Da Mme Prọfet nte Uwụtn̄kpọ—Amos
1. Ntak emi uwụtn̄kpọ Amos ekemede ndisịn udọn̄ nnọ nnyịn?
1 Ndi akanam emekere ke imọ idotke ndikwọrọ ikọ ke ntak emi mûfiọkke n̄wed, mûnyụn̄ utoho ufọk imọ? Edieke edide ntre, da uwụtn̄kpọ Amos sọn̄ idem esịt. Amos ekedi ekpemerọn̄ ye anam ukpekpe utom ke ini ke ini, edi Jehovah ama ọnọ enye ukeme nditan̄a ata akpan etop. (Amos 1:1; 7:14, 15) Kpasụk ntre mfịn, Jehovah esida mbon emi mîwọrọke etop anam n̄kpọ. (1 Cor. 1:27-29) Nso efen ke ikeme ndikpep nto prọfet Amos emi edin̄wamde nnyịn ke utom ukwọrọikọ nnyịn?
2. Ntak emi ikpọsọn̄ọde ida ke ini ẹbiọn̄ọde utom ukwọrọikọ nnyịn?
2 Sọn̄ọ Da ke Ini Ẹbiọn̄ọde Fi: Amaziah ekedi oku emi okokponode eyen enan̄ ke obio ubọn̄ esien duop ke edem edere Israel. Edi ke ini enye okokopde ntịn̄nnịm ikọ Amos, se enye eketịn̄de eketie nte enye ọkọdọhọ Amos ete: ‘Nyọn̄ obio mbufo! Sana nnyịn yak! Nnyịn imenyene ido ukpono nnyịn!’ (Amos 7:12, 13) Ke ini Amaziah akakade ebịne Edidem Jeroboam ndidọhọ enye akpan utom Amos, Amaziah ama oyụrọde se Amos eketịn̄de. (Amos 7:7-11) Edi ndịk ikanamke Amos. Mfịn, ndusụk mme ọkwọrọ ederi ẹsinam ukara ẹdiana ye mmọ ẹkọbọ ikọt Jehovah. Edi, Jehovah ọn̄wọn̄ọ ke n̄kpọekọn̄ ekededi eke ẹdibotde ẹban̄a nnyịn idikwe unen.—Isa. 54:17.
3. Etop oro itan̄ade mfịn esịne nso ye nso?
3 Tan̄a Ubiereikpe Abasi ye Mme Edidiọn̄ Ini Iso: Okposụkedi emi ntịn̄nnịm ikọ Amos akaban̄ade se Abasi ekebierede ndinam obio ubọn̄ esien Israel duop, ke utịt utịt n̄wed Bible emi ẹkotde ẹdian enye, Amos ama etịn̄ ke Jehovah ọn̄wọn̄ọ ke ikọt imọ ẹyefiak ẹnyọn̄ isọn̄ emana mmọ, imọ iyonyụn̄ idiọn̄ mmọ etieti. (Amos 9:13-15) Nnyịn imesitịn̄ n̄ko ite ke “usen ubiereikpe” Abasi ke edi, edi etop emi edi ubak “eti mbụk obio ubọn̄” oro anade itan̄a inọ mme owo. (2 Pet. 3:7; Matt. 24:14) Paradise ọyọtọn̄ọ ke isọn̄ ke Jehovah ama okosobo ndiọi owo ke Armageddon.—Ps. 37:34.
4. Nso inam nnyịn inịm ke imekeme ndinam uduak Jehovah?
4 Imemke utom ndikwọrọ etop Obio Ubọn̄ ke ererimbot emi ediwak owo ẹkọbọde nnyịn, emi ekeme ndinam ọsọn̄ nnyịn ndinam se ikọn̄wọn̄ọde ke ini ikayakde idem inọ Jehovah onyụn̄ anam ọsọn̄ nnyịn ndinam uduak esie. (John 15:19) Edi imenịm ke Jehovah ayaka iso anam nnyịn idot ndinam uduak esie, kpa nte enye akanamde ye Amos.—2 Cor. 3:5.