“Ẹtua Owo Mbọm”
1. Nso ke mme owo ẹnen̄ede ẹyom mfịn?
1 Akananam idụhe ini ke mbụk emi ata ediwak owo ẹnen̄erede ẹyom un̄wam esịtmbọm nte ẹyomde mfịn. Mme idaha ererimbot oro ẹkade-ka iso ndidiọk mi ẹnam unana inemesịt, mfụhọ, ye unana idotenyịn ẹyọhọ kpukpru ebiet. Ediwak miliọn owo ẹyom un̄wam, ndien nnyịn mme Christian imekeme ndiwụt ke imenen̄ede ikere iban̄a mme mbọhọidụn̄ nnyịn. (Matt. 22:39; Gal. 6:10) Didie ke ikeme ndiwụt utọ edikere mban̄a oro?
2. Nso idi mfọnn̄kan usụn̄ oro ikemede ndiwụt mbọm?
2 Utom Mbọm: Abasi kpọt ekeme ndinọ ata ndọn̄esịt oro ebịghide. (2 Cor. 1:3, 4) Jehovah esịn udọn̄ ọnọ nnyịn ete ikpebe imọ ke ‘nditua mme owo mbọm’ onyụn̄ owụk nnyịn ete ida eti mbụk Obio Ubọn̄ isọk mme mbọhọidụn̄ nnyịn. (1 Pet. 3:8) Ndibuana ifịk ifịk ke utom emi edi mfọnn̄kan usụn̄ ndida ndọn̄esịt nsọk “mbon oro esịt obụn̄ọde,” koro Obio Ubọn̄ Abasi edi n̄kukụre ata idotenyịn ọnọ ubonowo oro okụtde ndutụhọ. (Isa. 61:1) Ke ntak mbọm oro Jehovah enyenede ọnọ ikọt esie, ibịghike enye oyosio idiọkido efep onyụn̄ owụk edinen obufa ererimbot.—2 Pet. 3:13.
3. Didie ke ikpese mme owo nte Jesus ekesede?
3 Se Mme Owo nte Jesus Ekesede: Idem ke ini Jesus ọkọkwọrọde ikọ ọnọ otuowo, enye ikesehe mmọ nte mme ikpîkpu owo, edi ekese mmọ nte mbon oro ẹnyenede udọn̄ ke n̄kpọ eke spirit. Mmọ ẹketie nte erọn̄ eke mînyeneke andikpeme eke adade mmọ usụn̄. Se Jesus okokụtde ama otụk enye ndien emi ama anam enye ada ime ekpep mmọ n̄kpọ. (Mark 6:34) Edieke nnyịn isede mme owo nte Jesus ekesede, emi oyonụk nnyịn ndiwụt mmọ ata mbọm. Ẹyenyụn̄ ẹkụt emi ke nte itịn̄de ikọ ye ke nte ikamade iso. Ukwọrọikọ edidi ebeiso n̄kpọ ọnọ nnyịn, ndien iyanam mme ikọ nnyịn ekekem ye se idide mfịna owo kiet kiet.—1 Cor. 9:19-23.
4. Ntak emi ikpemende mbọm isịne?
4 Akwa otuowo oro ẹtode kpukpru idụt ke ẹnyịme etop Obio Ubọn̄ ke ẹnyụn̄ ẹnam n̄kpọ ẹban̄a udọn̄ oro ẹnyenede ke idem mmọ. Nte ikade iso ndimen mbọm nsịne, nnyịn iyokpono inyụn̄ inam esịt enem Jehovah, kpa Abasi mbọm.—Col. 3:12.