Ndi Emekeme Nditiene Mbuana ke Unọ Ikọ Ntiense Mbubreyo?

1. Nte n̄wed kiet ọdọhọde, ini ewe ke apostle Paul ekesikwọrọ ikọ ke ufọk ke ufọk?

¹ N̄wed oro Daily Life in Bible Times, owụt ke apostle Paul ama ọkwọrọ ikọ ke ufọk ke ufọk “ọtọn̄ọde ke n̄kanika 4 mbubreyo tutu esịm okoneyo.” Nnyịn ifiọkke m̀mê Paul ekesinam emi kpukpru ini, edi imọfiọk ke enye ama esiyom ‘ndinam kpukpru n̄kpọ kaban̄a eti mbụk.’ (1 Cor. 9:19-23) Ekeme ndidi emi ama esịne enye ndinam ndutịm man ọkwọrọ ikọ ke ufọk ke ufọk ke ini emi enye edikụtde ediwak owo.

2. Ntak emi mbubreyo edide eti ini ndikwọrọ ikọ?

² Mme asuanetop ke ediwak ebiet ẹsikwọrọ ikọ ke ufọk ke ufọk ke usenubọk kpukpru usen ke urua. Edi ke edem mbufo, ndi ẹmesikụt mme owo ke usenubọk? Asiakusụn̄ kiet etịn̄ ntem aban̄a efakutom esie ete: “Esisọsọn̄ ndikụt mme owo ke ufọk ke utọ ini emi. Edi ata ediwak owo ẹsidu ke ufọk ke mbubreyo.” Ini oro inọde ikọ ntiense mbubreyo ekeme ndidi mfọnn̄kan ini ndikụt mme owo n̄kwọrọ ikọ nnọ, akpan akpan irenowo. Ini emi ke mme enyeneufọk ẹsiwak ndiduọk odudu nnyụn̄ nnyịme ẹnyene nneme ye mmimọ. Edieke utọ ini emi edifọnde ye mbufo, mbiowo ẹkpenyene ndinam ndutịm man ẹnịm mbono an̄wautom ke mbubreyo.

3. Didie ke ikeme ndinam n̄kpọ ke mbufiọk ke ini ibuanade ke unọ ikọ ntiense mbubreyo?

³ Nam N̄kpọ ke Mbufiọk: Enen̄ede oyom inam n̄kpọ ke mbufiọk ke ini inọde ikọ ntiense mbubreyo. Ke uwụtn̄kpọ, edieke akade ufọk owo ke ini oro mîfọnke ye enyeneufọk, utọ nte ke ini enye adiade udia, ọyọfọn ọdọhọ enye ke iyafiak idi. Owụt ọniọn̄ n̄ko ndisan̄a iba iba m̀mê ke otu. Kûka ufọk owo ke ini eyo ama ọkọsọn̄ mbak udûtịmede mme enyeneufọk oro ẹyomde ndidụk idap. (2 Cor. 6:3) Edieke odude efak oro mîsifọnke ẹsan̄a ke eyo ama okokụt, kwọrọ ikọ do ke ntọn̄ọ ntọn̄ọ mbubreyo.—N̄ke 22:3.

4. Mme edidiọn̄ ewe ke unọ ikọ ntiense mbubreyo ẹsikama?

⁴ Mme Edidiọn̄ Oro Idinyenede: Utom ukwọrọikọ esinen̄ede enem nnyịn ke ini ikụtde mme owo inọ ikọ ntiense. Ndien adan̄a nte ikwọrọde ikọ, ntre ke inyene ifet ndin̄wam mme owo “ẹnyene edinyan̄a ẹnyụn̄ ẹsịm nnennen ifiọk akpanikọ.” (1 Tim. 2:3, 4) Ndi emekeme ndikpụhọ ndutịm fo man etiene abuana ke unọ ikọ ntiense mbubreyo?