Ndi ke Ekpep Ofụri Se Ekekeme Oto Jehovah?

1. Didie ke Jehovah ese edinọ ukpep?

¹ Jehovah, kpa “Akwa Anditeme” nnyịn, oyom nnyịn ibọ ukpep. (Isa. 30:20) Enye ọkọtọn̄ọ ndinọ ukpep ke enye ama okobot akpan esie. (John 8:28) Ke Adam ama ọkọsọn̄ ibuot, Jehovah iketreke ndinọ ukpep, edi enye ama ada ima ọnọ mme anana-mfọnmma owo ndausụn̄.—Isa. 48:17, 18; 2 Tim. 3:14, 15.

2. Ewe ndutịm unọ ukpep aka iso idahaemi?

² Mfịn, Jehovah ke ada usụn̄ ke n̄kponn̄kan ndutịm unọ ukpep ke mbụk ubonowo. Nte Isaiah ama eketetịn̄, ediwak miliọn owo ke ekondo ke ẹbụn̄ọ ẹka ndamban̄a “obot ufọk Jehovah.” (Isa. 2:2) Ntak ẹbụn̄ọde ẹka do? Man ẹkpep mmọ usụn̄ Abasi, ih, man Jehovah ekpep mmọ n̄kpọ! (Isa. 2:3) Ke isua utom 2010, Mme Ntiense Jehovah ẹma ẹbiat se ikande biliọn hour kiet ye ubak ke ndinọ ikọ ntiense nnyụn̄ n̄kpep mme owo akpanikọ Bible. Adianade do, ẹsinọ ukpep eke spirit ke se iwakde ibe esop 105,000 ke ofụri isọn̄ kpukpru urua, ndien ofụn emi anamde akpanikọ onyụn̄ enyenede ọniọn̄ osion̄o mme n̄wed Christian oro ẹdade ẹnọ ukpep ke se iwakde ibe usem 500.

3. Didie ke afo ọbọ ufọn oto ukpep oro Jehovah ọnọde?

³ Bọ Ufọn Ọyọhọ Ọyọhọ: Imenen̄ede ibọ ufọn ito ukpep oro Abasi ọnọde! Imedifiọk ke Abasi enyene enyịn̄ ye nte ke enye ekere aban̄a nnyịn. (Ps. 83:18; 1 Pet. 5:6, 7) Imọfiọk mme ibọrọ ndusụk akpan mbụme ke uwem: Ntak emi mme owo ẹbọde ufen ẹnyụn̄ ẹkpade? Didie ke n̄keme ndinyene ata inemesịt? Nso idi uduak uwem? Jehovah ọnọ nnyịn ndausụn̄ ke n̄kan̄ ido uwem, emi an̄wamde nnyịn ‘ikụt unen ke usụn̄ nnyịn.’—Josh. 1:8.

4. Nso idi ndusụk ifet ubọ ukpep oro mme asan̄autom Abasi ẹnyenede, ndien ntak emi ikpekpepde ofụri se ikekeme ito Jehovah?

⁴ Ke adianade do, Jehovah ọmọnọ ediwak mme asan̄autom esie san̄asan̄a ukpep man an̄wam mmọ ẹtat utom oro mmọ ẹnamde ẹnọ enye. Ẹsiak mme ifet oro ẹbererede ẹnọ ndusụk owo ndibọ ukpep ke page 4-6. Idem ọkpọkọm mme idaha nnyịn iyakke nnyịn ibọ ukpep oro ẹsiakde do, ndi imenen̄ede ibọ ukpep oro Abasi ọnọde, emi idaha nnyịn ayakde ibọ? Ndi ke isịn udọn̄ inọ mme uyen, emi mme andikpep ye mbon en̄wen ẹsisịnde udọn̄ ẹnọ ẹte ẹka ufọkn̄wed ntaifiọk, ite ẹnịm mme utịtmbuba eke spirit ẹnyụn̄ ẹyom mfọnn̄kan ukpep, kpa ukpep oro Abasi ọnọde? Ndikpep ofụri se ikekeme nto Jehovah ayanam inyene inem inem uwem idahaemi ye nsinsi uwem ke ini iso.—Ps. 119:105; John 17:3.

Ndusụk Ifet Ubọ Ukpep Oro Ẹdude ke Esop Jehovah

Ufọkn̄wed Oro Ẹkpepde nte Ẹkotde Ẹnyụn̄ Ẹwetde N̄kpọ

• Uduak: Man ẹkpep mme owo nte ẹkpekotde ẹnyụn̄ ẹwetde n̄kpọ man mmọ ẹkeme ndikpep Bible ke idemmọ nnyụn̄ n̄kpep mbon en̄wen akpanikọ.

• Udomo Ini: Adan̄a nte ẹyomde.

• Ebiet Ẹnịmde: Ufọkmbono Obio Ubọn̄ n̄kann̄kụk.

• Mbon Emi Ẹkemede Ndidụk: Kpukpru mme asuanetop ye mbon oro ẹnyenede udọn̄.

• Nte Ẹkpesịnde Enyịn̄: Mbiowo esop ẹsidiomi ufọkn̄wed oro ẹkpepde nte ẹkotde ẹnyụn̄ ẹwetde n̄kpọ nte ekemde ye udọn̄ n̄kann̄kụk, mmọ ẹsinyụn̄ ẹsịn udọn̄ ẹnọ kpukpru mbon oro ẹkemede ndibọ ufọn ndidụk.

Ufọkn̄wed Utom Ukara Abasi

• Uduak: Man ẹnọ mme asuanetop ukpep ndidi mme ọkwọrọikọ ye mme andikpep eti mbụk oro ẹkụtde unen.

• Udomo Ini: Inyeneke utịt.

• Ebiet Ẹnịmde: Ufọkmbono Obio Ubọn̄ n̄kann̄kụk.

• Mbon Emi Ẹkemede Ndisịn Enyịn̄: Kpukpru mme asuanetop. Mbon en̄wen oro ẹsibuanade ke mme edinam esop ifịk ifịk, emi ẹnyịmede mme ukpepn̄kpọ Bible, emi uwem mmọ onyụn̄ odude ke n̄kemuyo ye mme edumbet Christian, ẹkeme ndisịn enyịn̄ n̄ko.

• Nte Ẹkpesịnde Enyịn̄: Kụt esenyịn Ufọkn̄wed Utom Ukara Abasi.

Ufọkn̄wed Oro Ẹkpepde Usem Esenidụt

• Uduak: Man ẹkpep mme asuanetop nte ẹkpekwọrọde eti mbụk ke usem en̄wen.

• Udomo Ini: Ọfiọn̄ inan̄ m̀mê ition. Ẹsiwak ndinịm ufọkn̄wed emi ke usenubọk Saturday ke hour kiet m̀mê iba.

• Ebiet Ẹnịmde: Ẹsiwak ndinịm ke Ufọkmbono Obio Ubọn̄ emi ekperede.

• Mbon Emi Ẹkemede Ndisịn Enyịn̄: Mme asuanetop oro ẹdude ke eti idaha, emi ẹkpemade ndikwọrọ ikọ ke usem esenidụt.

• Nte Ẹkpesịnde Enyịn̄: N̄kọk itieutom esidiomi ufọkn̄wed emi nte ekemde ye udọn̄ n̄kann̄kụk.

Ndutịm Edibọp Ufọkmbono Obio Ubọn̄

• Uduak: Man ẹbọp ẹnyụn̄ ẹfiak ẹdiọn̄ mme Ufọkmbono Obio Ubọn̄. Enye idịghe ufọkn̄wed, edi ẹda ndutịm emi ẹkpep mme anamutom unyịmesịt nsio nsio usọ man mmọ ẹkeme ndin̄wam ke utom ubọpn̄kpọ.

• Udomo Ini: Nte ekemde ye idaha anamutom unyịmesịt.

• Ebiet Ẹnịmde: Ebiet ekededi oro ẹnọde Otu Ubọp Ufọkmbono Obio Ubọn̄ ẹkenam utom. Ẹkeme ndidọhọ ndusụk mme anamutom unyịmesịt ẹn̄wam ke utom unọ un̄wam ke nsannsan ebiet emi afanikọn̄ etịbede.

• Se Inamde Owo Odot: Ana nditọete iren ye iban ẹdi mbon oro ẹma ẹkena baptism emi otu mbiowo ẹnọde unyịme, edide mmọ ẹnyene usọ m̀mê inyeneke.

• Nte Ẹkpesịnde Enyịn̄: Wet n̄kpọ yọhọ babru Application for Kingdom Hall Construction Volunteer Program (A-25) emi mbiowo esop ẹsinọde.

Ufọkn̄wed Utom Usiakusụn̄

• Uduak: Man ẹn̄wam mme asiakusụn̄ ‘ẹnam utom mmọ ọyọhọ ọyọhọ ẹma.’—2 Tim. 4:5.

• Udomo Ini: Urua iba.

• Ebiet Ẹnịmde: N̄kọk itieutom esibiere; ẹsiwak ndinịm ke Ufọkmbono Obio Ubọn̄ emi ekperede.

• Se Inamde Owo Odot: Mbon oro ẹdide mme asiakusụn̄ ofụri ini ke isua kiet ke nsụhọde n̄kaha.

• Nte Ẹkpesịnde Enyịn̄: Esenyịn circuit esisịn enyịn̄ mme asiakusụn̄ oro ẹdotde onyụn̄ asian mmọ.

Ufọkn̄wed Mme Andidụk Bethel

• Uduak: Ẹtịm ufọkn̄wed emi man ẹn̄wam mbufa mbon oro ẹdide Bethel ẹkụt unen ke utom Bethel.

• Udomo Ini: Hour kiet kpukpru urua ke ọfiọn̄ inan̄.

• Ebiet Ẹnịmde: Ke Bethel.

• Se Inamde Owo Odot: Ana mme andidụk ẹdi mbonubon Bethel m̀mê mbon oro ẹnamde utom Bethel ke ibio ini (ke isua kiet m̀mê akande oro).

• Nte Ẹkpesịnde Enyịn̄: Mbonubon Bethel emi ẹdotde ke ẹsisịn enyịn̄.

Ufọkn̄wed Utom Obio Ubọn̄

• Uduak: Man ẹkpep mbiowo ye mme asan̄autom unamutom ndise mban̄a ifetutom mmọ ye mbiomo esop. (Utom 20:28) Otu Ukara esibiere ini emi ẹdinịmde ufọkn̄wed emi ke n̄kpọ nte isua ifan̄ ẹbede.

• Udomo Ini: Ke mme isua ndondo emi, mbiowo ẹdụk ufọkn̄wed emi usen kiet ye ubak ke ini mme asan̄autom unamutom ẹdụkde usen kiet.

• Ebiet Ẹnịmde: Ẹsiwak ndinịm ke Ufọkmbono Obio Ubọn̄ m̀mê ke Ufọkmbono oro ekperede.

• Se Inamde Owo Odot: Ana mme andidụk ẹdi mbiowo m̀mê mme asan̄autom unamutom.

• Nte Ẹkpesịnde Enyịn̄: Esenyịn circuit esikot mbiowo ye mme asan̄autom unamutom oro ẹdotde ẹdidụk.

Ufọkn̄wed Mbiowo Esopa

• Uduak: Man ẹn̄wam mbiowo ẹse ẹban̄a mbiomo mmọ ke esop.

• Udomo Ini: Usen ition.

• Ebiet Ẹnịmde: N̄kọk itieutom esibiere; ẹsiwak ndinịm ke Ufọkmbono Obio Ubọn̄ m̀mê ke Ufọkmbono oro ekperede.

• Se Inamde Owo Odot: Ana mme andidụk ẹdi mbiowo.

• Nte Ẹkpesịnde Enyịn̄: N̄kọk itieutom esikot mbiowo oro ẹdotde ẹdidụk.

Ufọkn̄wed Mme Esenyịn Oro Ẹsan̄ade-San̄a ye Iban Mmọb

• Uduak: Man ẹn̄wam mme esenyịn circuit ye district ẹnen̄ede ẹkụt unen ke ini ẹsan̄ade ẹse mme esop ẹnyụn̄ ‘ẹnam utom ọkpọsọn̄ ke utịn̄ikọ ye ukpepn̄kpọ,’ ẹnyụn̄ ẹkpeme otuerọn̄ Abasi emi ẹnọde mmọ ẹse ẹban̄a.—1 Tim. 5:17; 1 Pet. 5:2, 3.

• Udomo Ini: Ọfiọn̄ iba.

• Ebiet Ẹnịmde: N̄kọk itieutom esibiere.

• Se Inamde Owo Odot: Ana mme andidụk ẹdi mme esenyịn circuit m̀mê district.

• Nte Ẹkpesịnde Enyịn̄: N̄kọk itieutom esikot mme esenyịn oro ẹsan̄ade-san̄a, emi ẹdotde, ye iban mmọ ẹdidụk.

Ufọkn̄wed Ukpep Bible Eke Nditọete Iren Emi Mîdọhọ Ndọc

• Uduak: Man ẹtịm mbiowo ye mme asan̄autom unamutom oro mîdọhọ ndọ idem ndise mban̄a ifetutom efen efen. Ẹyenọ ediwak mme andikụre ufọkn̄wed emi ẹka ebiet emi ẹyomde un̄wam ke idụt mmọ. Ẹkeme ndinọ ibat ibat mmọ ẹka idụt efen edieke mmọ ẹnyịmede.

• Udomo Ini: Ọfiọn̄ iba.

• Ebiet Ẹnịmde: N̄kọk itieutom esibiere; ẹsiwak ndinịm ke Ufọkmbono, ke Ufọkmbono Obio Ubọn̄, m̀mê ke n̄kọk itieutom.

• Se Inamde Owo Odot: Nditọete iren oro mîdọhọ ndọ, emi ẹdude ke ufọt isua 23 esịm 62, emi ẹkopde nsọn̄idem ẹkpenyụn̄ ẹmade ndinam n̄kpọ nnọ nditọete nnyụn̄ nse mban̄a mme ufọn n̄kpọ Obio Ubọn̄ ke ebiet ekededi oro ẹyomde un̄wam. (Mark 10:29, 30) Ana mmọ ẹnam utom nte mbiowo m̀mê mme asan̄autom unamutom ke isua iba ye unana editre.

• Nte Ẹkpesịnde Enyịn̄: Edieke ufọkn̄wed emi odude ke efakutom oro n̄kọk itieutom mbufo esede aban̄a, ẹsinịm mbono mbon oro ẹkpemade ndisịn enyịn̄ ke ini mbono circuit. Ẹsinọ ntọt efen efen ke ini mbono emi.

Ufọkn̄wed Ukpep Bible Eke Mme Christian Oro Ẹdọde Ndọd

• Uduak: Man ẹnọ mme ọdọ ndọ san̄asan̄a ukpep man Jehovah ye esop esie ẹkeme ndinen̄ede nda mmọ nnam n̄kpọ. Ẹyenọ ediwak mme andikụre ufọkn̄wed emi ẹka ebiet emi ẹyomde un̄wam ke idụt mmọ. Ẹkeme ndinọ ibat ibat mmọ ẹka idụt efen edieke mmọ ẹnyịmede.

• Udomo Ini: Ọfiọn̄ iba.

• Ebiet Ẹnịmde: Itie Unọ Ukpep Enyọn̄-Ukpeme ke Patterson ke New York, U.S.A, edi akpa itie oro ẹnịmde ufọkn̄wed emi. Nte ini akade, n̄kọk itieutom eyebiere ebiet emi ẹdinịmde ufọkn̄wed emi; ẹdinịm enye ke Ufọkmbono m̀mê ke Ufọkmbono Obio Ubọn̄.

• Se Inamde Owo Odot: Mme ọdọ ndọ emi ẹdude ke ufọt isua 25 esịm 50, emi ẹkopde nsọn̄idem ẹnyụn̄ ẹkemede ndika ebiet ekededi oro ẹyomde un̄wam, emi ẹnyụn̄ ẹnyenede edu Isaiah emi: “Se mi mi! Dọn̄ mi utom.” (Isa. 6:8) Ke adianade do, ana mmọ ẹdọ ndọ ke nsụhọde n̄kaha isua iba ẹnyụn̄ ẹnam utom uyọhọ ini ke nsụhọde n̄kaha isua iba ye unana editre.

• Nte Ẹkpesịnde Enyịn̄: Edieke ufọkn̄wed emi odude ke efakutom oro n̄kọk itieutom mbufo esede aban̄a, ẹsinịm mbono mbon oro ẹkpemade ndisịn enyịn̄ ke ini usen akpan mbono. Ẹsinọ ntọt efen efen ke ini mbono emi.

Ufọkn̄wed Enyọn̄-Ukpeme Ukpep Bible Eke Gilead

• Uduak: Man ẹnọ mme asiakusụn̄ ye mbon eken oro ẹdude ke utom uyọhọ ini ukpep utom isụn̄utom.

• Udomo Ini: Ọfiọn̄ ition.

• Ebiet Ẹnịmde: Itie Unọ Ukpep Enyọn̄-Ukpeme ke Patterson ke New York, U.S.A.

• Se Inamde Owo Odot: Mme ọdọ ndọ oro ẹma ẹkena baptism ke isua ita, emi ẹnyụn̄ ẹdude ke ufọt isua 21 esịm 38 ke ini ẹsịnde akpa n̄wed eben̄e mmọ. Ana mmọ ẹfiọk nditịn̄ Ikọmbakara, ẹdọ ndọ ke nsụhọde n̄kaha isua iba, ẹnyụn̄ ẹnam utom uyọhọ ini ke nsụhọde n̄kaha isua iba ye unana editre. Mbon oro ẹsịnde n̄wed eben̄e ẹkpenyene ndikop nsọn̄idem. Mme asiakusụn̄ oro ẹnamde utom ke esenidụt (esịnede mbon oro ẹdade nte mme isụn̄utom); mme esenyịn oro ẹsan̄ade-san̄a; mbonubon Bethel; mbon oro ẹma ẹkebọ ukpep ke Ufọkn̄wed Unọ Mme Asan̄autom Ukpep, Ufọkn̄wed Ukpep Bible Eke Nditọete Iren Emi Mîdọhọ Ndọ, ye Ufọkn̄wed Ukpep Bible Eke Mme Christian Oro Ẹdọde Ndọ ẹkeme ndisịn n̄wed eben̄e edieke mmọ ẹsịmde mme n̄kpọ oro ẹyomde.

• Nte Ẹkpesịnde Enyịn̄: Ke ibat ibat n̄kọk itieutom, ẹsinịm mbono mbon oro ẹkpemade ndika ufọkn̄wed emi ke ini mbono district. Ẹsinọ ntọt efen efen ke ini mbono emi. Edieke owo mînịmke mbono emi ke mme ini mbono district ke idụt mbufo ndien afo akpama ndisịn enyịn̄ ke ufọkn̄wed emi, emekeme ndiwet n̄kọk itieutom mbufo man ẹnọ fi ntọt efen efen.

Ufọkn̄wed Mme Andibuana ke Kọmiti N̄kọk Itieutom ye Iban Mmọ

• Uduak: Man ẹn̄wam mme andibuana ke Kọmiti N̄kọk Itieutom ẹtịm ẹse ẹban̄a mme ufọkidụn̄ Bethel, ẹnọ ntịn̄enyịn ke mme n̄kpọ oro ẹbehede esop, ẹse ẹban̄a mme circuit ye mme district ke efakutom mmọ, ẹse ẹban̄a utom edikabade n̄wed, edimịn̄ n̄wed, ye edinọ n̄wed ẹsọk mme esop, ọkọrọ ye edise mban̄a mme nsio nsio itieutom eken.—Luke 12:48b.

• Udomo Ini: Ọfiọn̄ iba.

• Ebiet Ẹnịmde: Itie Unọ Ukpep Enyọn̄-Ukpeme ke Patterson ke New York, U.S.A.

• Se Inamde Owo Odot: Mme andibuana ke Kọmiti N̄kọk Itieutom m̀mê ke Kọmiti Idụt m̀mê mbon oro ẹdọhọde ẹse ẹban̄a n̄kọk itieutom.

• Nte Ẹkpesịnde Enyịn̄: Otu Ukara esikot nditọete oro ẹdotde ye iban mmọ ẹdidụk.

[Ikọ idakisọn̄]