Ekebe Mbụme

◼ Nso idin̄wam nnyịn ibiere m̀mê akpana inọ owo n̄wed?

Ata akpan n̄kpọ oro edin̄wamde nnyịn ibiere edi udọn̄ oro owo enyenede. Edieke owo oro enen̄erede enyene udọn̄, imekeme ndinọ enye magazine iba, ediye uduot ekpri n̄wed, m̀mê n̄wed ekededi oro inọde mme owo. Imekeme ndinam ntre idem ke ini ifiọkde ke owo emi inyeneke okụk nditịp kaban̄a utom ofụri ererimbot. (Job 34:19; Edi. 22:17) Ke n̄kan̄ eken, nnyịn ikpayakke ọsọn̄urua n̄wed nnyịn inọ mbon oro mîmaha n̄wed nnyịn.—Matt. 7:6.

Didie ke enyeneufọk ekeme ndiwụt ke imenyene udọn̄? Akpan usụn̄ kiet edi enye ndinyịme ndinyene nneme ye nnyịn. Enye ndikpan̄ utọn̄ ke ini itịn̄de ikọ, ndibọrọ mbụme oro ibụpde, ndinyụn̄ ntịn̄ ekikere esie ẹwụt ke enye etiene abuana ke nneme oro. Enye nditiene nse nte ikotde Bible owụt n̄ko ke enye okpono Ikọ Abasi. Ọfọn isibụp enyeneufọk m̀mê enye oyokot n̄wed oro inọde. Mme asuanetop ẹkpenyene ndida mbufiọk mbiere m̀mê owo oro enyene udọn̄. Ke uwụtn̄kpọ, idifọnke iyak mme magazine, ndiye uduot n̄kpri n̄wed, m̀mê mme n̄wed inọ kpukpru owo oro ikụtde ke ini inọde ikọ ntiense efak. Edieke nnyịn mîkemeke ndibiere m̀mê owo enyene udọn̄, ọyọfọn inọ n̄wedikot m̀mê tract.

Kpasụk ntre, ibat n̄wed oro asuanetop ọbọde ikpọkọn̄ọke ke etịbe oro enye etịpde edi ọkpọkọn̄ọ ke se enye oyomde ke an̄wautom. Nnyịn isitịpke etịbe kaban̄a mme n̄wed nnyịn edi isitịp man ẹda ẹnọ kpukpru ikpehe utom ukwọrọikọ nnyịn ke ofụri ererimbot ibetedem. Inamke n̄kpọ m̀mê nnyịn idi imọ m̀mê ubuene, esịtekọm oro inyenede oyonụk nnyịn nditat ubọk ntịp n̄kpọ man ẹda ẹnọ mme n̄kpọ Obio Ubọn̄ ibetedem. (Mark 12:41-44; 2 Cor. 9:7) Enye oyonụk nnyịn n̄ko ndibọ sụk mme n̄wed oro iyomde, ndien emi ayanam nnyịn ikûtahade inyene ukara Abasi.

[Se ẹwetde ke ikpọ abisi ke page 2]

Mme asuanetop ẹkpenyene ndida mbufiọk mbiere m̀mê owo oro enyene udọn̄