọn̄ ebịne owo. Oyom anam usio-ukot n̄ko man anam n̄kpọ aban̄a udọn̄ oro okụtde. Edieke odotde, ke utịt nneme fo, dọhọ owo oro asian fi nte edikemede ndifiak nsobo ye enye. Ndusụk mme asuanetop ẹsinam unọ ikọ ntiense efak kpukpru ini ke akpan ebiet kiet, ndien emi esinam mmọ ẹkeme ndinyene nneme ndien ndien ye mbon oro mmọ ẹma ẹkenyenyene nneme, ẹnyụn̄ ẹka iso ndinam n̄kpọ mban̄a udọn̄ oro mmọ ẹnyenede.
3. Didie ke ikpada mbufiọk inam n̄kpọ ke ini inọde ikọ ntiense efak?
3 Da Mbufiọk Nam N̄kpọ: Da mbufiọk biere ebiet emi afo akpadade ke efak ye owo emi afo akpakade ebịne. Iyomke inọ kpukpru owo oro ẹsan̄ade ẹbe ikọ ntiense. Kama enyịn se nte n̄kpọ akade iso. Ke uwụtn̄kpọ, edieke owo etiede itọk itọk, ọkpọfọn ayak enye ebe. Nyene mbufiọk ke ini ọnọde ikọ ntiense ke iso itie mbubehe mbak udunam enyene-itie oro ọtọn̄ọ ndiyat esịt. Esifọn ndinọ mme owo ikọ ntiense ke ini mmọ ẹwọrọde ke itie mbubehe akan ke ini mmọ ẹyomde ndidụk. Kûka ubịne mme owo ke usụn̄ oro edinamde idem enyek mmọ m̀mê ndịk anam mmọ. Nyene mbufiọk n̄ko ke ini ọnọde n̄wed. Edieke mme owo mînyeneke udọn̄, afo emekeme ndinọ mmọ tract utu ke ndinọ mmọ mme magazine.
4. Ntak emi unọ ikọ ntiense efak edide usụn̄ unọ ikọ ntiense emi enyenede ufọn onyụn̄ enemde?
4 Unọ ikọ ntiense efak esin̄wam nnyịn isuan ediwak n̄kpasịp akpanikọ ke esisịt ini. (Eccl. 11:6) Ndusụk mbon oro isobode ẹkeme ndidi mbon oro nnyịn mîsikwe ke ufọk ke ini ikwọrọde ikọ ke ufọk ke ufọk. Ntak mûnamke ndutịm man abuana ke unọ ikọ ntiense efak, kpa ikpehe utom an̄wautom emi enemde onyụn̄ enyenede uforo?