Jehovah ke Ọnọ Nnyịn Ukpep man Inam Utom Emi
1. Ke ini Jehovah ọnọde mme owo utom, nso ke enye esinam n̄ko?
1 Ke ini Jehovah ọnọde mme owo utom, enye esinọ mmọ n̄ko un̄wam oro mmọ ẹyomde man ẹnam utom oro. Ke uwụtn̄kpọ, ke ini Jehovah ọkọdọhọde Noah ọkọn̄ ubom, utom emi akanam enye mînamke, Enye ama asian Noah n̄ko nte enye edinamde. (Gen. 6:14-16) Ke ini Jehovah ọkọdọn̄de Moses, kpa osụhọde idem ekpemerọn̄, ete aka ebịne mbiowo Israel ye Pharaoh, Enye ama ọn̄wọn̄ọ ọnọ enye ete: “Ami nyodu ye inua fo nyonyụn̄ nteme fi se afo editịn̄de.” (Ex. 4:12) Kpasụk ntre ke edi ye utom edikwọrọ eti mbụk oro Jehovah ọnọde nnyịn; enye eteme nnyịn nte idinamde enye. Enye ada Ufọkn̄wed Utom Ukara Abasi ye Esoputom ọnọ nnyịn ukpep man inam utom emi. Didie ke nnyịn ikeme ndibọ ufọn nto ukpep emi?
2. Didie ke ikeme ndibọ ufọn nto Ufọkn̄wed Utom Ukara Abasi?
2 Ufọkn̄wed Utom Ukara Abasi: Kot nyụn̄ kpep se ẹdinemede ke ufọkn̄wed emi kpukpru urua mbemiso edide mbono esop. Ekem nte afo okụtde nte nditọ ufọkn̄wed ẹnemede mme n̄kpọ emi ke utịn̄ikọ mmọ, emi ayan̄wam fi ofori usọ unọ ukpep fo. (N̄ke 27:17) Kama n̄wed Ufọkn̄wed Utom fo di mbono esop nyụn̄ da enye nam n̄kpọ. Ke ini esenyịn ufọkn̄wed enemede n̄kpọ ke n̄wed emi ke eyen ufọkn̄wed kiet kiet okụrede utịn̄ikọ esie, dụri udịm ke mme akpan n̄kpọ oro afo oyomde ndida nsịn ke edinam, nyụn̄ wet mme akpan n̄kpọ ke mben n̄wed emi. Nte ededi, mfọnn̄kan usụn̄ oro ikemede ndibọ ufọn nto ufọkn̄wed emi edi nditiene mbuana. Ndi emesịn enyịn̄ ke ufọkn̄wed emi? Ke ini ẹnọde fi n̄kpọ anam, nen̄ede tịm idem nyụn̄ da item oro ẹnọde fi sịn ke edinam. Da se ekpepde sịn ke edinam ke ini odude ke an̄wautom.
3. Nso idin̄wam nnyịn ibọ ufọn ito Esoputom?
3 Esoputom: Nnyịn iyọsọp iti mme ekikere oro ẹsinọde ke Esoputom edieke ibemde iso ikot se ẹdinemede inyụn̄ itịm idem man inọ ibọrọ. Edieke inọde mbio mbio ibọrọ, emi ayanam ediwak owo ẹnyene ifet nditiene nnọ ibọrọ. Nen̄ede nọ ntịn̄enyịn ke mme nnamn̄wụt, nyụn̄ da ekikere ekededi oro ẹnọde emi afo ekerede ke ayanam ukwọrọikọ fo etetịm enyene uforo sịn ke edinam. Tịm mme Utom Obio Ubọn̄ Nnyịn oro ẹdọn̄ọde mme ibuotikọ oro ẹban̄ade utom ukwọrọikọ nịm, man akpada mmọ anam n̄kpọ ke ini iso.
4. Ntak emi ikpadade ukpep oro Jehovah ọnọde nnyịn inam n̄kpọ nte ọfọnde?
4 Ukem nte utom oro ẹkenọde Noah ye Moses, utom oro ẹnọde nnyịn ndikwọrọ eti mbụk ke ofụri isọn̄ imemke. (Matt. 24:14) Edi, imekeme ndikụt unen edieke iberide edem ke Jehovah, kpa Akwa Anditeme nnyịn, inyụn̄ idade ukpep oro enye ọnọde nnyịn inam n̄kpọ nte ọfọnde.—Isa. 30:20.