Ndi Nditọ Fo Ẹben̄e Idem?
1. Ntak emi oyomde nditọ ufọkn̄wed ẹdu ke mben̄eidem?
1 Obufa isua ufọkn̄wed ọmọn̄ ọtọtọn̄ọ. Nte eyịghe mîdụhe, nditọ fo ẹmọn̄ ẹsobo mbufa n̄kpọ-ata ye mme mfịghe. Mmọ n̄ko ẹyenyene mbufa ifet ‘nditie ntiense nnọ akpanikọ.’ (John 18:37) Ndi mmọ ẹben̄e idem?
2. Man nditọ fo ẹdu ke mben̄eidem, nso ke mmọ ẹnyene ndifiọk?
2 Ndi nditọ fo ẹtịm ẹfiọk nte owo ekemede nditiene mbuana ke mme usọrọ ye mme usen nduọkodudu eke idụt ye ntak emi ọdiọkde nditiene mbuana ke mme usọrọ emi? Ndi mmọ ẹben̄e idem ẹnọ mme mfịghe uka ufọkn̄wed ntaifiọk, uwọrọ an̄wa ye owo isio uduot, ye un̄wọn̄ n̄kpọsọn̄ mmịn m̀mê uda n̄kpọsọn̄ ibọk oro mmọ ẹdisobode? Ndi mmọ n̄kukụre ẹdidọhọ ke edinam oro mîkemke ye N̄wed Abasi atuaha ye ido ukpono mmimọ, mîdịghe ndi mmọ ẹfiọk nte ẹkpenamde se mmọ ẹnịmde ke akpanikọ an̄wan̄a owo?—1 Pet. 3:15.
3. Didie ke mme ete ye eka ẹkpeda mbubreyo Utuakibuot Ubon ẹtịm nditọ mmọ idem?
3 Da Mbubreyo Utuakibuot Ubon Nam N̄kpọ: Edi akpanikọ nte ke mbufo ẹdisụk ẹneneme mme n̄kpọ, edieke oyomde ẹnam ntre, ke ofụri isua ufọkn̄wed oro. Ndisịn san̄asan̄a ukeme nneme mme mfịna ufọkn̄wed mbemiso n̄wed ọtọn̄ọde ayanam nditọ mbufo ẹnyene uko. Ntak mûdaha mbubreyo Utuakibuot Ubon kiet m̀mê akande oro unam emi? Afo emekeme ndidọhọ nditọ fo ẹtịn̄ se inen̄erede itịmede mmọ esịt nte mmọ ẹyomde ndifiak ntọn̄ọ n̄wed. Emekeme ndifiak nneme mme mfịna oro ama ekeneneme ke mme isua oro ẹkebede ke emi nditọ fo ẹma ẹkekponi ẹnyụn̄ ẹtịm ẹfiọk n̄kpọ. (Ps. 119:95) Afo emekeme ndisịn nnamn̄wụt emi afo edinamde nte idi andikpep, ọnọitem, m̀mê nsan̄a ufọkn̄wed. Kpep nditọ fo nte mmọ ẹkemede ndida Bible mbọrọ mbụme ye nte ẹkemede ndida n̄wed Reasoning ye n̄wed N̄kparawa Owo Ẹbụp nnam n̄kpọ. N̄wan kiet ama ada mme ini nnamn̄wụt emi etịm nditọ esie idem ndisisian mbufa mme andikpep mmọ ke ntọn̄ọ kpukpru isua ufọkn̄wed nte ke mmimọ idi Mme Ntiense Jehovah.—Se Enyọn̄-Ukpeme eke December 15, 2010, page 3-5.
4. Nso ke mme ete ye eka oro ẹnyenede ọniọn̄ ẹdinam?
4 Mme n̄kpọ-ata emi mme uyen Christian ẹnyenede ndisobo ke mme akpatre usen emi ẹtetịm ‘ẹsọn̄ ndiyọ.’ (2 Tim. 3:1) Mme ete ye eka oro ẹnyenede ọniọn̄ ẹyedomo ndibabak nnam n̄kpọ mban̄a emi. (N̄ke 22:3) Mbemiso obufa isua ufọkn̄wed ọtọn̄ọde, ẹnam kpukpru se ẹkekeme man ẹn̄wam nditọ mbufo ẹdu ke mben̄eidem.