Nam Ndutịm Idahaemi Nditat Utom Ukwọrọikọ Fo

1. Ntak emi ini Editi edide akpan ini, ndien didie ke ikeme nditịm idem nnọ enye?

¹ Ini Editi kiet kiet esinọ nnyịn mbufa ifet ‘ndinen̄ede ntoro Jehovah.’ (Ps. 109:30) Ndi ayatat utom ukwọrọikọ fo ke March nte usụn̄ kiet ndikọm Jehovah ke ndikọnọ ufak? Ini edi emi nditọn̄ọ nnam ndutịm.—N̄ke 21:5.

2. Didie ke afo ye mbon en̄wen ẹkenam n̄kpọ ke ini ẹkesụhọrede ibat hour utom usiakusụn̄ unọ un̄wam ke April?

² Usiakusụn̄ Unọ Un̄wam: Mme esop ẹma ẹnen̄ede ẹkop nduaidem isua oko ke ini ẹkefiọkde ke ẹkeme ndinam utom usiakusụn̄ unọ un̄wam ke April nnyụn̄ nnọ hour 30. Eyenete eren kiet ekewet ete: “Ọsọn̄ mi ndinam utom usiakusụn̄ ofụri ini sia nsụk ndude ke ufọkn̄wed sekọndri. Edi mmọn̄ ntiene nnam eke hour 30 ke April nnyụn̄ ndomo ndisịm hour 50.” Eyenete an̄wan kiet emi anamde utom ofụri ini ekewet ete: “Enen̄ede emem utom ndinọ hour 30!” Ke ini ẹketọtde ke ẹsụhọde ibat hour, eyenete an̄wan kiet emi ama akasiak usụn̄ ke mbemiso, edi odude idahaemi ke iduọk isua 80, ọkọdọhọ ete: “N̄ketetie mbet ini emi! Jehovah ọfiọk ke ami n̄kenen̄ede n̄kop inemesịt ke ini n̄kasiakde usụn̄!” Mbon eken oro mîkekemeke ndisiak usụn̄ ẹma ẹnịm mme utịtmbuba oro ẹken̄wamde mmọ ẹnam ekese ke an̄wautom.

3. Mme ntak ewe ẹkpenam ikere ndinam utom usiakusụn̄ unọ un̄wam ke March, April, ye May?

³ Ọfiọn̄ March edidi eti ọfiọn̄ ndinam utom usiakusụn̄ unọ un̄wam koro iyekeme ndifiak mmek m̀mê idinọ hour 30 m̀mê 50. Ke adianade do, nnyịn iyọtọn̄ọ san̄asan̄a ubịnikọt ke Saturday, March 17, man ikot mbon en̄wen ẹditiene nnyịn ẹdụk Editi ke April 5. Ediwak owo ẹyekop inem editat utom ukwọrọikọ mmọ tutu ẹyom ndinam utom usiakusụn̄ unọ un̄wam ke April ye May n̄ko, ẹnọde hour 50.

4. Didie ke ikeme nditat utom ukwọrọikọ nnyịn, ndien nso ididi utịp?

⁴ Ini efen oro ẹdinịmde mbubreyo Utuakibuot Ubon, ẹneme nte owo kiet kiet ke ubon ekemede nditat utom ukwọrọikọ esie ke ini Editi. (N̄ke 15:22) Ben̄e Jehovah ọdiọn̄ ukeme oro esịnde. (1 John 3:22) Nte afo atatde utom ukwọrọikọ fo, afo eyetetịm otoro Jehovah onyụn̄ enen̄ede okop idatesịt.—2 Cor. 9:6.