Ata Akpan Edu Emi Anade Eti Andikpep Enyene
1. Nso idi ata akpan edu emi anade eti andikpep enyene?
1 Nso inam owo edi eti andikpep Ikọ Abasi? Ifiọkn̄wed ererimbot? Nte owo ebịghide ke akpanikọ? Ndammana ukeme? Ke nditịm ntịn̄, edi kpa edu oro anamde ẹnịm Ibet ẹma, oro ẹdade ẹdiọn̄ọ mme mbet Jesus, enye onyụn̄ edi ata akpan edu emi ẹmade ẹkan ke otu mme n̄wọrọnda edu Jehovah. (John 13:35; Gal. 5:14; 1 John 4:8) Edu oro edi ima. Nti mme andikpep ẹsinyene ima.
2. Ntak emi edide akpan n̄kpọ ndima mme owo?
2 Ma Mme Owo: Jesus, kpa Akwa Andikpep, ama ama mme owo, ndien emi ama anam mmọ ẹkpan̄ utọn̄ ẹnọ enye. (Luke 5:12, 13; John 13:1; 15:13) Edieke ikerede iban̄a mme owo, nnyịn iyada kpukpru ifet inọ ikọ ntiense. Nnyịn idiyakke mme utọ n̄kpọ ubiọn̄ọ nte ukọbọ ye unana udọn̄ ẹnam idem emem nnyịn. Nnyịn iyowụt ọkpọkpọ udọn̄ ke idem mbon oro ikwọrọde ikọ inọ, iyonyụn̄ ineme mme n̄kpọ oro ẹfịnade mmọ. Nnyịn iyenyịme ndibiat ini ye eyen ukpepn̄kpọ Bible kiet kiet inyụn̄ ida ini ibem iso itịm idem inọ ukpepn̄kpọ kiet kiet.
3. Didie ke ima oro imade akpanikọ Bible edin̄wam nnyịn ke ini ikwọrọde ikọ?
3 Ma Akpanikọ Bible: Jesus ama ama n̄ko akpanikọ Bible onyụn̄ ada enye nte n̄kpọuto. (Matt. 13:52) Edieke imade akpanikọ, nnyịn iyetịn̄ ikọ ye nduaidem, ndien emi ekeme ndidemede udọn̄ mbon oro ẹkpan̄de utọn̄ ẹnọ nnyịn. Utọ ima oro ayan̄wam nnyịn iwụk ntịn̄enyịn ke ọsọn̄urua akpanikọ oro itan̄ade utu ke unana ukeme nnyịn, ndien emi ekeme ndinam idem okûnen̄ede enyek nnyịn ke ini ikwọrọde ikọ.
4. Didie ke ikeme ndinyene ima?
4 Nyene Ima: Didie ke ikeme ndinyene ima nnọ mme owo? Ebe ke ndikere mban̄a ima oro Jehovah ye Eyen esie ẹmade mme owo nnyụn̄ n̄kere mban̄a idiọk idaha eke spirit mme owo ke efakutom nnyịn. (Mark 6:34; 1 John 4:10, 11) Nnyịn iyenen̄ede ima akpanikọ Bible ke ini inyenede ọkpọkpọ ukpepn̄kpọ Bible ofụri ini inyụn̄ isitie ikere se ikpepde. Ima edi ikpehe mbun̄wụm spirit. (Gal. 5:22) Mmọdo, nnyịn imekeme ndikpe Jehovah ubọk ite ọnọ nnyịn edisana spirit inyụn̄ iben̄e enye an̄wam nnyịn ika iso inyene ima. (Luke 11:13; 1 John 5:14) Inamke n̄kpọ m̀mê nso orụk ifiọkn̄wed ererimbot ke inyene, m̀mê ibịghi didie ke akpanikọ, m̀mê nso ndammana ukeme ke inyene, nnyịn imekeme ndidi nti mme andikpep Ikọ Abasi ke ndinyene ima.